21:42, 17 - قىركۇيەك 2021 | GMT +6
ۆاكسينا سالدىرماعان ءۇش مىڭ مەديتسينا قىزمەتكەرى جۇمىسسىز قالدى
پاريج. قازاقپارات - فرانسيادا ءۇش مىڭعا جۋىق مەديتسينا قىزمەتكەرى جۇمىستان شەتتەتىلدى.
ولاردىڭ بارلىعى ءبىر سەبەپپەن - كوروناۆيرۋسقا قارسى ۆاكسينالانباعاندارى ءۇشىن شىعارىلدى، دەپ حابارلادى قازاقپارات euronews-كە سىلتەمە جاساپ.
ۇكىمەتتىڭ دارىگەرلەر ءۇشىن مىندەتتى ەكپە جاساۋ تۋرالى وكىمى بىرنەشە اپتا بۇرىن بەلگىلى بولعان.
الايدا كوپشىلىك بيلىكتىڭ سوزدەن ىسكە كوشەتىنىنە تولىق سەنبەدى.
كاسىپوداقتار كادر تاپشىلىعى ماسەلەسىن ايتۋدا. بيلىك جاعداي باقىلاۋدا دەپ سەندىرەدى. ءبىراق كەيبىر اۋرۋحانالاردا شۇعىل شارالار قابىلداۋعا تۋرا كەلدى.
«ءبىز بولىمشەلەردىڭ سەكسيالارىن جابامىز، شتاتتان تىس قىزمەتكەرلەردى تارتامىز، مەديتسينا قىزمەتكەرلەرىنەن ارتىق جۇمىس ىستەۋدى سۇرايمىز»، - دەدى جەرگىلىكتى ەمحانالاردىڭ ءبىرىنىڭ وكىلى.
ءۇش مىڭ مەديتسينا قىزمەتكەرىنىڭ كەلىسىمشارتىن ۋاقىتشا توقتاتۋ - بۇل جالپى ەۋروپا ءۇشىن بۇرىن-سوڭدى بولماعان جاعداي.