قازاقستان تاجىكستانعا نە ءۇشىن اسكەري مۇلىك بەرەدى

None
None
نۇر-سۇلتان. قازاقپارات - ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى وتەۋسىز اسكەري- تەحنيكالىق كومەك كورسەتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى، دەپ حابارلايدى قازاقپارات ءتىلشىسى.

قازاقستان ۇكىمەتى مەن تاجىكستان ۇكىمەتى اراسىنداعى وتەۋسىز اسكەري-تەحنيكالىق كومەك كورسەتۋ تۋرالى كەلىسىم 2021 -جىلعى 17-ساۋىردە نۇر-سۇلتان قالاسىندا جاسالعان.

«كەلىسىم تاجىك تاراپىنا اسكەري مۇلىكتى، اتاپ ايتقاندا، وق-دارىلەردى ءبىر رەت بەرۋدى كوزدەيدى. قازاقستان تاراپى اسكەري مۇلىكتى جامبىل وبلىسىنىڭ وتار ستانسياسىنان تاجىكستان رەسپۋبليكاسىنىڭ اۋماعىنا دەيىن («روحاتي» ستانسياسى، دۋشانبە قالاسى) تەمىرجول كولىگىمەن جەتكىزۋدى قامتاماسىز ەتىپ، وعان بايلانىستى بارلىق شىعىستى ءوزى كوتەرەدى»، - دەدى ق ر قورعانىس ءمينيسترىنىڭ ورىنباسارى رۋسلان شپەكبايەۆ.

ونىڭ ايتۋىنشا، تاجىكستان جاعى قازاقستاننان العان اسكەري مۇلىكتى، ونى پايدالانۋ قۇقىعىن ءۇشىنشى تاراپقا بەرمەيدى.

«اسكەري مۇلىكتى تاجىكستانعا بەرۋ قازاقستاننىڭ جاۋىنگەرلىك ازىرلىگى مەن قوعانىس قابىلەتىنە ىقپال ەتپەيتىنىن اتاپ ءوتۋ قاجەت»، - دەدى ر. شپەكبايەۆ.

سونىمەن قاتار، بۇگىن جالپى وتىرىستا «قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى تاجىك- اۋعان شەكاراسىنا ىرگەلەس اۋدانداردا قاۋىپسىزدىكتى قامتاماسىز ەتۋدە اسكەري- تەحنيكالىق جاردەم كورسەتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى دا ماقۇلداندى. اتالعان كەلىسىم 2021 -جىلعى 12-شىلدەدە نۇر-سۇلتان قالاسىندا جاسالدى.

«كەلىسىمگە سايكەس تاجىكستان تاراپى قازاقستاننان بەرىلەتىن اسكەري مۇلىكتى تەك تاجىك- اۋعان شەكاراسىنا ىرگەلەس اۋدانداردا قاۋىپسىزدىكتى قامتاماسىز ەتۋ ماقساتىندا قولدانۋعا جانە ولاردى ءۇشىنشى تاراپقا بەرمەۋگە مىندەتتەنەدى»، - دەدى رۋسلان شپەكبايەۆ.

كەلىسىمگە سايكەس قازاقستان تاراپى تاجىكستان تاراپىنا اسكەري مۇلىكتى وتەۋسىز بەرۋ تۇرىندە اسكەري- تەحنيكالىق جاردەم كورسەتەدى. اسكەري مۇلىكتىڭ اتاۋى مەن كولەمىن تاراپتاردىڭ ۋاكىلەتتى ورگاندارى ديپلوماتيالىق ارنالار ارقىلى كەلىسەدى.

اۆتور: رۋسلان عابباسوۆ


سوڭعى جاڭالىقتار