ەلىمىزدە ەڭبەك ونىمدىلىگىن ارتتىرۋعا قاجەت جاعدايدىڭ ءبارى جاسالعان - توقايەۆ

بۇل تۋرالى ق ر پرەزيدەنتى قاسىم-جومارت توقايەۆ «التىن ساپا» سىيلىعى جەڭىمپازدارىن قۇتتىقتاۋ كەزىندە ايتتى، دەپ حابارلايدى قازاقپارات ءتىلشىسى.

«وتاندىق ونەركاسىپتى تسيفرلاندىرۋ بەلسەندى جۇرگىزىلۋدە. بيىل «اقتوعاي» جانە «جايرەم» كەن بايىتۋ كاسىپورىندارىندا «يندۋستريا 4.0» ستاندارتىنىڭ ەلەمەنتتەرى بار زاماناۋي بايىتۋ فابريكالارى ىسكە قوسىلدى. سولتۇستىك قازاقستان وبلىسىندا Alageum Electric كومپانياسىنىڭ ءتورتىنشى ەلەكتر- تەحنيكالىق زاۋىتى جۇمىسىن باستادى. ول ەلدەگى ترانسفورماتورلار ءوندىرىسىن %40، ياعني جىلىنا 44 مىڭ داناعا دەيىن ارتتىرادى. ولاردىڭ جارتىسىنان استامى ەكسپورتقا كەتەدى. بۇل شامامەن 25 مىڭ دانا ءونىم دەگەن ءسوز. سونداي-اق، قۋاتتىلىعى جىلىنا 500 تەحنيكا وندىرۋگە جەتەتىن گەرمانيالىق CLAAS كومپانياسىنىڭ كومبايندارى مەن تراكتورلارىن قۇراستىرۋ ءوندىرىسى جولعا قويىلعان. مەديتسينا عىلىمىندا دا ايتارلىقتاي ناتيجەلەرگە قول جەتكىزىلدى»، - دەدى مەملەكەت باسشىسى.

قاسىم-جومارت توقايەۆ وتاندىق عىلىمنىڭ پاندەميا كەزىندە تىعىرىقتان شىعار جول تاپقانىن دا ەرەكشە اتاپ ءوتتى.

«ءبىزدىڭ عالىمدار كوروناۆيرۋسقا قارسى QazVac ۆاكسيناسىن ويلاپ تاۋىپ، مۇنداي جەتىستىككە جەتكەن ساناۋلى عالىمداردىڭ قاتارىنا كىردى. ونى جاپپاي شىعارۋ ءۇشىن جامبىل وبلىسىندا ورتالىق ازيادا حالىقارالىق ساپا ستاندارتىنا سايكەس كەلەتىن العاشقى بيوفارماتسيەۆتيكالىق زاۋىت سالىندى. مەن جولداۋىمدا 2025 -جىلعا قاراي وڭدەۋ ونەركاسىبىنىڭ ەكسپورتىن ءبىر جارىم ەسەگە، ال ەڭبەك ونىمدىلىگىن %30 ۇلعايتۋ مىندەتىن قويدىم. بۇل وتە ماڭىزدى ماقساتتار جانە سوعان قول جەتكىزۋ ءۇشىن بىزدە بارلىق مۇمكىندىكتەر بار، قاجەتتى جاعدايلاردىڭ ءبارى جاسالىپ وتىر»، - دەدى پرەزيدەنت.

اۆتور: ەسىمجان ناقتىباي