كومىر تاپشىلىعى: الماتى وبلىسىنىڭ جاڭا اكىمى باسقارما باسشىسىنا سوگىس بەردى

None
None
تالدىقورعان. قازاقپارات - حالىقتى كومىرمەن قامتاماسىز ەتۋدى ناشار ۇيىمداستىرعانى جانە قاناعاتتانارلىقسىز جۇمىسى ءۇشىن الماتى وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ باسشىسى باعلان تانەكەنوۆكە سوگىس بەرىلدى، - دەپ حابارلايدى قازاقپارات ءتىلشىسى.

الماتى وبلىسى اكىمىنىڭ ءبىرىنشى ورىنباسارى لاززات تۇرلاشوۆ پەن اۋدان، قالا اكىمدەرىنە ەسكەرتۋ جاسالىپ، 15 كۇننىڭ ىشىندە جاعدايدى تۇزەتۋ تاپسىرىلدى.

ەگەر تاپسىرما ورىندالماسا، ولارعا قاتاڭ شارا قولدانىلاتىنىن وبلىس اكىمى قانات بوزىمبايەۆ ەسكەرتتى.

ايتا كەتەيىك، الماتى وبلىسىندا كومىرگە قاتىستى جيىن وتكىزگەن قانات بوزىمبايەۆ جاۋاپتىلاردىڭ جۇمىسىن ناشار دەپ باعالادى.

«جىلىتۋ ماۋسىمى باستالعالى وبلىسىمىزعا قاجەتتى قاتتى وتىن كولەمى ءالى تولىق جەتكىزىلگەن جوق. «قاراجىرا» كەن ورنىنان اكەلىنگەن كومىر كولەمى 300 مىڭ تونناعا جۋىق نەمەسە %54 عانا قۇراپ وتىر، بۇل ءوز كەزەگىندە حالىقتىڭ كوپتەگەن نارازىلىعىن تۋدىرۋدا. وسىعان بايلانىستى قازىرگى جيىندا جىلىتۋ ماۋسىمىنىڭ ءوتۋ بارىسىن قاراستىرامىز»، - دەدى ق. بوزىمبايەۆ.

كومىر باعاسىنىڭ قانشا ەكەنىن سۇراعان قانات الدابەرگەن ۇلى باسقارما باسشىسىنىڭ «كومىر باعاسى 14-16 مىڭ تەڭگە كولەمىندە» دەگەن جاۋابىنا كوڭىلى تولعان جوق.

«مەندەگى مالىمەت باسقا. مەن كومىردىڭ كوتەرمە باعاسىن ەمەس، تۇرعىندارعا ساتىلاتىن باعاسىن سۇراپ وتىرمىن. حالىق قازىر كومىردى 23-30 مىڭ تەڭگە اراسىنداعى سوماعا ساتىپ الىپ وتىر. نەگە بۇلاي؟ ەڭ الدىمەن كومىر جەتىسپەۋشىلىگىن بولدىرماۋ كەرەك. ەكىنشىدەن، باعانىڭ كوتەرىلۋىنە جول بەرمەۋ كەرەك. ەگەر كومىر جەتپەي جاتسا، باعانى قالاي ۇستاپ تۇرا الاسىزدار؟ جۇمىستارىڭىز ناشار»، - دەدى ق. بوزىمبايەۆ.

جيىن بارىسىندا وبلىس اكىمى قانات بوزىمبايەۆ قىسقى وتىنمەن جەتكىلىكتى كولەمدە قامتۋ، تەمىر جول ارقىلى تاسىمالداۋ ماسەلەلەرى بويىنشا ءتيىستى اكتسيونەرلىك قوعامداردىڭ باسشىلارىمەن سويلەسكەنىن، ولاردىڭ بارلىعى وبلىسقا قاجەتتى قولداۋ كورسەتەتىنىن ايتتى.

«حالىقتى كومىرمەن قامتۋ شارالارى ۋاقىتىلى قابىلدانىپ، باعالاردىڭ وسۋىنە جول بەرىلمەۋىن قاتاڭ تاپسىرامىن. حالىقتىڭ الەۋمەتتىك جاعىنان قورعالاتىن وسال توپتارىنا كومىردى كوممۋنالدىق اۆتوكولىكتەرمەن جەتكىزىپ بەرۋ ۇيىمداستىرىلسىن. ءار اۋدان، قالادا كومىر تاسىمالداۋمەن كىمدەر اينالىسادى، قانداي كولىكپەن تاسيدى، ءبارىن ءبىلىپ وتىرسىزدار. سوندىقتان ولاردى شاقىرىپ، ءتيىستى كالكۋلياتسيا جاساپ، كەلىسىم نەگىزىندە شەكتى باعانى قويۋ كەرەك. وعان كونبەي مە، كومىر تۇيىقتارىنا جىبەرمەڭىزدەر. باعانى باقىلاڭىزدار. كومىر جەتىسپەۋشىلىگىنەن حالىق زارداپ شەكپەۋى كەرەك!» - دەدى قانات بوزىمبايەۆ.

اۆتور: سامال قابىشەۆا

سوڭعى جاڭالىقتار