ايدا بالايەۆا جۋرناليستەردىڭ مارتەبەسى تۋرالى زاڭ جوباسىنا قاتىستى ايتتى
«جۋرناليستەردىڭ قۇقىعى مەن الەۋمەتتىك مارتەبەسى تۋرالى زاڭ جوباسىن ازىرلەۋ ماسەلەسى قاراستىرىلىپ جاتىر. نۇرتورە ءجۇسىپ مىرزا جۋرناليستەرگە ءۇي الۋ نەمەسە باسقا جاعدايلاردا جەڭىلدىك جاساۋ تۋرالى ايتىپ وتىر عوي. بۇل جۇمىس بارلىق مەملەكەتتىك مەكەمەمەن كەلىسە وتىرىپ ىسكە اساتىن دۇنيە ەكەنى بەلگىلى. ول كىسى مينيسترلىكپەن قويان-قولتىق جۇمىس ىستەپ وتىر. ال زاڭ جوباسىنىڭ ءماتىنىن ۇكىمەتتىك ەمەس ۇيىمدارمەن، ساراپشىلارمەن كەڭەسىپ جازامىز. قۇجات جوباسىن كەلەر جىلدىڭ العاشقى جارتىجىلدىعىندا اشىق تالقىلاۋعا شىعارامىز دەپ ويلاپ وتىرمىز»، - دەدى مينيستر قازاق تىلىندە كونتەنت جاساۋشىلار فورۋمىندا تىلشىلەرگە بەرگەن سۇحباتىندا.
اتالمىش شارادا ۆەدومستۆو باسشىسى وتاندىق تەلەارنالار مەن باعدارلامالاردىڭ رەيتينگىلەرى live-رەجيمگە شىعارىلاتىنىن اتادى.
«بۇعان دەيىن قوعام تاراپىنان مەديا ولشەۋ جۇيەسىن جەتىلدىرۋ تۋرالى ۇسىنىستار ايتىلعان بولاتىن. وسى ورايدا، ءبىز وسى ايدان باستاپ مينيسترلىكتىڭ سايتىندا زاماناۋي IP تەحنولوگيالاردى پايدالانا وتىرىپ، جاڭا جۇيەنى ىسكە قوستىق. ونىڭ نەگىزىندە، قىزىعۋشىلىق تانىتقان كەز كەلگەن ازامات بارلىق قازاقستاندىق تەلەارنالار مەن باعدارلامالاردىڭ رەيتينگىلەرىن live-رەجيمدە كورە الادى. قازىر وتاندىق كونتەنتتى قاراۋشىلار ۇلەسى ۇلكەن قارقىنمەن ءوسىپ كەلەدى. بۇگىندە قازاقستان مەديا نارىعىنداعى شەت ەلدىك جانە وتاندىق ارنالار رەيتينگىسىندە ۇزدىك توپ-10-دىقتى ءبىزدىڭ وتاندىق تەلەارنالار يەلەندى. مۇنىڭ ءوزى ءبىزدىڭ ۇلتتىق تەلەونىمدەردىڭ باسەكەگە قابىلەتىنىڭ جىلدان-جىلعا ارتىپ كەلە جاتقانىن كورسەتەدى»، - دەدى مينيستر.
اۆتور: ەسىمجان ناقتىباي