قازاقستاندا شەتەلدىك الەۋمەتتىك جەلىلەردى شەكتەۋ تۋرالى زاڭ جوباسى ماقۇلداندى

وعان سايكەس بارلىق شەتەلدىك مەسسەندجەرلەر مەن الەۋمەتتىك جەلىلەر قازاقستاننىڭ ۋاكىلەتتى ورگاندارىندا تىركەۋدەن وتۋگە جانە ءوز ۋاكىلەتتى وكىلدىكتەرىن اشۋعا ءتيىس. ولاي بولماعان جاعدايدا، بۇعاتتالاتىن بولادى، دەپ حابارلايدى Stan.kz اقپارات اگەنتتىگى.

ءماجىلىستىڭ جالپى وتىرىسىندا بالالاردىڭ قۇقىعىن قورعاۋ ماسەلەلەرى تۋرالى زاڭ جوباسى تالقىلاندى. زاڭ جوباسىنىڭ ماقساتى - بالانىڭ قۇقىقتارىن قورعاۋ سالاسىندا قوعامدىق قاتىناستاردى كەشەندى رەتتەۋدىڭ ءتيىمدى قۇقىقتىق نەگىزىن قالىپتاستىرۋ.

قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى شەڭبەرىندە دەپۋتاتتار «اقپاراتتاندىرۋ تۋرالى» زاڭنىڭ 1-بابىنداعى 73-74 -تارماقشالارىنا تولىقتىرۋلار ەنگىزۋ ۇسىنىلعان.

ۇسىنىسقا سايكەس، قازاقستان اۋماعىندا ءوز قىزمەتىن جۇزەگە اسىرۋ ءۇشىن شەتەلدىك ونلاين- پلاتفورمالاردىڭ نەمەسە جەدەل حابارلامالارمەن الماسۋ سەرۆيسىنىڭ مەنشىك يەلەرى زاڭدى تۇلعا رەتىندە مەملەكەتتىك تىركەۋدەن ءوتىپ، ءوز فيليالىن اشۋى ءتيىس.

«ۇسىنىلىپ وتىرعان «اقپاراتتاندىرۋ تۋرالى» زاڭنىڭ 18-2-بابىندا قازاقستان اۋماعىندا قىزمەتتى جۇزەگە اسىرۋ ءۇشىن شەتەلدىك ونلاين- پلاتفورمانىڭ نەمەسە جەدەل حابار الماسۋ سەرۆيسىنىڭ مەنشىك يەلەرى مەن وزگە دە زاڭدى وكىلدەرى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن زاڭدى تۇلعانى مىندەتتى مەملەكەتتىك تىركەۋدى نەمەسە شەتەلدىك زاڭدى تۇلعالاردىڭ فيليالىن (وكىلدىگىن) ەسەپتىك تىركەۋدى جۇرگىزەدى دەلىنگەن.

«شەتەلدىك ونلاين- پلاتفورما نەمەسە جەدەل حابار الماسۋ سەرۆيسى فيليالدارىنىڭ (وكىلدىكتەرىنىڭ) باسشىلارى قازاقستان رەسپۋبليكاسىنىڭ اۋماعىندا شەتەلدىكتەر نەمەسە ازاماتتىعى جوق ادامدار بولا المايدى»، - دەلىنگەن زاڭ جوباسىندا.

سونداي- اق، قازاقستانداعى الەۋمەتتىك جەلىلەر فيليالدارىنىڭ باسشىلارىن 24 ساعات ىشىندە بەلگىلى ءبىر كونتەنتتى جويۋ نەمەسە شەكتەۋ جونىندەگى شەشىمدى ورىنداۋعا مىندەتتەۋى مۇمكىن.

«شەتەلدىك ونلاين- پلاتفورما فيليالىنىڭ (وكىلدىگىنىڭ) باسشىسى «بايلانىس تۋرالى» قازاقستان رەسپۋبليكاسى زاڭىنىڭ 41-1 بابىنىڭ 1-1 جانە 1-2-تارماقتارىندا كورسەتىلگەن ۇسىنىمدى نەمەسە شەشىمدى ورىنداۋ بويىنشا شارالار قابىلداۋ تۋرالى نۇسقامانى العاننان كەيىن اقپارات سالاسىنداعى ۋاكىلەتتى ورگاننان ونى قازاقستان رەسپۋبليكاسى زاڭدارىنىڭ تالاپتارىن بۇزاتىن اقپاراتتى جويۋعا نە ونىڭ قازاقستان رەسپۋبليكاسىنىڭ اۋماعىندا تارالۋىن شەكتەۋگە شارالار قابىلداۋ ارقىلى جيىرما ءتورت ساعاتتان اسپايتىن ۋاقىت ىشىندە ورىنداۋعا مىندەتتى»، - دەلىنگەن زاڭ جوباسىندا.

