داۋلەسكەر كۇيشى كامال ماقاي ۇلى ومىردەن وزدى - شەتەلدەگى قازاقشا ب ا ق- قا شولۋ

داۋلەسكەر كۇيشى كامال ماقاي ۇلى ومىردەن وزدى - CNR

قىتاي ەلىندە تۇراتىن قانداسىمىز، داۋلەسكەر كۇيشى، قىتاي مۋزىكانتتار قوعامىنىڭ مۇشەسى كامال ماقاي ۇلى ومىردەن وزدى، دەپ جازادى قىتايلىق kazakcnr.com سايتى.

اتالعان ب ا ق- تىڭ جازۋىنشا، شىڭجاڭ قازاقتارىنىڭ قازىنالى كۇي ونەرىن ناسيحاتتاپ جۇرگەن، كونەنىڭ كوزى، ەكى عاسىردىڭ كۋاگەرى بولعان، اسا قادىرلى ابىز قارت، داۋلەسكەر كۇيشى، ءاشىم تانۋشى كامال ماقاي ۇلى 98 جاسىندا ومىردەن وزعان. كامال ماقاي ۇلى 1924 -جىلى ق ح ر- دىڭ ىلە ايماعى توعىزتاراۋ اۋدانىندا تۋعان.

«دارىندى كۇيشى، ساڭلاق سازگەر كامال ماقاي ۇلى - XX عاسىردىڭ 40- جىلدارىنان باستاپ ونەر الامانىنا ات باسىن بۇرىپ، تۋعان ەلى، وسكەن ورتاسىن كۇيمەن كۇمبىرلەتىپ، انمەن الديلەپ، حالىقتىڭ قوشامەتىنە، القاۋىنا بولەنگەن. كامال ۇلتىمىزدىڭ كونە كۇي مۇرالارىن جيناپ، بۇگىنگى ۇرپاققا اماناتتاپ جەتكىزگەن، حالىق مۇراسىنىڭ مۇڭىن ەرتە تانىعان تۇعىرى بولەك تۇلعا. ونەر جولىنداعى ەڭبەگى اۋەلى ۇستازى ءاشىم دۇڭشە ۇلىنىڭ ارتىنا قالدىرعان مول مۇرالارىن حالىققا قاز- قالپىندا جەتكىزۋ جولىندا ەڭبەكتەنگەن. كامال ماقاي ۇلى ءاشىم كۇيلەرىنەن «كۇي كۇمبىرى» ، «التىن بارماق»، «ءاشىم كۇيلەرىنەن تاڭدامالىلار» اتتى كىتاپتاردى باسپادان شىعاردى. سونداي- اق، كونەنىڭ كوزىندەي، تاريحتىڭ وزىندەي بولعان ساليقالى دومبىراشى تەلەارنالار مەن راديونىڭ التىن قورىنا 200 دەن استام حالىق كۇيى مەن كۇي اڭىزدارىن ۇسىنىپ، ونەردىڭ ۇزىلمەيتىن سارا جولىن سالدى»، - دەپ جازادى CNR سايتى.

كامال ماقاي ۇلىنىڭ ەڭبەگى قىتاي قازاقتارىنىڭ اراسىندا عانا تانىلىپ قويماي، قازاقستاننىڭ «مادەني مۇرا» مەملەكەتتىك باعدارلاماسى شەڭبەرىندە جارىق كورگەن «قازاقتىڭ ءداستۇرلى 1000 كۇيى» اتتى دومبىرا كۇيلەرى انتولوگياسىنا دا ەنگەن. وندا كامالدىڭ ورىنداۋىنداعى ءاشىمىنىڭ «المالى» ، «كەڭەس» سەكىلدى 20-عا جۋىق كۇيى، ال كامال ماقاي ۇلىنىڭ ءوز تۋىندىلارىنان «جايلاۋ دۋمانى» سياقتى ون شاقتى كۇيى ەنىپ، ەسىمى تاريح پاراعىنا جازىلعان. ابىز كۇيشى قازىرگە دەيىن «مەنىڭ دومبىرام»، «كوركەم تيان- شان»، «جاسىل القاپ»، «جايلاۋ دۋمانى» سەكىلدى 30 دان استام كۇي شىعارعان.

ك. ماقاي ۇلى - قىتاي مۋزىكانتتار قوعامىنىڭ مۇشەسى، شىڭجاڭ مۋزىكانتتار قوعامى ءتوراعاسىنىڭ ورىنباسارى، ش ۇ ا ر ادەبيەت- كوركەمونەر قوعامىنىڭ مۇشەسى، قىتاي حالىق اندەرىن باسپادان شىعارۋ رەداكتسياسىنىڭ القا مۇشەسى بولعان. وسى جىلى مامىر ايىندا كۇيشىنىڭ ونەگەلى ءومىرى مەن ىرگەلى ىزدەنستەرىنەن سىر شەرتەتىن «كاۋسار» اتتى تاڭدامالى شىعارمالار جيناعى شىڭجان حالىق باسپاسىنان جارىققا شىققان.

«كۇي تەڭىزى ماڭگى سارقىلماق ەمەس، ونەر ولمەيدى، بۇكىل ءومىرى ءان- كۇيگە اينالعان كۇي اتامىزدىڭ ەكىنشى عۇمىرى ەندى باستالادى، ول- ونەر عۇمىرى! كۇي- كەرۋەنى الىسقا تارتسىن! ءبىز ابىز كۇيشى كامال ماقاي ۇلىنىڭ وتباسىنداعىلارعا، تۋىس- تۋعاندارىنا، بارماعىن سۇيگەن بارشا ونەرسۇيەر قاۋىمعا شىن جۇرەكتەن كوڭىل ايتامىز. قازانىڭ ارتى قايىرلى بولسىن! بارلىق تۋىس- تۋعاندارىنا سابىر تىلەيمىز!»، - دەپ جازادى CNR.

