ازىق-تۇلىك ينفلياتسياسى دا ءسال تومەندەدى

بۇل تۋرالى سەناتتىڭ جالپى وتىرىسىندا ق ر ۇلتتىق بانكى ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.

«ازىق- تۇلىك باعاسىنىڭ ءوسۋى نەگىزگى پروينفلياتسيالىق فاكتور بولدى. ول جالپى ينفلياتسياداعى ۇلەستىڭ جارتىسىن يەلەنەدى. ازىق-تۇلىك ينفلياتسياسى ۋاقىتشا جانە بارىنشا ورنىقتى فاكتورلاردىڭ اسەرىنەن سوڭعى 5 ايدا العاشقى رەت باياۋلاپ بيىلعى قازاندا 11,5 تەن 11,3 پايىزعا دەيىن تومەندەدى. بيىلعى شىلدە- تامىزدا ۇزاق ساقتالاتىن كوكونىستەر باعاسىنىڭ جاز ايلارىنا ءتان ەمەس جانە سوڭعى جىلدارداعى رەكوردتىق ءوسۋى تىركەلدى»، - دەدى «2022-2024 -جىلدارعا ارنالعان رەسپۋبليكالىق بيۋدجەت تۋرالى» بايانداعان ەربولات دوسايەۆ.

ۇلتتىق بانك دەرەگىنشە، ەت، وسىمدىك مايى جانە قانت باعاسىنىڭ ءوسۋى ينفلياتسيانى جەدەلدەتۋدىڭ تۇراقتى فاكتورى بولىپ قالۋدا. مۇنى ءوسىم دەڭگەيى بويىنشا الەمدىك ترەندتەرمەن سالىستىرۋعا بولادى. ف ا و دەرەكتەرىنە سايكەس ءبىر جىلدا ەتتىڭ الەمدىك باعاسى ورتا ەسەپپەن - 22,1، وسىمدىك مايىنىڭ باعاسى - 73,6، قانتتىڭ باعاسى - 40,6 پايىزعا ءوستى.

«قازاقستاندا ازىق- تۇلىككە جاتپايتىن ينفلياتسيا، ءبىرىنشى كەزەكتە، تۇتىنۋشىلىق بەلسەندىلىكتىڭ قالپىنا كەلۋى اياسىندا جانار- جاعار ماي جانە ۇزاق پايدالانىلاتىن تاۋارلار باعاسىنىڭ ءوسۋى ناتيجەسىندە جىلدامدادى. اقىلى قىزمەتتەر ينفلياتسياسى نەگىزىنەن ەلەكتر ەنەرگياسى، تۇرعىن ءۇيدى جالداۋ جانە كولىك قىزمەتتەرى باعاسىنىڭ ءوسۋى ەسەبىنەن جىلدامدادى»، - دەدى ول.