تۇركى الەمىنىڭ حالىقارالىق ارەناداعى ءرولىن كۇشەيتۋگە ءتيىسپىز - قاسىم-جومارت توقايەۆ

None
None
نۇر-سۇلتان. قازاقپارات - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ تۇركىتىلدەس ەلدەر پارلامەنتتىك اسسامبلەياسىنىڭ X پلەنارلىق وتىرىسىنىڭ قاتىسۋشىلارىنا قۇتتىقتاۋ حات جولدادى، دەپ حابارلايدى قازاقپارات.

قۇتتىقتاۋ حاتتى جينالعاندار الدىندا ءماجىلىس ءتوراعاسى نۇرلان نىعماتۋلين وقىپ بەردى.

- قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆتىڭ باستاماسىمەن قۇرىلعان تۇركپا باۋىرلاس ەلدەردىڭ بىرلىگىن بەكەمدەيتىن بەدەلدى ۇيىم. مەرەيتويلىق باسقوسۋدىڭ قاسيەتتى تۇركىستان قالاسىندا ءوتۋىنىڭ زور سيمۆولدىق ءمانى بار. تۇركى دۇنيەسىنىڭ رۋحاني استاناسىندا ءوتىپ جاتقان القالى جيىن تامىرلاس حالىقتاردى ورتاق مۇددەگە جۇمىلدىرادى. ءبىزدىڭ ەلدەرىمىز الدىنا زور ماقساتتار قويىپ وتىر. جاڭا سىن-قاتەرلەرگە توتەپ بەرەمىز دەسەك، ءوزارا ىنتىماقتاستىقتى بارىنشا نىعايتا ءتۇسۋىمىز قاجەت. ارىپتەستەرىمىزدىڭ الەۋەتىن ارتتىرىپ، تۇركى الەمىنىڭ حالىقارالىق ارەناداعى ءرولىن كۇشەيتۋگە ءتيىسپىز، - دەپ جازىلعان مەملەكەت باسشىسىنىڭ قۇتتىقتاۋ حاتىندا.

قاسىم-جومارت توقايەۆ وسى رەتتە جاھاندىق جانە وڭىرلىك تۇيتكىلدەرگە بايلانىستى ۇستانىمىمىز ءبىر بولۋى ايرىقشا ماڭىزدى ەكەنىن اتاپ ءوتتى.

- بۇل جۇمىستا تۇرك پ ا-نىڭ الاتىن ورنى ەرەكشە. ءبىزدىڭ پارلامەنتتەرىمىز ءاربىر ماسەلەگە تۇركى جۇرتىنىڭ تۇتاستىعى تۇرعىسىنان قاراۋى كەرەك. بۇگىنگى باسقوسۋدا وسى باعىتتا ساليقالى ويلار ايتىلىپ، تىڭ باستامالار كوتەرىلەدى دەپ سەنەمىن! - دەدى مەملەكەت باسشىسى.

وسى ورايدا، ق. توقايەۆ پلەنارلىق وتىرىسقا قاتىسۋشىلارعا ساتتىلىك تىلەپ، تۇركى حالىقتارى بىرلىگىنىڭ ارتا بەرۋىنە نيەتتەستىك ءبىلدىردى.

سوڭعى جاڭالىقتار