وزبەكستاندا قانشا قازاق تۇرىپ جاتىر

«2018 -جىلى قازاقستاندا وزبەكستان رەسپۋبليكاسى جىلى اتالىپ ءوتىلدى. ايتۋلى جىل اياسىندا قازاقستاندا ءتۇرلى باعىتتاعى 90 نان استام ءىس- شارا ۇيىمداستىرىلدى. سايكەسىنشە، 2019 -جىلى ءبىزدىڭ ەلدە قازاقستان جىلى اتالىپ ءوتىلدى جانە ونىڭ اياسىندا 80 نەن استام ءىس- شارا ءوتتى. ەكىجاقتى وتكەن ءىس- شارالار ساياسي، اعارتۋ، مادەني جانە گۋمانيتارلىق باعىتتى مەڭزەدى. وكىنىشكە قاراي، 2020 -جىلى پاندەمياعا بايلانىستى ەكىجاقتى ءىس- شارالاردى توقتاتا تۇرۋعا تۋرا كەلدى. دەگەنمەن ەكى ەل اراسىنداعى ءوزارا بايلانىس توقتاعان ەمەس»، - دەدى سايديكرام نيازحودجايەۆ ەلورداداعى وزبەكستان ەلشىلىگىندە وتكەن باسپا ءسوز ءماسليحاتىندا.

ودان بولەك، ەلشى وزبەكستانداعى قانداستاردىڭ تاعدىرى تۋرالى ايتتى.

«قازىرگى تاڭدا وزبەكستاندا 822 مىڭ قازاق ءومىر ءسۇرىپ جاتىر. ولار وزبەكستان ەلىنىڭ دامۋىنا ءوز ۇلەسىن قوسۋدا. ءبىزدىڭ ەلدە 400 دەي مەكتەپ قازاق تىلىندە ءبىلىم بەرىپ جاتىر. سونىمەن قاتار، وزبەكستاننىڭ 7 جوعارى وقۋ ورنىندا گۋمانيتارلىق جانە تەحنيكالىق ماماندىقتار قازاق تىلىندە ۇيرەتىلىپ جاتىر. 1992 -جىلدان بەرى وزبەكستاننىڭ 30 وبلىس ورتالىعىندا قازاق مادەني ورتالىعى جۇمىس ىستەپ تۇر»، - دەيدى ول.

بۇعان دەيىن، سايديكرام نيازحودجايەۆ بيىلعى 6 اي ىشىندە قازاقستان مەن وزبەكستان ەلى اراسىنداعى تاۋار اينالىمى 1,9 ميلليارد ا ق ش دوللارعا جەتكەنىن ءمالىم ەتتى. ودان بولەك، وزبەكستان ەلشىسى ەكى ەل اۋماعىندا بىرلەسكەن فارماتسيەۆتيكا ونەركاسىبىن اشۋ جوسپارلانىپ جاتقانىن ايتتى.