ەلىمىزدە مامانداردى قايتا دايارلاۋ ءجۇرىپ جاتىر - ەڭبەك ءمينيسترى
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ءمالىم ەتتى، دەپ حابارلايدى قازاقپارات ءتىلشىسى.
«وتكەن جىلى ءبىزدىڭ مينيسترلىك جاڭا كاسىپتەر اتلاسىن ازىرلەپ، بارلىق ماماندىقتار بويىنشا تالداۋ جاسالدى. سيفرلاندىرۋعا كوشۋ ءبىر جاعىنان كەيبىر مامان يەلەرىنە سۇرانىستى ازايتسا، ەكىنشى جاعىنان زاماۋاني ماماندىقتار پايدا بولىپ، جاڭا جۇمىس ورىندارى اشىلىپ جاتىر. ماماندىقتار بويىنشا تالداۋ ناتيجەسى كورسەتكەندەي، جاقىن ارادا 239 جاڭا ماماندىق پايدا بولىپ، 95 ماماندىق قايتا وزگەرەدى جانە 129 ماماندىق جويىلادى ەكەن»، - دەدى سەرىك شاپكەنوۆ ۇكىمەت ۇيىندە ونلاين وتكەن باسپا ءسوز ءماسليحاتىندا.
ءمينيستردىڭ مالىمەتىنشە، بۇگىندە ەلىمىزدە زاماناۋي ماماندىقتاردى يگەرۋ مەن كەيبىر مامان يەلەرىن قايتا دايارلاۋعا قاتىستى شارالار قولعا الىندى.
«قازىر «ەڭبەك» پلاتفورماسىندا مامانداردى قايتا دايارلاۋ، ونلاين وقىتۋ ءجۇرىپ جاتىر. سونداي- اق، ولاردى بەيىمدەۋ وفلاين فورماتتا دا جۇزەگە اسىرىلۋدا. وسى ورايدا ايتىپ وتەتىن ءبىر جايت، ماماندىق مۇلدەم جويىلىپ كەتپەيدى، تەك زامان تالابىنا ساي بەيىمدەلۋى ءتيىس. سول ءۇشىن دە ءبىز وتاندىق مامانداردى قايتا وقىتىپ جاتىرمىز»، - دەيدى ول.
بۇعان دەيىن ۆەدومستۆو باسشىسى كەپىلدەندىرىلگەن الەۋمەتتىك پاكەت اياسىندا از قامتىلعان وتباسىلارعا بەرىلەتىن ازىق- تۇلىكتىڭ ساپاسىنا قاتىستى سىنعا جاۋاپ بەردى. ودان بولەك، سەرىك شاپكەنوۆ قازاقستاندا بالا سانىنا قاراماي تەڭدەي جاردەماقى بەرۋ ماسەلەسىنە قاتىستى پىكىر ءبىلدىردى.
ونىڭ ايتۋىنشا، بۇگىندە ەلىمىزدە انا مەن بالانى قورعاۋ باعىتىندا ءبىرقاتار كەشەندى شارالار قاراستىرىلعان.