الماتىدا كوپقاباتتى ءۇيدىڭ شاتىرىنان سەكىرىپ ولمەك بولعان ەر ادام قۇتقارىلدى - ۆيدەو
الماتى قالالىق پوليتسيا دەپارتامەنتىنىڭ مالىمەتىنشە، جەرگىلىكتى تۇرعىندار پوليتسياعا «كوكمايسا» ىقشاماۋدانىنداعى ۇيلەردىڭ ءبىرىنىڭ شاتىرىنىڭ شەتىندە وتىرعان ەر ادام تۋرالى حابار بەرگەن. «ازاماتتار ماعان جۇگىنگەندە مەن اكىمشىلىك بولىمىمدە ستاتسيونارلىق پوليتسيا پوستىندا وتىردىم. كورسەتىلگەن ۇيگە تەز جۇگىرىپ باردىم، سونداي- اق پاترۋلدىك پوليتسياداعى ارىپتەستەرىمنەن كومەك سۇرادىم. مەن ەر اداممەن سويلەسىپ، اسىعىس ارەكەت جاساماۋعا كوندىرىپ جاتقاندا پاترۋلدىك پوليتسەيلەر توبەگە كوتەرىلدى»، - دەيدى جەتىسۋ اۋداندىق پوليتسيا باسقارماسىنىڭ ۋچاسكەلىك ينسپەكتورى نۇرلان قونىسوۆ.
پاترۋلدىك پوليتسيا ينسپەكتورى ابىلايحان وقاسوۆتىڭ ايتۋىنشا، وقيعا ورنىنا بىرنەشە مينۋتتا جەتكەن.
«ءبىز وقيعا ورنىنا بىرنەشە مينۋت ىشىندە جەتتىك. قاي جاعىنان ەشكىمگە بىلدىرمەي شاتىرعا شىعۋعا بولاتىنىن جەرگىلىكتى تۇرعىندار كورسەتتى. ارىپتەسىمىز ەكەۋمىز جاسىرىن تۇردە دەسە دە بولادى، شەتىنە قاراي ورمەلەپ باردىقتا ەر ادامدى سول جەردەن تۇسىردىك»، - دەدى ۋچاسكەلىك ينسپەكتور ابىلايحان وقاسوۆ. وزىنە قول جۇمساماق بولعان ادام - شىعىس قازاقستاننىڭ تۋماسى. ول كۇيزەلىسكە ۇشىراپ، سۋيتسيدكە بارۋ تۋرالى شەشىم قابىلداعان.