شارۋالار ءوز ونىمدەرىن ەگىن باسىنان ساتۋعا ءماجبۇر - قاسىم-جومارت توقايەۆ
كەڭەستە بۇل ماسەلە بويىنشا ساۋدا جانە ينتەگراتسيا ءمينيسترى باقىت سۇلتانوۆ بايانداما جاسادى.
پرەزيدەنت ەلدە ءوندىرىس بار بولعانىمەن، ونى ۇيىمداستىرۋ، الىنعان ءونىمدى ساقتاۋ جانە وتكىزۋ جۇيەسى دۇرىس جولعا قويىلماعانىن اتادى.
ونىڭ دالەلەى رەتىندە بيىل ازىق-تۇلىك باعاسىنىڭ قۇبىلۋى بەكىتىلگەن مەجەدەن الشاقتاپ كەتكەنىن اتادى.
«شۇعىل شارالار، باعاعا قويىلعان باقىلاۋ نارىقتىق ەكونوميكانىڭ ىرگەلى قاعيداتتارىن الماستىرا المايتىنى بەلگىلى. جۇيەلى شارالار كەرەك. سوندىقتان ۇلتتىق تاۋار وتكىزۋ جۇيەسىن قالىپتاستىرۋ اتالعان جۇمىستىڭ ماڭىزدى قۇراۋشى بولىگى بولىپ تابىلادى. كوتەرمە-تاراتۋ ورتالىقتارى جانە ولاردىڭ ستاندارتتاۋ، تاۋاردىڭ تۇراقتى جەتكىزىلۋىن قامتاماسىز ەتۋ جونىندەگى جۇمىستارى وندىرۋشىلەردىڭ، سونىڭ ىشىندە شاعىن بيزنەس وكىلدەرى كووپەراتسياسىنىڭ ماڭىزدى ەلەمەنتتەرىنىڭ ءبىرى بولۋعا ءتيىس»، - دەگەن مەملەكەت باسشىسى باعانى رەتتەۋ شارالارى اۋىلداعى جەكە قوسالقى شارۋاشىلىقپەن اينالىساتىن ادامدارعا كەسىرىن تيگىزبەۋى كەرەكتىگىن ەسكەرتتى.
«بۇگىندە مۇنداي كاسىپ يەلەرىن ەكونوميكالىق اينالىمعا تارتۋ جۇمىستارى ماردىمسىز جۇرگىزىلۋدە. سونىمەن قاتار ولار ءوز ونىمدەرىن ەگىن باسىنان ساتۋعا ءماجبۇر بولىپ وتىر. كوتەرمە-تاراتۋ ورتالىقتارىنىڭ تاعى ءبىر مىندەتى - «ەگىس باسىنان سورەگە» دەيىنگى جولداعى قاجەتسىز دەلدالداردى جويۋ. حالىق ءۇشىن ازىق-تۇلىكتىڭ قولجەتىمدى باعادا بولۋىن ءىس جۇزىندە رەتكە كەلتىرۋ قاجەت»، - دەدى قاسىم-جومارت توقايەۆ.