بەرەل جادىگەرلەرى ۇلى بريتانيادا تانىستىرىلادى

قازاقستان تاۋەلسىزدىگىنىڭ 30 جىلدىعى اياسىندا شىعىس قازاقستان وبلىسىنىڭ اكىمدىگى ۇلىبريتانيانىڭ كەمبريدج ۋنيۆەرسيتەتىنىڭ Fitzwilliam مۋزەيىندە «ۇلى دالا التىنى» حالىقارالىق كورمەسىن ۇيىمداستىرماق، كورمەنىڭ اشىلۋ سالتاناتى 28-قىركۇيەكتە وتەدى دەپ جوسپارلانىپ وتىر.

مادەني شارا قازاقستاننىڭ كوپ عاسىرلىق تاريحى مەن باي مادەنيەتى، عالىمداردىڭ عىلىمي ىزدەنىستەرىنىڭ جاڭا ناتيجەسىمەن تانىستىرۋعا مۇمكىندىك بەرەدى. وسىعان وراي قازاقستان ارحەولوگياسى جەتىستىكتەرى «Gold of Kazakhstan» ەكسپوزيتسياسىندا كورسەتىلەدى، مۇندا بەرەل قورعاندارىنان تابىلعان قاڭقالار، كيىزدەن جانە ماتادان جاسالعان جىلقى ابزەلدەرى كورەرمەندەر نازارىنا ۇسىنىلادى.

«زەرتتەۋشى زەينوللا ساماشيەۆ 1998 -جىلى قورعاننىڭ «پاتشا قورىمى» كەزەڭىن زەرتتەۋ بارىسىندا №11 نىساننان التىنمەن اپتالعان 13 ات جانە سول زاماننىڭ كوسەمى بولعان بەكزادا مەن ايەلدىڭ سۇيەگىن تاپقان. «بەرەل جىلقىلارى» دەگەن اتاۋمەن بەلگىلى بۇل جىلقىلار تاريحىمىزدىڭ جاۋھار جادىگەرلەرىنىڭ بىرەگەيىنە اينالعان. سونداي- اق، ەرەكشە قۇرىلىم مەن جەرلەۋ ءراسىمى №36- وبادا تىركەلگەن بولاتىن. باسقا جەردە كەزدەسپەيتىن بۇلان تەكتەس سۇيەكتەن جاسالعان جىلقىنىڭ اشەكەيى. بۇل اشەكەيدىڭ قۇندىلىعى دا التىنمەن بىردەي. مۇنداي ۇلگىلەر التاي ءوڭىرىنىڭ باسقا جەرلەرىندە كەزدەسپەيدى»، - دەدى «بەرەل» مەملەكەتتىك تاريحي- مادەني قورىق- مۋزەيى ديرەكتورىنىڭ مىندەتىن اتقارۋشى الماس سارباسوۆ.