تۇرىك پ ا جيىنى تۇركىستاندا وتەدى - TRT

تۇركى تىلدەس مەملەكەتتەر پارلامەنتتىك اسسامبلەياسى تۇرىكپا- نىڭ 10- پلەنارلىق جينالىسى 27-28 قىركۇيەكتە تۇركىستاندا وتەدى، دەپ حابارلايدى تۇركيا راديو تەليەۆيزيا پورتالى.

«قازاقستان پارلامەنتى ءماجىلىسىنىڭ ءتوراعاسى نۇرلان نىعماتۋللين تۇرىك پ ا (تۇركى تىلدەس مەملەكەتتەردىڭ پارلامەنتتىك اسسامبلەياسى) باس حاتشىسى التىنبەك مامايۋسۋپوۆتى قابىلدادى. كەزدەسۋدە 27-28-قىركۇيەكتە قازاقستاننىڭ تۇركىستان قالاسىندا وتەتىن جينالىستىڭ دايىندىقتارى تالقىلاندى. ازەربايجان، قازاقستان، قىرعىزستان جانە تۇركيانىڭ ءماجىلىس باسشىلارى قاتىساتىن جينالىسقا وزبەكستان دا شاقىرىلدى. جينالىستا تۇرىكپا- نىڭ ون جىلدىق ىستەرىنە باعا بەرىلەدى جانە اسسامبلەيا شەڭبەرىندە ىنتىماقتاستىقتى جەتىلدىرۋ ءۇشىن جاڭا ماقساتتار ايقىندالادى. قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن قۇرىعان تۇرىكپا- دا ازەربايجان، قازاقستان، قىرعىزستان جانە تۇركيا تولىق مۇشە، ۆەنگريا باقىلاۋشى مارتەبەسىنە يە»، - دەپ جازادى TRT.

«ايدىنلار» فيلمى حالىقارالىق كينوفەستيۆالدە گران پري يەگەرى اتاندى – ءو ز ا

وزبەكستان ۇلتتىق تەلەراديوكومپانياسىنىڭ «وزبەكتەلەفيلم» مەملەكەتتىك مەكەمەسىندە تۇسىرىلگەن «ايدىنلار» فيلمى بولگاريانىڭ كينو، تەليەۆيدەنيە جانە ينتەرنەت بايلانىسى اكادەمياسى ۇيىمداستىرعان IX حالىقارالىق كينو جانە تەليەۆيزيالىق فەستيۆالىندە گران- ءپريدى جەڭىپ الدى، دەپ جازادى وزبەكستاننىڭ ءوزا مەملەكەتتىك اقپارات اگەنتتىگى.

كوركەم تۋىندى «ۇزدىك رەجيسسەر»، «ۇزدىك وپەراتورلىق جۇمىس»، «فيلم ءۇشىن ۇزدىك مۋزىكا»، سونداي - اق «ۇستاز» تەلەسەريالىنا جازىلعان «ۇزدىك سەناري» نوميناتسياسى بويىنشا جەڭىمپاز اتاندى.

كارتينادا قاراقالپاقستاننىڭ جاڭارعان بەينەسى مەن ارال تەڭىزىنىڭ پروبالەماسى باياندالعان.

حيۆا - تۇرىك الەمىنىڭ مادەني استاناسى - TRT

تۇرىك مادەنيەتىنىڭ حالىقارالىق ۇيىمى تۇرىكسوي تاراپىنان جاريالانعان «حيۆا 2020 تۇرىك الەمى مادەنيەتى استاناسى» باعدارلاماسى حيۆادا ءوتتى، دەپ حابارلايدى تۇركيا راديو تەليەۆيزيا پورتالى.

«بىلتىر كوروناۆيرۋس پاندەمياسى سالدارىنان كەيىنگە قالعان 2020 تۇرىك الەمى مادەنيەتى استاناسى باعدارلاماسىنىڭ اشىلۋ سالتاناتىنا 500 گە تارتا ونەر قايراتكەرى قاتىستى. ول وزبەكستاننىڭ حيۆا قالاسىنداعى تاريحي قامالدا ءوتتى. راسىمگە بايلانىستى حيۆا قالاسى اشىق اۋا قويىلىم ساحناسىنا اينالدى. ونەر قايراتكەرلەرى يشان قامالىنىڭ بارلىق كوشەلەرىندە ءداستۇرلى مۋزىكا ۇلگىلەرىن شىرقاپ، بي بيلەدى. شارا شەڭبەرىندە تۇرىكسوي «تۇرىك الەمى مادەنيەت استاناسى» فوتوسۋرەت كورمەسىن اشتى. كورمەدە تۇرىك الەمىنىڭ بەدەلدى فوتوگرافتارى تۇسىرگەن مادەنيەت استاناسى بولعان قالالاردىڭ سۋرەتتەرى ورىن الدى. شارا بارىسىندا ايىرىقشا وزبەكستاننىڭ ءداستۇرلى كيىم ۇلگىلەرىن تانىستىرعان ءسان قويىلىمى بولدى»، - دەپ جازادى TRT.

اۆتور: باقىتجول كاكەش