ءماجىلىس سىرتقى جارنامالاردى قازاق تىلىندە جازۋعا قاتىستى زاڭ جوباسىن ماقۇلدادى

زاڭ جوباسى 2021 -جىلعى 24-اقپاندا قازاقستان رەسپۋبليكاسى پارلامەنتى ءماجىلىسىنىڭ جالپى وتىرىسىندا ءبىرىنشى وقىلىمدا ماقۇلداندى.

«زاڭ جوباسىنىڭ ماقساتى - سىرتقى جارنامالار مەن ءارتۇرلى ماڭدايشالارداعى، باسقا دا رەكۆيزيستتەر مەن كورنەكى اقپاراتتاردىڭ مەملەكەتتىك تىلدە دۇرىس جازىلۋى جانە ماتىندەردىڭ ءتۇپنۇسقالى اۋدارماسى بويىنشا قوسىمشا تالاپتاردى بەلگىلەۋ. سايلاۋشىلار ءجيى كوتەرەتىن تاقىرىپتاردىڭ ءبىرى - وسى كورنەكى اقپاراتتاعى قازاق تىلىندەگى جازىلاتىن ءماتىننىڭ ساۋاتسىزدىعى، كەيبىر جاعدايدا ءتىپتى قازاق تىلىندە ءماتىننىڭ بولماۋى. وسىعان بايلانىستى ناقتى تالاپتار ەنگىزىلدى»، - دەدى ءماجىلىس دەپۋتاتى بەرىك ءابدىعالي ۇلى.

زاڭ جوباسىمەن جۇمىس ىستەۋ بارىسىندا دەپۋتاتتار:

- اكىمشىلىك- اۋماقتىق بىرلىكتەردىڭ، ەلدى مەكەندەردىڭ قۇرامداس بولىكتەرىنىڭ، سونداي-اق باسقا دا گەوگرافيالىق وبەكتىلەردىڭ ءداستۇرلى تاريحي قالىپتاسقان قازاق اتاۋلارىن مەملەكەتتىك تىلدە جازۋعا؛

- مەملەكەتتىك ەمەس ۇيىمداردىڭ بلانكىلەرى مەن ماڭدايشالارىن مەملەكەتتىك تىلدە، قاجەت بولعان كەزدە عانا ورىس جانە (نەمەسە) باسقا دا تىلدەردە جازۋعا؛

- جول بەلگىلەرىندەگى جازبانى مەملەكەتتىك تىلدە جازۋعا؛

- حابارلاندىرۋلاردى، جارنامانى، پرەيسكۋرانتتاردى، باعا كورسەتكىشتەرىن، اس ءمازىرىن، نۇسقاعىشتار مەن باسقا دا كورنەكى اقپاراتتى مەملەكەتتىك تىلدە، قاجەت بولعان كەزدە ورىس نەمەسە باسقا دا تىلدەردە ورنالاستىرۋعا باعىتتالعان تۇزەتۋلەر ەنگىزدى.

«بۇل تۇزەتۋلەر قوعامدا، بۇقارالىق اقپارات قۇرالدارىندا، الەۋمەتتىك جەلىلەردە ءجيى كوتەرىلىپ جۇرگەن قازاق ءتىلىنىڭ مارتەبەسى ماسەلەلەرىن شەشۋگە ءبىر قادام جاقىنداتادى. وسى ۇسىنىستار ءاربىر ازاماتتىڭ، اسىرەسە، كاسىپكەرلەردىڭ جاۋاپكەرشىلىگىن كۇشەيتۋگە مۇمكىندىك بەرەدى دەپ سانايمىز»، - دەدى دەپۋتات.

بۇدان باسقا، ءدىن سالاسىنداعى زاڭنامانى جەتىلدىرۋدى كوزدەيتىن نورمالار ەنگىزىلدى.

«ءدىني قىزمەتتى رەگلامەنتتەيتىن ۇسىنىستاردىڭ ەنگىزىلۋىنە بايلانىستى زاڭ جوباسىنىڭ تاقىرىبىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» دەپ وزگەرتۋ بويىنشا تۇزەتۋ ەنگىزىلدى. جۇمىس توبىنىڭ 13 وتىرىسى جانە كوميتەتتىڭ كەڭەيتىلگەن ەكى وتىرىسى وتكىزىلدى. سالىستىرمالى كەستە قابىلدانعان 54 پوزيتسيادان تۇرادى. دەپۋتاتتاردىڭ ۇسىنىستارىن قاراۋ قورىتىندىسى بويىنشا زاڭ جوباسىندا قازاقستان رەسپۋبليكاسىنىڭ 1-كودەكسىنە جانە 16-زاڭىنا تۇزەتۋلەر ەنگىزۋ كوزدەلگەن»، - دەدى بەرىك ءابدىعالي ۇلى.

اۆتور: رۋسلان عابباسوۆ