تۇركيا تورىندە قازاقتىڭ ءداستۇرلى ونەرى ۇلىقتالدى

None
None
نۇر- سۇلتان. قازاقپارات - ىستانبۇلدا الماتى قالالىق مادەنيەت باسقارماسىنا قاراستى قازاقتىڭ ءداستۇرلى ونەرىن ۇلىقتايتىن «الاتاۋ» ونەر تەاترى ۇجىمىنىڭ «التىباقان» اتتى ويىن-ساۋىق ءان كەشى ءوتتى، دەپ حابارلايدى قازاقپارات ءتىلشىسى.

تۇركياداعى قازاقستان ەلشىلىگىنىڭ مالىمەتىنشە، ەلىمىزدىڭ تاۋەلسىزدىگىنىڭ 30 جىلدىعىن اتاپ ءوتۋ اياسىندا ۇيىمداستىرىلعان ءىس-شاراعا ىستانبۇل قالاسىنىڭ اكىمدىگى جان-جاقتى قولداۋ كورسەتكەن.

«اتالعان مادەني ءىس- شاراعا قازاقستاننىڭ تۇركياداعى ەلشىسى ابزال ساپاربەك ۇلى جانە ىستانبۇل قالاسى مەرياسىنىڭ وكىلدەرى، «الاتاۋ» ونەر تەاترىنىڭ ديرەكتورى رينات زايتوۆ، قازاق دياسپوراسى، زيالى قاۋىم جانە تۇركيادا ءبىلىم الىپ جاتقان ستۋدەنتتەر قاتىستى. كەشتىڭ اشىلۋ سالتاناتىندا ءسوز سويلەگەن ابزال ساپاربەك ۇلى جينالعان قاۋىمدى تاۋەلسىزدىگىمىزدىڭ 30 جىلدىعىمەن قۇتتىقتاپ، كەشتىڭ ەكى ەل اراسىنداعى مادەني بايلانىستاردى نىعايتۋعا ۇلەس قوساتىندىعىنا سەنىمىن ءبىلدىردى. سونىمەن قاتار ەلشى تاۋەلسىزدىگىمىزدىڭ 30 جىلدىعىندا ەلىمىزدىڭ جەتكەن جەتىستىكتەرى مەن قازاقستان- تۇركيا بايلانىستارى تۋرالى جان- جاقتى باياندادى»، - دەپ اتاپ وتەدى ەلشىلىكتىڭ باسپا ءسوز قىزمەتىنەن.


«التىباقان» ويىن-ساۋىق كەشىندە ءداستۇرلى اندەرمەن قاتار ۇمىت بولىپ بارا جاتقان، كونە ءداستۇرلى ءان-جىرلار دا ورىندالدى. ساحنادا ونەرپازدار قازاق حالقىنىڭ ماقتانىش ەتەر اسىل مۇراسى، رۋحاني جادىگەرلەرى ىشىندە ۇمىت بولىپ بارا جاتقان تۇرمىس-سالتىن ونەر سۇيەر قاۋىمعا پاش ەتتى. بۇل ويىندا قازاق جاستارىنىڭ ەرتەدەن كەلە جاتقان كەشكىلىك باس قوسۋ، ءان ايتۋ، دومبىرا تارتۋ، ايتىسۋ، بي بيلەۋ، ءتۇرلى ويىندار ويناۋ سياقتى داستۇرلەرى ۇسىنىلدى. سونىمەن قاتار، تەاتردىڭ كۇمىس كومەي، جەز تاڭداي انشىلەرى تۇرىك كورەرمەندەرىنە ولاردىڭ انا تىلىندە دە ءان شىرقادى.

اۆتور: مارلان جيەمباي

سوڭعى جاڭالىقتار