اۋىر اتلەتيكا قۇراماسىنىڭ باس باپكەرى باقىت احمەتوۆ قىزمەتىنەن بوساتىلدى
ق ر اۋىر اتلەتيكا فەدەراتسياسىنىڭ مالىمەتىنشە، بۇل شەشىم الماتى قالاسىندا ق ر مادەنيەت جانە سپورت ءمينيسترى اقتوتى رايىمقۇلوۆا مەن قازاقستاننىڭ اۋىر اتلەتيكا فەدەراتسياسى باسشىلىعىنىڭ ۇلتتىق قۇرامانىڭ جاتتىقتىرۋشىلار شتابىنا قاتىستى اتلەتتەر مەن جاتتىقتىرۋشىلاردان تۇسكەن شاعىمداردى قاراۋ قورىتىندىسى بويىنشا قابىلداندى.
«فەدەراتسيا ق ر ۇلتتىق وليمپيادا كوميتەتىمەن بىرلەسىپ الداعى اۋىر اتلەتيكادان قازاقستان رەسپۋبليكاسىنىڭ چەمپيوناتى كەزىندە ۇلتتىق قۇراما كومانداسىنىڭ جاتتىقتىرۋشىلار شتابىنا ۇمىتكەرلەردى ىرىكتەۋدى وسى ماقساتتار ءۇشىن ازىرلەنگەن كريتەرييلەر نەگىزىندە جۇرگىزۋگە نيەتتى»، - دەلىنگەن رەسمي حابارلامادا.
بۇعان دەيىن اۋىر اتلەت البەرت ليندەردىڭ ولىمىنەن كەيىن قازاقستان ەرلەر قۇراماسىنىڭ اعا باپكەرى سەرگەي سەدوۆ قىزمەتىنەن شەتتەتىلگەنى تۋرالى جازعان بولاتىنبىز. قازاقستاندىق زىلتەمىرشى البەرت ليندەر 26 جاسقا قاراعان شاعىندا قايتىس بولدى.
اۆتور: الما مۇقانوۆا