كەنەسارى حاننىڭ باس سۇيەگىن ىزدەۋدە اسىعىستىق بولماۋى كەرەك - ارىستانبەك مۇحامەدي ۇلى

«بۇل ءىستى اياعىنا دەيىن جەتكىزۋ كەرەك. قازىر جان- جاقتى زەرتتەلىپ جاتىر، ول وتە دۇرىس. مۇنداي تاريحي قادامدى اسىعىس جاساۋعا بولمايدى. بىزدە ودان باسقا دا شەتەلدەردە ارتەفاكتىلەرىمىز بار. ماسەلەن، بەرىك ابدىعالي ۇلىمەن سانكت- پەتەربۋرگكە بارعاندا كەنەسارى حاننىڭ بەلبەۋىن كوردىك. ونىڭ مىلتىعى ومبى مۋزەيىندە تۇر. ەكى جاقتى كەزدەسۋ جۇرگىزىپ، مۇنداي قاسيەتتى دۇنيەلەردى قازاقستانعا اكەلۋگە مۇمكىنشىلىك بار. ءبىراق ول - بىركۇندىك دۇنيە ەمەس»، - دەدى ا. مۇحامەدي ۇلى «ۇلى دالانىڭ جەتى قىرى: ءسىبىر ۇلىسى جانە تايبۇعا قازاقستان تاريحىندا» اتتى عىلىمي- پراكتيكالىق كونفەرەنسيادا تىلشىلەرگە بەرگەن سۇحباتىندا.

مۋزەي ديرەكتورى بۇل ماسەلەدە اسىعىس قادام جاساماۋدىڭ ماڭىزدى ەكەنىن باسا ايتتى.

«قازىرگى ۋاقىتتا بۇل ماسەلە تەرەڭ زەرتتەلىپ جاتىر. مۇنداي قادامدى جاساپ جاتقان قازاقستان عانا. كەيكى باتىردىڭ باس سۇيەگىن الىپ كەلگەندە ول ءتىزىم ىشىندە باسقا مەملەكەتتەردىڭ حاندارىنىڭ، باتىرلارىنىڭ باس سۇيەكتەرى جاتتى. ءبىراق، ونى قايتارام دەپ جۇرگەن ەش مەملەكەتتى كورمەدىك. ارينە، قازاق حالقى ءوز تاريحىنا قۇرمەتپەن قارايدى، ءوز قۇندىلىعىن قاستەرلەيدى. ءبىراق، بۇل ماسەلەدە اسىعۋدىڭ كەرەگى جوق، سەنساتسيا ءۇشىن جالعان دۇنيەلەر جاريالانىپ كەتسە، وزگە ەلدەردىڭ الدىندا ىڭعايسىز بولادى»، - دەدى ارىستانبەك مۇحامەدي ۇلى.

ايتا كەتەيىك، 30 - ماۋسىم كۇنى نۇرسۇلتان نازاربايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەلىسسوز جۇرگىزدى. كەلىسسوز اياسىندا تالقىلانعان ماسەلەنىڭ ءبىرى - كەنەسارى حاننىڭ سۇيەگىن ىزدەستىرۋ جانە ونى قازاقستانعا قايتارۋ تاقىرىبى بولدى. ن. نازاربايەۆ رەسەي پرەزيدەنتىنەن وسى پروتسەسكە كومەك كورسەتۋىن سۇرادى.

ەلباسى قازاقتىڭ سوڭعى حانىنىڭ سۇيەگى ءوزىنىڭ تۋعان جەرىندە جەرلەنىپ، رۋحىنىڭ تىنىش تابۋى قازاق حالقى ءۇشىن اسا ماڭىزدى ماسەلە ەكەنىن ايرىقشا اتاپ ءوتتى. ۆلاديمير پۋتين رەسەي تاراپىنىڭ بۇل ماسەلەدە جان- جاقتى كومەك كورسەتەتىنىنە سەندىردى. پۋتيننىڭ سوزىنە قاراعاندا، ارتەفاكت تابىلادى جانە قازاقستان حالقىنا قايتارىلادى.

اۆتور: ايجان سەرىكجان قىزى