داۋرەن ابايەۆ: ۇلتتىق جوبالار - ەسكى پروبلەمالاردى جاڭا تاسىلمەن شەشۋدىڭ قۇرالى
«پرەزيدەنت ۇلتتىق جوبالاردىڭ ءبىرقاتارىن بەكىتكەنى تۋرالى جاڭالىق پايدا بولعان ساتتە-اق ءبارى «ءماتىنى قايدا؟» دەگەن سۇراق قويدى. ەل ىشىندە ۇكىمەت ۇلتتىق جوبالاردىڭ مازمۇنىن جىل بويى جاسىرىپ كەلگەندەي، قۇددى ءبىر استىرتىن ومىرگە ەنگىزگەلى جاتقانداي سىندار ايتىلدى. بەلگىلى ءبىر نيۋانستار، لوگيستيكا بار. ەكى كۇننىڭ اينالاسىندا ۇلتتىق جوبالاردىڭ بارلىق قۇجاتتارى اشىق ورتاعا شىعارىلعانىن بىلەسىز. وسىدان كەيىن-اق بارشا قىزۋ اڭگىمە تىنشىدى دەپ ويلايمىن»، - دەدى ول سۇحبات بارىسىندا.
ونىڭ پايىمىنشا، ۇلتتىق جوبالاردىڭ اتىنا قاراپ قانا باعا بەرسە، شىنىمەن دە وسىعان دەيىن قولدانىلعان مەملەكەتتىك باعدارلامالاردان ايىرماشىلىعى جوق بولىپ كورىنۋى مۇمكىن.
«ال مەملەكەتتىك باعدارلامالار مەن ۇلتتىق جوبالاردىڭ مازمۇنىنا ماڭىز بەرىپ قاراساق، تۇجىرىمدامالىق وزگەشەلىكتەر بار. ەڭ اۋەلى تاسىلدەرىندە ايىرماشىلىق بار. ياعني، ءبىزدىڭ ەسكى پروبلەمالاردى جاڭا تاسىلدەرمەن، ايقىن باسىم باعىتقا قۇرىلعان شارالار ارقىلى، جوبالىق باسقارۋ قۇرالدارى ارقىلى، سيفرلىق ترانسفورماتسيا ارقىلى شەشكىمىز كەلەدى. ۇلتتىق جوبالارعا تۇزەتۋلەر دە ەنگىزىلىپ جاتىر. مىسالى. «جاسىل قازاقستان - قاۋىپسىز ەل» ۇلتتىق جوباسى مەملەكەتتىڭ جۇيەلى ساۋالدارىنا بەرگەن تىكەلەي جاۋابى. ءبىر ساتتىك ەمەس، ايقىن راسىمدەلگەن، قوعامدىق مۇددەلەر تەڭدىگىنىڭ اياسىندا بەلگىلەنگەن»، - دەگەن پرەزيدەنت اكىمشىلىگى باسشىسىنىڭ ءبىرىنشى ورىنباسارى ۇلتتىق جوبالاردىڭ ىسكە اسۋىنا «حالىق ۇنىنە قۇلاق اساتىن مەملەكەت» قاعيداتى قالا ىقپال ەتەتىنىن ءتۇسىندىردى.
«سالاماتتى ۇلت» جانە «ءبىلىمدى ۇلت» جوبالارى دا قازىرگى احۋالعا جاۋاپ دەۋگە بولادى. پاندەميا كەزەڭى دەنساۋلىق ساقتاۋ جۇيەسى دە، قازاقستاندىقتاردىڭ ءوز دەنساۋلىعىنا دەگەن كوزقاراسى دا رەفورمانى قاجەت ەتەتىنىن كورسەتتى. ال مەكتەپ پەن ءبىلىم ۇلت دامۋىنىڭ نەگىزگى ماسەلەسى. بىزدە مەكتەپكە باراتىن بالالاردىڭ ۇلكەن تولقىنى قالىپتاسىپ وتىر. اينە، ولارعا مەكتەپتە جاقسى ءبىلىم بەرىلۋى كەرەك. ونسىز قوعامدى نەمەسە ەكونوميكانى دامىتۋعا باعىتتالعان كەز كەلگەن باعدارلامانىڭ ءمانى جوق.
«حالىق ۇنىنە قۇلاق اساتىن مەملەكەت» تۇجىرىمداماسى ۇلتتىق جوبالاردى ىسكە اسىرۋدا ماڭىزدى ءرول وينايتىنىن ايرىقشا ايتۋ كەرەك. ول قوعامداعى ساۋالداردىڭ ەڭ نەگىزگىلەرىن ىرىكتەپ شىعارىپ، ساياسات پەن رەفورماعا ەنۋىنە مۇمكىندىك بەردى. پرەزيدەنت بىلتىرعى جولداۋىندا «حالىق ۇنىنە قۇلاق اساتىن مەملەكەت» ادىلەتتى مەملەكەت قۇرۋدىڭ قۇرالى ەكەنىن ايتقانىن بىلەمىز. «حالىق ۇنىنە قۇلاق اساتىن مەملەكەت» قوعامى وسى ۇلتتىق جوبالاردىڭ ورىندالۋىن قاداعالاعان كەزدە ءوز ءرولىن اتقارادى. بۇل مەملەكەتتىك ورگاندارعا الدەقايدا ءتيىمدى ارەكەت ەتۋگە مۇمكىندىك بەرەدى»، - دەدى داۋرەن ابايەۆ.