سولتۇستىك قازاقستاندا زيانكەس شابىندىق كوبەلەگى كوبەيىپ كەتتى

س ق و- دا ارام شوپتەر مەن زيانكەستەردىڭ 7 ءتۇرى بويىنشا القاپتارعا مونيتورينگ جۇرگىزىلەدى. وبلىستىق فيتوسانيتارلىق دياگنوستيكا جانە بولجامدار ورتالىعى بيىل جوسپار بويىنشا 10 ميلليون استام گ ا تەكسەرۋى قاجەت. سونىڭ جارتىسىنا جۋىعى اسا قاۋىپتى زيانكەستەر بويىنشا، شامامەن 286 مىڭ كارانتيندىك نىساندار، ياعني ارام شوپتەر بويىنشا، 2 ميلليون گ ا جۋىعى قاۋىپتى زيانكەستەر بويىنشا. بۇدان باسقا اسا قاۋىپتى زيانكەستەر بويىنشا 3 ميلليون گ ا جۋىق القاپ جۇيەلى تۇردە مامانداردىڭ باقىلاۋىنا الىنعان.

«بۇگىنگە دەيىن 7 ميلليون گ ا مونيتورينگ زەرتتەۋى جۇرگىزىلدى. ەكى ايعا سوزىلعان قۋاڭشىلىق زيانكەستەر مەن ارام ءشوپتىڭ تارالۋىنا دا اسەر ەتتى. بيىل سەپتوريوز ءبىز بولجاعاننان ەكى ەسە از. ادەتتە ول جاڭبىرلى جازدا كوپ بولادى. بيىل ءبىرقاتار شارۋاشىلىقتاردا شابىندىق كوبەلەگى پايدا بولدى. بىزگە رەسەيدەن ۇشىپ كەلىپ جاتىر دەگەن بولجام بار. رەسەيدىڭ كورشى تۇمەن، ومبى، قورعان وبلىستارىمەن ارىپتەستىك بايلانىس ورناتقانبىز. كارانتيندىك شەكتەۋلەرگە دەيىن بىرگە مونيتورينگتىك زەرتتەۋلەر جۇرگىزىپ كەلدىك. ولارعا شابىندىق كوبەلەگى بىلتىر التاي وڭىرىنەن، ءنوۆوسىبىر جاقتان كەلىپتى. بيىل زيانكەستەردىڭ ءبىرىنشى بۋىنى وتە كوپ بولعان. كوبەلەگى وسىمدىك شىرنەسىن عانا جەسە، جۇلدىزقۇرتتارى تالعامايدى، ءبارىن جەي بەرەدى، سوندىقتان ولاردان قاۋىپ جوعارى»، - دەيدى «رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعى» ر م م سقو فيليالىنىڭ جەتەكشىسى قابيدەن ءسادۋاقاسوۆ.

مونيتورينگتىك زەرتتەۋدىڭ قورىتىندىسى بويىنشا بيىل شارۋاشىلىقتارعا 350 دەن استام ەسكەرتۋ حابارلاماسى جىبەرىلگەن.

«ۋكەكىرە دەگەن ءشوپ بار، ۇساق مالدان باسقاسى جەمەيدى. وسى ارام ءشوپ بويىنشا شارۋاشىلىقتارعا – 37، سەپتوريوز بويىنشا - 17 جانە شابىندىق كوبەلەگى بويىنشا 53 ەسكەرتۋ حابارلاماسىن بەردىك. زيانكەستەرگە جۇيەلى تۇردە باقىلاۋ جۇرگىزۋ ءۇشىن بەلگىلى ءبىر شارۋاشىلىقتاردى نەگىزگە الامىز. سول جەردە زيانكەستەردى كەزەڭ- كەزەڭ بويىنشا باقىلاپ وتىرامىز. شىلدەنىڭ باسىندا شابىندىق كوبەلەگىنىڭ ەكىنشى بۋىن شاتىرقاناتتارى ۇشتى. قازىر ولاردىڭ جۇلدىزقۇرتتارى شىعا باستايدى. ءبىزدىڭ ماقساتىمىز - شارۋاشىلىقتاردى ەسكەرتۋ، بولجاۋ»، - دەيدى قابيدەن ءسادۋاقاسوۆ.

س ق و- دا فيتوسانيتارلىق دياگنوستيكا جانە بولجامدار ورتالىعىنىڭ فيليالدارى بارلىق 13 اۋداندا بار. الايدا جۇمىس ىستەيتىن ماماندار تاپشى، ورتاشا ەڭبەكاقى 70 مىڭ تەڭگە شاماسىندا عانا بولعاندىقتان قىزمەتكەرلەر تۇراقتامايدى ەكەن.