ءۇي جانۋارلارىن سەرۋەندەتۋ مەن تاسىمالداۋ ەرەجەسىن بۇزعاندارعا ايىپپۇل كۇشەيتىلمەك

ايتا كەتەيىك، جالپى وتىرىستا بۇگىن «جانۋارلارعا جاۋاپكەرشىلىكپەن قاراۋ تۋرالى» زاڭ جوباسى ءبىرىنشى وقىلىمدا ماقۇلداندى.

«قازىرگى ۋاقىتتا اكىمشىلىك قۇقىق بۇزۋشىلىق تۋرالى كودەكستىڭ 408-بابىندا قاڭعىباس يتتەر مەن مىسىقتاردى ۇستاۋ، سەرۋەندەتۋ، اۋلاۋ جانە جويۋ ەرەجەلەرىن بۇزعانى ءۇشىن 3 تەن 10 ايلىق ەسەپتىك كورسەتكىشكە دەيىن ايىپپۇل قاراستىرىلعان. سونىمەن بىرگە، بۇل باپتا قاڭعىباس جانۋارلاردى اۋلاۋ، جانۋارلاردى ەسەپكە الۋ جانە ءولتىرۋ كەزىندەگى مۇنداي زاڭ بۇزۋشىلىقتار قامتىلماعان جانە قورىتا كەلگەندە، جانۋارلارعا قاتىگەزدىك جاساعانى ءۇشىن جەكە باپ بولعان جوق. وسىعان بايلانىستى، اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزۋ تۋرالى ىلەسپە زاڭ جوباسى جانۋارلارعا قاتىگەزدىكپەن قاراۋ ءارى ۇيدەگى جانە قاڭعىباس يتتەر مەن مىسىقتاردى اۋلاۋ، ۇستاۋ، ەسەپكە الۋ، سەرۋەندەتۋ، تاسىمالداۋ، جانسىزداندىرۋ قاعيدالارىن بۇزۋعا ارنالعان جەكەلەگەن باپتاردى ءبولۋ بولىگىندە پىسىقتالدى»، - دەدى ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ.

ونىڭ ايتۋىنشا، اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزۋ تۋرالى زاڭ جوباسىنىڭ 407-1-باپتارىندا جانۋارلارعا قاتىگەزدىكپەن قاراعانى ءۇشىن جەكە تۇلعالارعا 5 تەن 20 ايلىق ەسەپتىك كورسەتكىشكە دەيىن، لاۋازىمدى تۇلعالارعا 10 نان 40 ايلىق ەسەپتىك كورسەتكىشكە دەيىن ايىپپۇل كوزدەلگەن.

«407-2-باپتىڭ ۇسىنىلعان رەداكتسياسىندا ءۇي جانە قاڭعىباس يتتەر مەن مىسىقتاردى اۋلاۋ، ۇستاۋ، ەسەپكە الۋ، سەرۋەندەتۋ، تاسىمالداۋ، جانسىزداندىرۋ ەرەجەلەرىن بۇزعانى ءۇشىن جەكە تۇلعالارعا 10 نان 20 ايلىق ەسەپتىك كورسەتكىشكە دەيىن، لاۋازىمدى تۇلعالارعا 20 دان 30 ايلىق ەسەپتىك كورسەتكىشكە دەيىن، زاڭدى تۇلعالارعا 30 دان 40 ايلىق ەسەپتىك كورسەتكىشكە دەيىن ايىپپۇل قاراستىرىلعان. زاڭ جوباسىن ازىرلەۋ كەزىندە ايىپپۇل مولشەرىن انىقتاۋ بويىنشا حالىقارالىق تاجىريبە ەسكەرىلدى. ماسەلەن، گەرمانيادا جانۋارلاردى سەرۋەندەتۋ ءتارتىبىن بۇزعانى ءۇشىن ايىپپۇل 68 ەۋرونى قۇرايدى، بۇل 33 مىڭ تەڭگە. رەسەي فەدەراتسياسىندا 15 مىڭ تەڭگەگە تەڭ ايىپپۇل قاراستىرىلعان»، - دەدى مينيستر.

اۆتور: رۋسلان عابباسوۆ