ۆاكسيناتسيا جانە ءدىن: يسلام مەن پراۆوسلاۆيە ءدىنى ۆاكسيناعا قالاي قارايدى

قاراعاندى وبلىسىندا وڭىرلىك كوممۋنيكاتسيالار قىزمەتى پلاتفورماسىندا وتكەن ونلاين- بريفينگتە ءدىن وكىلدەرى يسلام جانە پراۆوسلاۆيە تۇرعىسىنان ۆاكسيناتسيا ماسەلەسىن تالقىلادى، دەپ حابارلايدى قازاقپارات ءتىلشىسى.

قازاقستان مۇسىلماندارى ءدىني باسقارماسىنىڭ قاراعاندى وبلىسى بويىنشا وكىلى باۋىرجان مەيىربەك ۇلى جانە قاراعاندى جانە شاحتينسك ەپارحياسىنىڭ كرەستوۆوزدۆيجەنسكيي شىركەۋى پريحودىنىڭ وكىلى الەكساندر ۋگولكوۆ اتاپ وتكەندەي، ۆاكسيناتسيا - جۇقپالى اۋرۋلاردىڭ الدىن الۋدىڭ ءتيىمدى ءادىسى جانە يسلامدا دا، پراۆوسلاۆيەدە دە رۇقسات ەتىلگەن.

«يسلامدا ۆاكسيناعا تىيىم سالىنباعان. ءدىن ءار ادامدى ءوز ءومىرى مەن دەنساۋلىعىنا ءتيىستى قامقورلىق جاساۋعا جانە اۋرۋدىڭ الدىن الۋ جولدارىن ىزدەۋگە جول سىلتەيدى. بۇل رەتتە ۆاكسينادا شاريعاتپەن تىيىم سالىنعان زاتتار بولماۋى ءتيىس»، - دەپ اتاپ ءوتتى باۋىرجان مەيىربەك ۇلى.

شىركەۋ سونىمەن قاتار ءومىردى ساقتاي الاتىن ۆاكسينانى قولدايدى، دەپ اتاپ ءوتتى الەكساندر ۋگولكوۆ. سپيكەر ءىنجىل ۋاعىزىمەن الەۋت ارالدارىنا جەتكەن يركۋتسك اۋليە يننوكەنتيدىڭ ومىرىنەن ءۇزىندى كەلتىردى.

«ارالداردىڭ حالقى قاۋىپتى جانە ولىمگە اكەلەتىن شەشەك ىندەتىنەن زارداپ شەكتى. قۇدايعا سەنىپ، بارلىعىن دۇعا ەتۋگە شاقىرعان اۋليە تۇرعىنداردى جاڭادان پايدا بولعان ۆاكسينانى سالدىرۋعا شاقىردى. وسىلايشا، ىندەتتىڭ تاراۋى توقتادى. ءبىز قازىر كوروناۆيرۋس ينفەكسياسىنىڭ وڭايشىلىقپەن كەتپەيتىنىن كورىپ وتىرمىز. اينالامىزداعى ادامدار ءالى دە اۋىرىپ، ومىردەن وزىپ تا جاتىر. عالىمدار اتاپ وتكەندەي، ۆاكسيناتسيا - قاۋىپتى اۋرۋدىڭ تارالۋىن توقتاتا الاتىن بىرنەشە قۇرالدىڭ ءبىرى»، - دەدى الەكساندر ۋگولكوۆ.

11-تامىزداعى جاعداي بويىنشا قاراعاندى وبلىسىندا ۆاكسينانىڭ ءبىرىنشى كومپونەنتىن 427196 ادام، ەكىنشىسىن - 318151 تۇرعىن الدى.

اۆتور: اگاتا مۋحامەدجانوۆا