كۇزدە تۇماۋدان ساقتانۋ ادىستەرى

باتىستا تاعامداردىڭ تۇماۋمەن سىرقاتتانعاندا تيگىزەر پايداسى جونىندە ارنايى زەرتتەۋ جۇمىستارى جۇرگىزىلدى. ولاردىڭ ناتيجەسى مىناداي.

تاۋىق سورپاسى

تۇماۋمەن سىرقاتتانعان كەزدەتاۋىق سورپاسىن ىشۋگە بايلانىستى ەكى زەرتتەۋ جۇمىسى بەلگىلى. ولاردىڭ ءبىرىن فلوريداداعى ماۋنت- سيناي اۋرۋحاناسىنىڭ دارىگەرلەرى جۇرگىزگەن. ولار تاۋىق سورپاسىنىڭ ەمدىك اسەرىن قۇرامىنداعى ەكى قوسپامەن بايلانىستىرادى.

ءبىرىنشىسى - سيستين امينقىشقىلدارى. ولار - تاۋىق ەتىنىڭ قۇرامىندا كوپ. ەكىنشىسى - سورپاعا مىندەتتى تۇردە قوسىلاتىن بۇرىشتىڭ قۇرامىندا كەزدەسەتىن كاپسايسين. ونىڭ ەمدىك اسەرىن نەبراسكا ۋنيۆەرسيتەتىندەگى مەديتسينالىق ورتالىق دارىگەرلەرى دە زەرتتەۋ جۇمىسىنڭ ناتيجەسىندە انىقتادى.

ولاردىڭ پىكىرىنشە، تاۋىق سورپاسىنىڭ قۇرامىندا يممۋنيتەتكە وڭ ىقپال ەتەتىن قوسپالار بار. ودان بولەك تاماق اۋرۋى مەن جوتەلدى باساتىن، ادامنىڭ حال- احۋالىن جاقسارتاتىن زاتتار دا كەزدەسەدى. عىلىمدار مىنا زاتتاردان تاۋىق سورپاسىن جاساۋعا كەڭەس بەرەدى: تاۋىق ەتى، پياز، كارتوپ، شالقان، بوتتاشىق، بالدىركوك پەن اقجەلكەن. سونىمەن قاتار ولار سورپاعا تۇز قوسپاۋعا بولاتىنىن ايتادى. تۇزدى تاعام تۇماۋ بەلگىلەرىنىڭ كۇشەيۋىنە الىپ كەلەدى.

كۇزدە تۇماۋدان ساقتانۋ ادىستەرى

جازدىڭ ىستىق كۇندەرىنەن جاقسى ەستەلىكتەر عانا قالدى. كۇز مەزگىلىندە دەپرەسسيا، تۇماۋ جانە السىزدىك بولماس ءۇشىن بىرنەشە ەرەجەنى ساقتاڭىز.

اۋا رايىنا ساي كيىنۋ

كۇزدە ەڭ ءجيى تارايتىن اۋرۋ – ج ر ا (جەدەل رەسپيراتورلى اۋرۋلار)، كۇندەلىكتى تۇرمىستا - تۇماۋ. ادەتتە ادام توڭسا نەمەسە ىستىقتاسا، يممۋنيتەت السىرەپ، اعزادا ۆيرۋستار كوبەيە باستايدى. كۇزدە اۋا رايى تۇراقسىز: تاڭەرتەڭ كۇن سۋىق، كۇندىز ىستىق، ال كەشكىسىن جاڭبىر جاۋىپ كەتۋى ابدەن مۇمكىن. كيىپ شىققان كيىمىڭىزبەن توڭىپ نەمەسە ىستىقتاپ جۇرمەس ءۇشىن قاباتتاپ كيىنۋدى ۇسىنامىز. مىسالى، جۇقا جەيدە، سودان سوڭ جيلەت، ال ونىڭ سىرتىنان جەڭىل كۇرتكە كيىپ الىڭىز. كۇن ىستىقتاي باستاعاندا كۇرتكەڭىزدى شەشىپ تاستايسىز، ال جيلەت كەۋدەڭىزدى كولەڭكەنىڭ سالقىن جەلىنەن قورعايدى.

دۇرىس تاماقتانۋ

ادام كۇزدە ارتىق سالماق قوسۋعا بەيىم كەلەدى. سوندىقتان ۋاقىتىندا تاماقتانۋ ماڭىزدى. از- ازدان، ءبىراق كۇنىنە 5-6 رەت تاماقتانعان ءجون. ال كەيىنگى تاماقتى ۇيىقتاۋعا 3 ساعات قالعاندا جەپ العان دۇرىس. ارتىق تاماقتانىپ قويماس ءۇشىن بىردەڭە جەر الدىندا ءبىر ستاقان سۋ ءىشىپ الىڭىز جانە تاماقتى كىشكەنتاي تارەلكەگە سالىپ جەڭىز. دۇرىس تاماقتانۋ دەنساۋلىققا تىكەلەي اسەر بەرەتىنىن ۇمىتپايىق. سوندىقتان تاماقتىڭ مولشەرىنە ەمەس، ساپاسىنا اسا ءمان بەرگەن دۇرىس. كوكونىستەر مەن جەمىستەردى كوبىرەك جەۋ كەرەك. شيكى كوكونىستەر اعزانى قاجەتتى دارۋمەندەرمەن قامتىپ قانا قويماي، ونى جىلدام تويدىرادى. اعزا دارۋمەندەردى كوپ ەتىپ جينامايدى، كەرىسىنشە، جىلدام جۇمساپ تاستايدى. سوندىقتان دا كوكونىستەر مەن جەمىستەر جىل مەرزىمىنە قاراماستان كۇندەلىكتى مازىردە بولۋى ءتيىس.

