10:15, 02 - تامىز 2021 | GMT +6
وقۋشىلار ءبىرىنشى توقساندا قاشىقتان ءبىلىم الادى دەگەن اقپارات راس پا
نۇر-سۇلتان. قازاقپارات - «ءبىلىم ءمينيسترى مالىمدەۋىنشە، وقۋشىلار ءبىرىنشى توقساندا قاشىقتان ءبىلىم الادى»، دەگەن اقپارات جالعان.
ق ر ءبىلىم جانە عىلىم مينيسترلىگى جەلىدە تارالعان وسى اقپاراتتى جوققا شىعاردى، دەپ حابارلايدى قازاقپارات ۆەدومستۆونىڭ Telegram كانالىنا سىلتەمە جاساپ.
«الەۋمەتتىك جەلىلەردە قازاقستاندىقتار جاڭا وقۋ جىلىنىڭ ءبىرىنشى توقسانىندا قاشىقتان ءبىلىم الادى ەكەن، بۇل تۋرالى ءبىلىم جانە عىلىم ءمينيسترى اسحات ايماعامبەتوۆ بريفينگتە مالىمدەدى» دەگەن جالعان اقپارات تاراپ جاتىر.
ق ر ءبىلىم جانە عىلىم ءمينيسترى اسحات ايماعامبەتوۆ بريفينگتەردە مۇنداي مالىمدەمە جاساعان جوق. وقىتۋ فورماتى تۋرالى شەشىمدى كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا، ەلدىڭ باس مەملەكەتتىك سانيتارلىق دارىگەرى جانە وڭىرلەردىڭ باس سانيتارلىق دارىگەرلەرى قابىلدايدى»، دەلىنگەن حابارلامادا.