قازاقستان مەن وزبەكستان اراسىنداعى وداقتاستىق بايلانىستار تۋرالى دەكلاراتسياعا قول قويىلدى

None
None
نۇر-سۇلتان. قازاقپارات - بۇگىن اقوردادا قاسىم-جومارت توقايەۆ پەن شاۆكات ميرزيەيەۆ قازاقستان رەسپۋبليكاسى مەن وزبەكستان رەسپۋبليكاسى اراسىنداعى وداقتاستىق بايلانىستار تۋرالى دەكلاراتسياعا قول قويدى.

بۇل تۋرالى اقوردادان ءمالىم ەتتى، دەپ حابارلايدى قازاقپارات.

ايتا كەتەيىك، بۇگىن قازاقستان جانە وزبەكستان پرەزيدەنتتەرى قاسىم-جومارت توقايەۆ پەن شاۆكات ميرزيەيەۆ كەڭەيتىلگەن قۇرامدا ەكىجاقتى كەلىسسوز جۇرگىزگەن بولاتىن.

«بۇگىن ءبىز مەملەكەتارالىق قاتىناستاردىڭ مارتەبەسىن وداقتاستىق دەڭگەيىنە دەيىن كوتەرۋگە ۋاعدالاستىق. جاڭا عانا وسى ماسەلە بويىنشا پىكىر الماسىپ، مۇنىڭ ەلدەرىمىز اراسىنداعى مۇلدەم جاڭا ساپالى دەڭگەي ەكەنىن اتاپ وتتىك. ارينە، وداقتاستىق قاتىناستار مەملەكەتتەرىمىزگە ەرەكشە مىندەت جۇكتەيدى. مەن مەملەكەتارالىق كەڭەس قۇرۋ جونىندە ۇسىنىس ايتتىم. وسى كەڭەس اياسىندا ءبىز قاجەتسىز رەسميلىكتەن تىس، ىسكەرلىك نەگىزدە ءجيى باس قوسا الامىز»، - دەدى قازاقستان پرەزيدەنتى.

ال وزبەكستان پرەزيدەنتى ەكى ەل اراسىنداعى ورناتىلعان جاقىن ءارى باۋىرلاستىق بايلانىستاردى جوعارى باعالادى.

«ءبىز كوپ قىرلى ىنتىماقتاستىعىمىزدىڭ وزەكتى ماسەلەلەرى بويىنشا مۇددەلەرىمىز بەن ۇستانىمدارىمىزدىڭ ورتاق ەكەنىن تاعى دا دالەلدەدىك. ەلدەرىمىز اراسىندا ورناتىلعان جاقىن ءارى باۋىرلاستىق بايلانىستارىمىزدى جوعارى باعالايمىز. جاڭا عانا قاسىم-جومارت كەمەل ۇلى حالىقتارىمىزدىڭ وسى ساپارعا ريزاشىلىق تانىتىپ جاتقانىن ايتتى. شىن مانىندە، شەكارا ماڭىنداعى ەكى ەلدىڭ دە تۇرعىندارى قاتتى قۋانادى. سەبەبى ءبىز ءجيى كەزدەسكەن سايىن ءوزارا قاتىناستارىمىز جاقسارا تۇسەدى. ماشينا جاساۋ، ەنەرگەتيكا، ەلەكتروتەحنيكا، حيميا، جەڭىل ونەركاسىپ، بانكتەر جانە باسقا دا سالارداعى كووپەراتسيا بويىنشا ءساتتى شىققان جوبالارىمىز بار، - دەدى وزبەكستان پرەزيدەنتى.

ەسكە سالايىق، ەكىجاقتى كەلىسسوزدەر قورىتىندىسى بويىنشا وداقتاستىق بايلانىستار تۋرالى دەكلاراتسيادان بولەك، رەسمي دەلەگاتسيالاردىڭ مۇشەلەرى ءبىرقاتار قۇجاتقا قول قويدى.

سوڭعى جاڭالىقتار