تۇڭعىش پرەزيدەنت كۇنىندە قانداي تەلەجوبالار كورەرمەنگە جول تارتادى؟

قازاقپارات وسى ايتۋلى كۇنگە ارنالعان جوبالاردىڭ شولۋىن ۇسىنادى.

«حابار» تەلەارناسىنان «ەلباسى. تاۋەلسىزدىك شەجىرەسى» اتتى ءارقايسىسى 30 مينۋتتىق 15 ەپيزودتان تۇراتىن تۋىندى قازاق جانە ورىس تىلدەرىندە كورسەتىلەدى. بۇل - تۇڭعىش پرەزيدەنتتىڭ ءار جىلداعى نەگىزگى باستامالارى مەن جوبالارىن كينو تىلىمەن بايانداعان فيلمدەر توپتاماسى. ەفيرگە 29- قاراشا مەن 17- جەلتوقسان ارالىعىندا شىعادى. سونداي-اق، «حابار» تەلەارناسىنىڭ ەفيرىنە «تاۋەلسىزدىك سەزىمدەرى» اتتى دەرەكتى سەريال جول تارتادى.

ءارقايسىسى 40 مينۋتتىق 6 سەريادان تۇراتىن توپتاما تاۋەلسىز قازاقستاندا بولعان تاريحي وقيعالاردى كەيىپكەرلەردىڭ اۋزىمەن قازاق جانە ورىس تىلدەرىندە باياندايدى. ەفيرگە 13-18- جەلتوقسان ارالىعىندا شىعادى.

تاۋەلسىزدىك تاڭى ەندى اتقان تۇستا ەلباسى نۇرسۇلتان نازاربايەۆ سىرتتاعى قانداستاردى ەلگە قايتارۋ جونىندە باستاما كوتەردى. ءارقايسىسى 40 مينۋتتىق 12 سەريالى «تۇمار» تەلەحيكاياسى قانداستاردىڭ قازاقستانعا قونىستانۋ تاريحىنان قازاق جانە ورىس تىلدەرىندە سىر شەرتەدى.

ەفيرگە شىعاتىن ۋاقىتى - «حابار» تەلەارناسى: 29- قاراشادان 14- جەلتوقسانعا دەيىن.

«ءبىر كۇننىڭ تاريحى» - 30 سەريالى دەرەكتى فيلم. بۇل جوبا ارقىلى اۆتور قازاقستاننىڭ تاۋەلسىزدىگى جاريالاعانعا دەيىنگى جانە كەيىن 15 كۇننىڭ شەجىرەسىن باياندايدى.

تۋىندى Qazaqstan تەلەارناسىنىڭ ەفيرىنەن 1-30- جەلتوقسان ارالىعىندا قازاق تىلىندە كورسەتەدى. ونىڭ ءار سەرياسى 3 مينۋتقا سوزىلادى.

«قوعامدىق كەلىسىم» رەسپۋبليكالىق مەملەكەتتىك مەكەمەسى ازىرلەگەن «بەيبىتشىلىك پەن كەلىسىم جولىندا» دەرەكتى فيلمى جاس مەملەكەتتە بەيبىتشىلىك پەن كەلىسىم ساياساتىنىڭ قالىپتاسۋى جانە دامۋ تاريحى تۋرالى مالىمەتتەر كورسەتىلەدى. ورىس تىلىندە تۇسىرىلگەن 5 بولىمنەن تۇراتىن فيلمنىڭ جالپى ۇزاقتىعى - 150 مينۋت.

ەفيرگە 10- جەلتوقساننان باستاپ شىعادى.