قازاقستان وسىمدىك وسىرۋشىلەرىنىڭ العاشقى رەسپۋبليكالىق سلەتى ءوتتى

ۆەدومستۆونىڭ باسپا ءسوز قىزمەتى اتاپ وتكەندەي، شاراعا اۋىل شارۋاشىلىعى ءمينيسترى ەربول قاراشوكەيەۆ، پارلامەنت ءماجىلىسىنىڭ دەپۋتاتتارى، بيزنەس جانە ازاماتتىق قوعام وكىلدەرى قاتىستى.

ءوزىنىڭ قۇتتىقتاۋ سوزىندە ۆەدومستۆو باسشىسى اگراريلەردىڭ ەرەن ەڭبەگىنىڭ ارقاسىندا بۇگىندە 16 ميلليون توننا استىق پەن ءداندى-بۇرشاقتى داقىل جينالعانىن، بۇل ەلدى تولىق قامتاماسىز ەتۋگە، سونداي-اق ەكسپورت نارىعىنداعى ءوز پوزيتسيامىزدى ساقتاۋعا مۇمكىندىك بەرەتىنىن اتاپ ءوتتى.

قازاقستان - وڭىردەگى نەگىزگى ازىق-تۇلىك حابى، ءونىم جوعارى ساپالى جانە زور سۇرانىسقا يە.

«ءبىز بۇگىن سىزدەرگە قۇرمەت كورسەتىپ، ءوندىرىس وزاتتارىنىڭ سلەتتەرىن وتكىزۋدىڭ بۇرىنعى ءداستۇرىن جاڭعىرتامىز. وسى زاماناۋي كورمە كەشەنىندە «رۋحاني جاڭعىرۋ» باعدارلاماسى اياسىندا وسىمدىك شارۋاشىلىعىنىڭ وزىق ماماندارىنىڭ سلەتىن وتكىزىپ وتىرمىز. ءبىرىنشى سلەتتىڭ بۇكىل حالىق ءۇشىن مەرەيلى جىل - قازاقستان تاۋەلسىزدىگىنىڭ 30 جىلدىعىن مەرەكەلەۋ جىلىندا ءوتىپ جاتقانى قۋانىشتى»، - دەدى مينيستر.

پاندەميا ازىق-تۇلىك جۇيەلەرىنىڭ ماڭىزىن، ونىڭ باسىمدىعىن جانە ءوندىرىس كولەمىن ۇلعايتۋ قاجەتتىگىن ايقىن كورسەتتى.

ۇكىمەت اگروونەركاسىپتىك كەشەندى دامىتۋ جونىندەگى 2021-2025-جىلدارعا ارنالعان ۇلتتىق جوبانى قابىلدادى، ول - بۇكىل سالا ءۇشىن ستراتەگيالىق قۇجات.

«ۇلتتىق جوبانىڭ مىندەتتەرىنىڭ ءبىرى - ەڭبەك ونىمدىلىگىن 2,5 ەسە ارتتىرۋ. بۇل بويىنشا جۇمىس ىستەۋ كەرەك. ناتيجەسىندە ءار گەكتاردان تۇسەتىن تابىس تا ارتادى»، - دەدى ەربول قاراشوكەيەۆ.

جوبادا ساپالى تۇقىمداردى پايدالانۋ كولەمىن - ءوندىرىس نەگىزىن ۇلعايتۋ، مينەرالدى تىڭايتقىشتاردى ەنگىزۋ كولەمىن ۇلعايتۋ، سونداي-اق وسىمدىكتەردى ۋاقتىلى جانە تولىق قورعاۋ كوزدەلگەن.

ۇلتتىق جوبا اياسىندا بارلىق باعىتتار قارجىلاندىرۋدىڭ جەتكىلىكتى كولەمىمەن قامتاماسىز ەتىلگەن.

بيىل وتاندىق ءوندىرىس تەحنيكاسىن ساتىپ الۋ كەزىندە ينۆەستيتسيالىق سۋبسيديا %30 دەيىن ۇلعايتىلدى. وزدىگىنەن جۇرەتىن بۇرىككىشتەردى، جەمشوپ جينايتىن كومباينداردى، قىزىلشا جينايتىن تەحنيكانى ساتىپ الۋ كەزىندە، سونداي-اق كووپەراتيۆتەردىڭ تەحنيكانى ساتىپ الۋ كەزىندە %50 ينۆەستيتسيالىق سۋبسيديا قولدانىلادى.

سونداي-اق، شارا بارىسىندا ەربول قاراشوكەيەۆ ۆەدومستۆولىق ناگرادالارىن تابىستاپ، اگروونەركاسىپتىك كەشەننىڭ دامۋىنا ەلەۋلى ۇلەس قوسقان سالا وكىلدەرىن اۋىل شارۋاشىلىعى مينيسترلىگىنىڭ قۇرمەت گراموتالارىمەن ماراپاتتادى.

«حالىق ءوندىرىستىڭ باتىرلارى تۋرالى ءبىلۋى ءتيىس، سىزدەردىڭ ەڭبەكتەرىڭىزدىڭ ارقالارىڭىزدا ۇستەلدەرىمىزدە نان مەن باسقا دا ونىمدەر بار. مۇنداي سلەتتەر تەك ۇزدىك بولۋعا ىنتالاندىرىپ قويماي، سونىمەن قاتار اۋىل شارۋاشىلىعى قىزمەتكەرىنىڭ مارتەبەسىن دارىپتەيدى»، - دەپ قوستى ۆەدومستۆو باسشىسى.

ءسوز سوڭىندا ەربول قاراشوكەيەۆ جينالعانداردى كاسىبي مەرەكە - نان كۇنىمەن قۇتتىقتاپ، زور دەنساۋلىق پەن مول تابىس تىلەدى.