سونىمەن قاتار كۇزدە داستارحاندا مىندەتتى تۇردە ءسۇت قىشقىلدى ونىمدەر - مىسالى، ايران، يوگۋرت، سۇزبە بولۋى كەرەك. ولار ىشەكتەر ميكروفلوراسىن قالىپقا كەلتىرىپ، يممۋندى جۇيەنى نىعايتۋعا كومەكتەسەتىن پايدالى باكتەريالار - پروبيوتيكتەرگە تولى.

قازىر قاتاڭ ديەتا ۇستايتىن ۋاقىت ەمەس. تاماقتىڭ ءتۇرلى ءارى ءدامدى بولۋى ماڭىزدى.

فيزيكالىق جاتتىعۋ جاساۋ

دارىگەرلەردىڭ ايتۋىنشا، دەنساۋلىعى جاقسى ادام كۇنىنە 10 كيلومەتر ءجۇرۋ كەرەك. بۇل دەگەنىمىز، جاياۋ ءجۇرىس كۇنىنە شامامەن 3 ساعات ۋاقىتتى الۋى كەرەك. ءۇيدىڭ جانە كەڭسەنىڭ ىشىندەگى جۇرىسكە، ايالداما نەمەسە دۇكەنگە دەيىنگى جۇرىسكە جانە باسقا دا شارۋالارمەن جۇرۋگە 2 ساعاتتاي ۋاقىت كەتتى دەسەك، قالعان 1 ساعاتتى كەشكى استان سوڭ بەلسەندى سەرۋەنگە ارناعان ءجون. قوزعالىس - اعزانىڭ جاڭا مەرزىمگە بەيىمدەلۋىن جەڭىلدەتەتىن ءادىس.

بيولوگيالىق بەلسەندى قوسپالار ءىشۋ

ءقازىر يممۋنيتەتتى نىعايتۋعا كومەكتەسەتىن بيلوگيالىق بەلسەندى قوسپالاردىڭ ءتۇر- ءتۇرى بار. ءبىراق ونىڭ اتاۋى ايتىپ تۇرعانداي ولاردى تەك نەگىزگى تاماققا قوسىمشا رەتىندە عانا قولدانۋ كەرەك. ۇنەمى زياندى ونىمدەر جەسەڭىز، مۇنداي قوسپا ىشكەننەن اعزاعا ەشقانداي پايدا بولمايدى. سوندىقتان ەڭ الدىمەن تاماقتانۋ ءمازىرىڭىزدى دۇرىستاپ العان ءجون. كەز كەلگەن قوسپا نەمەسە ءدارى ءىشۋدىڭ الدىندا دارىگەرمەن كەڭەسۋدى ۇسىنامىز. سونداي-اق ءدارىحانالاردا ءتۇرلى پايدالى شوپتەر ساتىلادى. ولاردان ءدامدى ءارى پايدالى شايلار نەمەسە قايناتپالار دايىنداۋعا بولادى.

تولىققاندى دەمالۋ

كۇزدە اعزا تولىققاندى دەمالۋ كەرەك. تۇندە 8-10 ساعات ۇيىقتاعان ءجون. ۇيىقتار الدىندا بولمەنى جاقسىلاپ جەلدەتىپ الۋدى ۇمىتپاڭىز. ۇيقى ساپالى بولۋى ءۇشىن ماتراس پەن جاستىقتىڭ ىڭعايلى بولۋى دا ماڭىزدى. ماماندار كۇزدە جازعا قاراعاندا 1-2 ساعاتقا ارتىق ۇيىقتاۋدى ۇسىنادى.

قورعانۋ

ادام كوپ جينالاتىن جەرگە ءجيى بارماۋدى ۇسىنامىز. وتباسىلىق دەمالىستى كوبىرەك تابيعات اياسىندا نەمەسە ساياباقتا وتكىزىڭىز. قوعامدىق ورىنداردا ماسكا تاعىپ، قولدى سابىنمەن ءجيى جۋىڭىز. كەشكىسىن ۇيگە كەلگەن سوڭ مۇرىن مەن اۋىزدى تۇزدى سۋمەن نەمەسە ءشوپ (مىسالى، تۇيمەداق) تۇنباسىمەن شايۋ ارتىق ەتپەيدى.