قازاقستانداعى ەڭ مەيىرىمدى اۋىل بەلگىلى بولدى

اتالعان جوبا اياسىندا تۇركىستان وبلىسىنا قاراستى قوجاتوعاي اۋىلى II ورىن السا، وسى وڭىردەگى تولەبي اۋدانى كەمەقالعان اۋىلدىق وكرۋگى اقباستاۋ اۋىلى جۇلدەلى III ورىندى يەلەندى.

«جالپاقتال اۋىلىندا قالىپتاسقان ءبىر ءداستۇر بار. مەكتەپ تۇلەكتەرى جىل سايىن تۋعان اۋىلىن اباتتاندىرۋ مەن كوگالداندىرۋعا اتسالىسىپ كەلەدى. 2013-2021-جىلدار ارالىعىندا تۇلەكتەر ءوز قاراجاتىنا 123 ميلليون تەڭگەگە 22 نىساننىڭ قۇرىلىسىن جۇرگىزدى. بۇل ءداستۇر كەيىنگى ۇرپاقتى جاڭا نىسانداردى جاساۋعا شابىتتاندىرادى. كەز كەلگەن ساۋلەتتى عيماراتتىڭ سۇلۋلىعى ونىڭ نىق قالانعان ىرگەتاسىنان باستالاتىنىن ەسكەرسەك، جالپاقتال اۋىلىنىڭ دا مەيىرىمدى اۋىلدار قاتارىنان كورىنىپ، ۇزدىكتەر ساپىنا ىلىگۋى، سول جەردى ەرتەدەن مەكەن ەتىپ، ءومىر ءسۇرىپ كەلە جاتقان جەرگىلىكتى تۇرعىنداردىڭ و باستاعى ەلدىك قاعيداتىنا تىكەلەي بايلانىستى دەپ ەسەپتەيمىز. اۋىل اجارىن ايشىقتاپ، ءوز قولىمەن اسەم كوشەلەرىن ساندەۋگە داعدىلانعان بۇل اۋىلدىڭ ەلجاندى پەرزەنتتەرى جوعارى جاقتان ەشقانداي نۇسقاۋ كۇتپەي-اق، وزدەرىنىڭ تۇرمىستارىنا قاجەتتى نىسانداردى تۇلەكتەر باستاماسىمەن تۇرعىزىپ، جىل سايىن تۋعان اۋىلىن اجارلاندىرىپ كەلەدى. ەلدەگى رۋحاني جاڭعىرۋ باعدارلاماسىنان دا بۇرىن باستاۋ العان بۇل ءۇردىس جالپاقتالدىق اعايىندار ءۇشىن جازىلماعان قاعيدا رەتىندە بۇگىنگى تاڭدا تۇبەگەيلى قالىپتاسىپ ۇلگەردى. اۋىلىمىز بويىنشا «رۋحاني جاڭعىرۋ» باعدارلاماسى اياسىندا اتقارىلعان جوبالار وتە كوپ. ونىڭ بارلىعى تۇلەكتەر تاراپىنان ىجداعاتتىلىقپەن باستالىپ، ۋاقىتىندا تاپسىرىلدى»، - دەيدى «ەڭ مەيىرىمدى» اۋىلدىڭ اكىمى ءاليا جاقسىبايەۆا.

ەسكە سالا كەتەيىك، «قايىرىمدى ىستەر مارافونى» جالپىۇلتتىق جوباسى ازاماتتىق باستامالاردى قولداۋ ورتالىعى مەن اقپارات جانە قوعامدىق دامۋ مينيسترلىگىنىڭ قولداۋىمەن جۇزەگە اسىپ جاتىر.

جوبانىڭ باستى ماقساتتارىنىڭ ءبىرى - جاقسىلىققا جانى قۇمار ادامداردى بىرىكتىرۋ جانە ۇيىمداستىرۋ، قوعام مەن ادامداردىڭ ءومىرىن جاقسى جاققا وزگەرتۋگە مۇمكىندىك بەرەتىن، جومارتتىق پەن جاقسىلىق يدەياسىنا نەگىزدەلگەن قوعام قۇرۋ.

اۆتور: ريزابەك نۇسىپبەك ۇلى