قازاقستاندا نان قىمباتتادى

ساراپشىلاردىڭ مالىمەتىنشە، 2021 -جىلدىڭ ماۋسىمىندا ەلدەگى نان باعاسى ءبىر جىل بۇرىنعىعى قاراعاندا 5,9 پايىزعا وسكەن. نان تۇرلەرىنىڭ ىشىندە قارابيداي- بيداي نانى قاتتى قىمباتتاعان - باعاسى 9,2 پايىزعا وسكەن. ءبىراق باسقا ۇن ونىمدەرى ودان دا ايتارلىقتاي قىمباتتاعان. مىسالى، ماكارون باعاسى ءبىر جىل ىشىندە 10,3 پايىزعا، ال كەسپە 11,6 پايىزعا ءوستى. ۇننان جاسالعان كونديتەرلىك ونىمدەر 8,2 پايىزعا قىمباتتاپتى.

سونىمەن بىرگە، بيىل ءبىرىنشى جارتىجىلدىقتا نان- توقاش، ماكارون جانە ۇننان جاسالعان كونديتەرلىك ونىمدەر ءوندىرىسى تومەندەگەن. وندىرىلگەن ءونىم كولەمى 111 ميلليارد تەڭگە بولدى، بۇل 2020 -جىلدىڭ ءبىرىنشى جارتىجىلدىعىمەن سالىستىرعاندا 11,8 پايىزعا از.

جاڭا پىسكەن نان ءوندىرىسى 21,3 پايىزعا، 266,6 مىڭ تونناعا دەيىن ازايدى. ماكارون ونىمدەرى، كەسپە، كۋسكۋس جانە سول سەكىلدى ۇن ونىمدەرى 17,9 پايىزعا، 75,6 مىڭ تونناعا دەيىن تومەندەدى. تەك كەپتىرىلگەن نان مەن پەچەنە، كونديتەرلىك ونىمدەر مەن ۇزاق ساقتالاتىن ءتاتتى ناندار ءونىمى ءسال وسكەن.