جانۋاردىڭ ولىمىنە اكەلگەن قاتىگەزدىك ءۇشىن قانداي جازا ەسكەرىلگەن

None
None
نۇر-سۇلتان. قازاقپارات - ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جانۋارلارعا جاۋاپكەرشىلىكپەن قاراۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە قانداي جاۋاپكەرشىلىكتەر قاراستىرىلعانى ايتىلدى، دەپ حابارلايدى قازاقپارات ءتىلشىسى.

اتاپ ايتقاندا، جالپى وتىرىستا «جانۋارلارعا جاۋاپكەرشىلىكپەن قاراۋ تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسىنىڭ نەگىزگى ەرەجەلەرىن ىسكە اسىرۋ ءۇشىن قولدانىستاعى زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ ۇسىنىلدى. اتاپ ايتقاندا، تۇزەتۋلەر قىلمىستىق كودەكسىنىڭ 316-بابىنا سانكتسيالاردى ۇلعايتۋ ارقىلى جانۋارلارعا قاتىگەزدىكپەن قاراعانى ءۇشىن قىلمىستىق جاۋاپكەرشىلىكتى كۇشەيتۋگە باعىتتالعان.

«ءبىرىنشى بولىمدە جانۋاردىڭ مەرتىگۋىنە اكەپ سوققان قاتىگەزدىگى ءۇشىن 120 ايلىق ەسەپتىك كورسەتكىشكە دەيىن ايىپپۇل جانە 30 تاۋلىككە دەيىن قاماۋعا الۋ كوزدەلگەن. ەكىنشى بولىمدە جانۋاردىڭ ولىمىنە اكەپ سوققان قاتىگەزدىگى ءۇشىن 200 ايلىق ەسەپتىك كورسەتكىشكە دەيىن ايىپپۇل جانە 50 تاۋلىككە دەيىن قاماۋعا الۋ ەسكەرىلگەن»، - دەدى ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ.

«جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭدا وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ ءماسليحاتتارىنىڭ ءۇي جانۋارلارىن ەسەپكە الۋ، جانسىزداندىرۋ ءتارتىبىن بەكىتۋ جونىندەگى قۇزىرەتى كەڭەيتىلدى.

«ۆەتەريناريا تۋرالى» زاڭدا جەرگىلىكتى اتقارۋشى ورگانداردىڭ جانۋارلاردى جانسىزداندىرۋ ءتارتىبىن ايقىنداۋ، اۋلاۋعا جانە جانسىزداندىرۋعا جاتاتىن جانۋارلاردىڭ تىزبەسىن بەكىتۋ جونىندەگى قۇزىرەتى كەڭەيتىلدى.

«جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ تۋرالى» زاڭدا بىركەلكى ۇعىمدار بەلگىلەنگەن جانە باقىلاۋ- قاداعالاۋ فۋنكسيالارى ماسەلەلەرى جونىندەگى زاڭناما جەتىلدىرىلگەن.

اۆتور: رۋسلان عابباسوۆ

سوڭعى جاڭالىقتار