الەۋمەتتىك جەلىلەردىڭ فيليالدارىن تىركەۋگە التى اي بەرىلەدى

زاڭ شىعارۋشىلار شەتەلدىك الەۋمەتتىك جەلىلەر مەن مەسسەندجەرلەرگە قازاقستاندا زاڭدى تۇلعا رەتىندە فيليالدارىن تىركەۋ ءۇشىن التى اي بەرۋدى جوسپارلاپ وتىر. ايتپەسە ولاردىڭ ەل اۋماعىنداعى قىزمەتىنە شەكتەۋ قويىلادى.

«وسى زاڭنىڭ 18-2-بابى قولدانىسقا ەنگىزىلگەننەن كەيىن التى اي وتكەن سوڭ، ەگەر شەتەلدىك ونلاين- پلاتفورما نەمەسە حابار الماسۋ سەرۆيسى قازاقستان رەسپۋبليكاسىنىڭ زاڭدى تۇلعالاردى مەملەكەتتىك تىركەۋ جانە فيليالدار مەن وكىلدىكتەردى ەسەپتىك تىركەۋ تۋرالى زاڭناماسىندا بەلگىلەنگەن تارتىپپەن شەتەلدىك زاڭدى تۇلعانىڭ وكىلدىگىن ەسەپتىك تىركەۋدى جۇرگىزبەگەن جاعدايدا، وسى رەسۋرستاردىڭ قىزمەتى قازاقستان رەسپۋبليكاسىنىڭ اۋماعىندا شەكتەلەدى»، - ۇسىنىلعان تۇزەتۋلەر وقىلادى.

سونداي-اق، ۇسىنىس اۆتورى دەپۋتات دينارا زاكيەۆا قۇجاتقا ەنگىزىلگەن نەگىزگى نورمالارعا توقتالدى. سونىڭ ءبىرى مەكتەپ وقۋشىلارىنىڭ ءجابىر كورۋى.

«مەكتەپ جاس ءوسپىرىم ءۇشىن ۋاقىتىنىڭ كوپ بولىگىن وتكىزەتىن، ءوزىن-ءوزى دامىتاتىن، وقۋ مەن تاجىريبە جيناۋ ءۇشىن مۇمكىندىكتەر كوزى سانالاتىن ورىن جانە تانىس، ءقاۋىپسىز ورتا. دەسە دە مەكتەپتە بالالاردىڭ ءجابىر كورۋى، زورلىق- زومبىلىققا ۇشىراۋى دا سيرەك ەمەس. بۇل بالالاردىڭ دەنساۋلىعىنا زيان كەلتىرىپ قانا قويماي، مەكتەپ كليماتىنا دا تەرىس اسەر ەتەدى. سوندىقتان زاڭ جوباسىندا ءبىلىم بەرۋ پروتسەسىندە جابىرلەۋدىڭ الدىن الۋ تەتىكتەرىن رەتتەۋ كوزدەلەدى»، - دەدى ول.

ايتۋىنشا، زاڭ جوباسىندا مۇعالىمدەر مەن قىزمەتكەرلەردى كومەككە مۇقتاج بالاعا ۋاقىتىلى كومەك كورسەتۋ جونىندەگى ادىسنامامەن، سونداي- اق بالاعا جابىرلەۋدىڭ بەلگىلەرىن تۇسىندىرەتىن جانە ءبىر- بىرىنە قۇرمەتپەن قاراۋعا باۋليتىن باعدارلامالارمەن قامتاماسىز ەتۋ ۇسىنىلادى.

زاكيەۆا بۇل تۇزەتۋ 3 ميلليوننان استام وقۋشىنىڭ جاعدايى مەن ءومىرىن جاقسارتۋعا باعىتتالعانىن اتاپ ءوتتى.

قازاقستان قوعامى ءۇشىن تاعى ءبىر وزەكتى ماسەلە - بالالار مەن جاسوسپىرىمدەر اراسىنداعى سۋيتسيد.

دەپۋتات كەلتىرگەن ستاتيستيكاعا سۇيەنسەك، وسى جىلدىڭ تەك التى ايىندا 105 بالا سۋيتسيدكە بارعان، 193 بالا ءوز- وزىنە قول جۇمساۋعا وقتالدى.

بۇل رەتتە ءبىرقاتار وڭىردە سۋيتسيد كورسەتكىشى وسكەنى بايقالادى. زاكيەۆانىڭ ايتۋىنشا، قورقىنىشتى كورسەتكىش تۇركىستان، الماتى، شىعىس قازاقستان وبلىستارىندا تىركەلىپ وتىر.

«وسىعان بايلانىستى زاڭ جوباسىندا بۇل ماسەلەنى شەشۋ ءۇشىن ورتا ءبىلىم ۇيىمدارىندا پسيحولوگيالىق قىزمەتتەردىڭ جۇمىسىن ۇيلەستىرۋ تەتىكتەرىن رەتتەۋ ۇسىنىلادى»، - دەدى ماجىلىسمەن.