قازاقستاندا زيراتتاردى كۇتىپ ۇستاۋ تۋرالى زاڭ ازىرلەۋ ۇسىنىلدى

سەناتور ەدىل مامىتبەكوۆ پرەمەر-مينيستر اسقار مامينگە جولداعان دەپۋتاتتىق ساۋالىندا جەرلەۋ، زيراتتاردى كۇتىپ- ۇستاۋعا قاتىستى پروبلەمالاردى ايتتى. ول 2017 -جىلى سەناتور ولگا پەرەپەچينا «جەرلەۋ جانە جەرلەۋ ءىسى تۋرالى» زاڭ جوباسىن ازىرلەۋ تۋرالى ءوتىنىش بىلدىرگەنىن ەسكە سالدى. الايدا سەناتور بەيىندى مەملەكەتتىك ورگاندار بۇل ماسەلەنى ەلەمەگەنىن اتاپ ءوتتى.

مامىتبەكوۆتىڭ ايتۋىنشا، قازىر زاڭنامالىق اكتىنىڭ بولماۋى «بولاشاقتا پروبلەمالارعا اكەلۋى مۇمكىن».

«قازاقستاندا جەرلەۋگە قاتىسى قىزمەت كورسەتەتىن جەكە فيرمالار پايدا بولا باستادى. ولاردىڭ سانى ارتىپ كەلەدى. زاڭ قابىلدانۋى وسىنداي ماڭىزدى سالانى باقىلاپ قانا قويماي، ونى قولجەتىمدى ەتۋگە مۇمكىندىك بەرەدى. ساراپشىلاردىڭ پىكىرىنشە، جەرلەۋ ماسەلەلەرىن رەتتەيتىن زاڭنامالىق اكتىنىڭ بولماۋى ءتۇرلى قۇقىق بۇزۋشىلىقتارعا الىپ كەلەدى. قىلمىستىق جەرلەۋ، زاڭسىز بيزنەستى جۇرگىزۋ دەرەكتەرى بولاتىنى جوققا شىعارىلمايدى، ەكسگۋماتسيا (قايتىس بولۋ سەبەبىن انىقتاۋ نەمەسە ءمايىتتىڭ ۇقساستىعىنا كوز جەتكىزۋ ماقساتىندا جەرلەنگەن ءمايىتتى قايتا اشۋ) مەن جەرلەۋدىڭ ناقتى ەرەجەلەرى جوق»، - دەپ اتاپ ءوتتى سەناتور.

دەپۋتات پرەمەر-مينيستردەن بەيىندىك ۆەدومستۆولارعا زيراتتاردى جەرلەۋ، ورنالاستىرۋ جانە كۇتىپ- ۇستاۋ بويىنشا قوعامدىق قاتىناستاردى رەتتەيتىن زاڭنامالىق اكتىنى ازىرلەۋ جونىندە شارالار قابىلداۋدى تاپسىرۋدى سۇرادى.

Tengrinews.kz