ەردوعان: تۇركيا ەندى بوسقىنداردى قابىلداي المايدى

ارگەنتينادا جۇزدەگەن ادام بيلىككە شاعىمدانىپ، شەرۋگە شىقتى. ولار قانداي تالاپ قويدى؟

تۇركيا بۇدان بىلاي بوسقىنداردى قابىلداي المايدى. بىرىككەن ۇلتتار ۇيىمى باس اسسامبلەياسىنىڭ مىنبەرىنەن سويلەگەن رەجەپ تايىپ ەردوعان وسىلاي دەدى. تۇركيا پرەزيدەنتى اۋعانستان تاعدىرىنا بەي- جاي قاراپ وتىرمايتىنىن ايتىپ، وسى ەلدىڭ حالقىنا ءوز قولداۋىن ءبىلدىردى. تۇرىك باسشىسىنىڭ ايتۋىنشا، الەمدىك قاۋىمداستىق 1951 -جىلعى جەنيەۆا كونۆەنتسياسى مەن حالىقارالىق گۋمانيتارلىق قۇقىقتى بۇزىپ، كومەككە مۇقتاج ازاماتتاردى قابىلداۋدان باس تارتاتىنداردى قاتاڭ ايىپتاۋى كەرەك.

رەجەپ تايىپ ەردوعان، تۇركيا پرەزيدەنتى:

- اۋعانستانداعى احۋالعا بايلانىستى بىزدە وسى ەلدەن اعىلعان بوسقىندار لەگىنە قاتىستى ماسەلەلەر بار. سيريا داعدارىسى كەزىندە مىڭداعان ادامنىڭ ءومىرىن قۇتقارعان ەل رەتىندە ءبىز ەندى ميگراتسيانىڭ تاعى ءبىر تولقىنىنا توتەپ بەرە المايمىز. سوندىقتان مۇددەلى تاراپتار ءۇشىن وسى ىستە جاۋاپكەرشىلىك تانىتاتىن كەز كەلدى.

***

ب ۇ ۇ: ۆاكتسينالاۋ ءىسىنىڭ جاھاندىق جوسپارىن ازىرلەۋ قاجەت

الەمدە ۆاكسينانىڭ تاراتىلۋى توڭىرەگىندەگى ادىلەتسىزدىك جويىلۋى ءتيىس. بىرىككەن ۇلتتار ۇيىمىنىڭ باس حاتشىسى الەم ەلدەرىنە وسىنداي ۇندەۋ تاستادى. ول ءۇشىن انتونيۋ گۋتەرريش ۆاكتسينالاۋ ءىسىنىڭ جاھاندىق جوسپارىن ازىرلەۋدى ۇسىندى. ال ونىڭ ىسكە اسىرىلۋىن دۇنيەجۇزىلىك دەنساۋلىق ساقتاۋ ۇيىمى، ۆاكسينا وندىرۋشىلەر، حالىقارالىق قارجى ينستيتۋتتارى مەن فارماتسيەۆتيكالىق كومپانيالاردان قۇرالعان توپ قاداعالاۋى كەرەك. انتونيۋ گۋتەرريش، ب ۇ ۇ باس حاتشىسى:

- داۋلەتتى مەملەكەتتەردىڭ باسىم بولىگىندە تۇرعىندار ۆاكسينا سالدىرعان. ال افريكا حالقىنىڭ %90- ءى ءالى كۇنگە دەيىن كوۆيدكە قارسى پرەپاراتتىڭ ءبىرىنشى دوزاسىن دا الماعان. بۇل اقىلعا قونىمسىز.

***

اۆستراليادا قۋاتى 6 باللدىق جەر سىلكىنىسى بولدى اۆستراليانىڭ مەلبۋرن قالاسى ماڭىندا قۋاتى 6 باللدىق جەر سىلكىنىسى بولدى. سالدارىنان بىرنەشە عيمارات ءبۇلىنىپ، ەلەكتر جەلىلەرى ۇزىلگەن. زارداپ شەككەن ادامدار جوق. تەربەلىس وشاعى 10 شاقىرىم تەرەڭدىكتە بولعان.

سەيسمولوگتاردىڭ ايتۋىنشا، بۇل ۆيكتوريا شتاتى اۋماعىندا تىركەلگەن ەڭ قۋاتتى ءزىلزالا.

تيم ۆيبۋش، ۆيكتوريا شتاتى توتەنشە جاعدايلار قىزمەتىنىڭ باسشىسى:

- بۇگىن تاڭعى ساعات 9:15-تە ۆيكتوريا شتاتىندا قۋاتى 5,9 بالل جەر سىلكىنىسى بولدى. سالدارىنان بىرنەشە نىسانعا زاقىم كەلدى. ءبىراق جاراقات العان ازاماتتار جوق. ءبىزدىڭ بولجامىمىز بويىنشا الداعى كۇندەرى دە ايماقتا ءزىلزالا تىركەلۋى مۇمكىن.

***

بۋەنوس- ايرەستە جۇزدەگەن ادام كەدەيشىلىككە قارسى شەرۋگە شىقتى

بۋەنوس- ايرەستە جۇزدەگەن ادام شەرۋگە شىقتى. پرەزيدەنت سارايى الدىنا جينالعان حالىق جۇمىستىڭ جوقتىعىنا نارازى. وسىعان بايلانىستى تۇرعىندار جەرگىلىكتى بيلىكتەن جاڭا جۇمىس ورىندارىن اشىپ، الەۋمەتتىك كومەك كورسەتۋدى تالاپ ەتتى. ويتكەنى ەل تۇرعىندارىنىڭ %42 ءى كەدەي. ال ەكى قولعا ءبىر كۇرەك تابا الماي جۇرگەندەردىڭ قاتارى كۇننەن كۇنگە ارتىپ بارادى. بۇل مەملەكەتتە ەكونوميكالىق داعدارىس پاندەميادان دا كۇشەيدى. جىلدىق ينفلياتسيا %50 كە جەتەدى. ال ەلدىڭ حالىقارالىق ۆاليۋتا قورى الدىنداعى بەرەشەگى 45 ميلليارد دوللاردى قۇرايدى.

www.24.kz