ايدا بالايەۆا جاستاردىڭ دامۋىنا قانداي جاعداي جاسالاتىنىن ايتتى

None
None
نۇر- سۇلتان. قازاقپارات - جاستارعا ساپالى جانە قولجەتىمدى ءبىلىم بەرۋ، جۇمىسقا ورنالاستىرۋ جانە تۇرعىن ۇيمەن قامتاماسىز ەتۋگە ەكپىن قويىلادى.

بۇل تۋرالى ورتالىق كوممۋنيكاتسيالار قىزمەتىندە «ۇلتتىق رۋحاني جاڭعىرۋ» ۇلتتىق جوباسىنىڭ ماقساتىن ءتۇسىندىرۋ كەزىندە قر اقپارات جانە قوعامدىق دامۋ ءمينيسترى ايدا بالايەۆا ايتتى، دەپ حابارلايدى قازاقپارات ءتىلشىسى.

«ءۇشىنشى باعىت - «تاۋەلسىزدىك ۇرپاقتارى» دەپ اتالدى جانە ەلىمىزدىڭ جاستارىنا ارنالادى. وزدەرىڭىز جاقسى بىلەسىزدەر، بيىل تاۋەلسىزدىكتىڭ العاشقى جىلدارىندا تۋعان بالالار 29-30 جاسقا كەلىپ جاتىر. ءسوز جوق، بۇل جاستار - ەگەمەن ەلدىڭ ءتول ۇرپاعى عانا ەمەس، بولاشاق ءۇمىتى، ەرتەڭگى يەسى بولىپ سانالادى. سوندىقتان ولاردى مەملەكەتتىك تۇرعىدان قولداپ، جاعداي جاساۋ - وسى جوبانىڭ نەگىزگى ماقساتتارىنىڭ ءبىرى. ول جاستاردىڭ رۋحاني كەمەلدەنىپ، كاسىبي جەتىلۋىن كوزدەيتىن ءۇش اۋقىمدى مىندەتتى قامتيدى»، - دەدى ا. بالايەۆا.

اتاپ ايتقاندا 2025 -جىلعا دەيىن:

- جاستاردىڭ بازالىق سۇرانىستارىن شەشۋ. ياعني، ساپالى جانە قولجەتىمدى ءبىلىم بەرۋ، جۇمىسقا ورنالاستىرۋ جانە تۇرعىن ۇيمەن قامتاماسىز ەتۋ؛

- جاستاردىڭ جان- جاقتى دامۋىنا قۇقىقتىق جاعدايلار جاساپ، رۋحاني- ادامگەرشىلىك جانە وتباسىلىق قۇندىلىقتارعا باۋلۋ؛

- جاستاردى قوعامدىق پايدالى ىستەرگە تارتىپ، باسەكەگە قابىلەتتى ۇرپاق تاربيەسىنە جاڭا مۇمكىندىكتەر اشۋ.

«بۇل ماسەلەلەردى شەشۋ ءۇشىن 15 ۇلكەن جوبا قولعا الىنىپ، ناتيجەسىندە 8 ناقتى كورسەتكىشكە جەتەتىن بولامىز»، - دەدى مينيستر.

ناتيجەسىندە، كەمىندە 800 مىڭ جاس تۇرعىن ءۇي جيناقتارى جۇيەسىن پايدالانا الادى، 1 ميلليونعا جۋىق جاس قازاقستاندىق الەۋمەتتىك قىزمەتتەرمەن قامتاماسىز ەتىلەدى، 1,5 ميلليونعا جۋىق جاستار سپورتتىق جانە ەكولوگيالىق جوبالارعا تارتىلاتىن بولادى.

بۇدان بۇرىن حابارلانعانداي، ا. بالايەۆا «ۇلتتىق رۋحاني جاڭعىرۋ» ۇلتتىق جوباسىنىڭ نەگىزگى ماقساتىن ايتتى. ۇلتتىق جوباداعى ەكىنشى باعىت«ەل رۋحى» دەپ اتالادى جانە مادەنيەت سالاسىندا قىزمەتتەردىڭ قولجەتىمدىگىن ارتتىرۋ بويىنشا ءىس- شارالار كەشەنىن قامتيدى. سونىمەن قاتار مينيستر مەملەكەتتىك تىلگە قوعامنىڭ سۇرانىسى ارتىپ كەلە جاتقانىن اتاپ ءوتتى.

اۆتور: رۋسلان عابباسوۆ

سوڭعى جاڭالىقتار