جامبىل وبلىسى اۋىل اكىمدەرىنىڭ قانشا پايىزى جاڭارعانىن مالىمدەدى

مەملەكەت باسشىسى قاسىم-جومارت توقايەۆتىڭ باستاماسىمەن قازاقستاندا العاش رەت 25-شىلدە كۇنى اۋىل اكىمدەرىنىڭ سايلاۋى وتكەن بولاتىن. اۋىل اكىمدەرىن تىكەلەي سايلاۋ ناۋقانىندا جامبىل وبلىسىنداعى 38 اۋىلدىق وكرۋگ بويىنشا 122 كانديدات ۇسىنىلىپ، ونىڭ ىشىندە 111 ۇمىتكەر تىركەلدى. وتكەن سايلاۋ ناتيجەسىندە تىكەلەي داۋىس بەرۋ ارقىلى 38 اۋىل اكىمى سايلاندى، ولاردىڭ 63,2 پايىزى جاڭاردى. ونىڭ ۇشەۋى ايەل اكىمدەر.

ماسەلەن، جۋالى اۋدانى كاراساز اۋىلدىق وكرۋگىنە سايلانعان جانار نۇرمۇرات قىزى بۇعان دەيىن اتالعان ەلدىمەكەندەگى اكىمدىكتىڭ ءىس-جۇرگىزۋ جانە ەسەپ ءبولىمىنىڭ باسشىسى بولىپ جۇمىس ىستەپ، مەريتوكراتيا قاعيداسى ارقىلى قىزمەتتە جوعارىلاپ، اۋىل اكىمى بولىپ سايلاندى. جالپى اكىمدەردىڭ ورتاشا جاسى - 43، بۇعان دەيىنگى كورسەتكىش - 54 جاس بولاتىن، ياعني، اۋىل اكىمدەرىنىڭ جاڭا بۋىنى 11 جاسقا جاسارىپ وتىر. ەڭ جاس اكىم - رىسقۇلوۆ اۋدانى جاڭاتۇرمىس اۋىلىنا سايلانعان 28 جاستاعى قۋاندىق ەرسايىن وسىعان دەيىن اۋدان اكىمدىگىندە پەرسونالدى باسقارۋ ءبولىمىنىڭ باسشىسى بولىپ قىزمەت ەتكەن. بارلىق پارتيا وكىلدەرىنە، ءوزىن-ءوزى ۇسىنعاندارعا تەڭ جاعداي جاسالدى.

اكىم لاۋازىمىنا تاعايىندالعانداردىڭ 31 ى «Nur Otan» پارتياسىنان، «اۋىل»، «ادال»، «اق جول»، «قازاقستاننىڭ حالىقتىق پارتياسى» پارتيالارىنان ءبىر كانديداتتان جەڭىسكە جەتتى. ءوزىن -ءوزى ۇسىنعانداردىڭ ىشىنەن 3 ادام ەندى اۋىل اكىمى لاۋازىمىندا جۇمىس ىستەيتىن بولادى. تاعى دا ايتا كەتەرلىگى، وڭىردەگى جاڭا اكىمدەردىڭ 31 پايىزىنىڭ ماماندىعى ەكونوميست، 24 پايىزى مۇعالىم، 13 پايىزى ينجەنەر، 11 پايىزى اۋىل شارۋاشىلىعى مامانى، 5 پايىزى زاڭگەر، 16 پايىزى وزگە ماماندىق يەلەرى.

جامبىلدىقتار پرەزيدەنتتىڭ بۇل جاڭاشىل رەفورماسىنا تولىقتاي قولداۋ كورسەتىپ، سايلاۋعا بەلسەندى قاتىستى. وڭىردەگى 89 سايلاۋ ۋچاسكەسىندە 94642 ادام، ياعني سايلاۋشىلاردىڭ 90 پايىزى قاتىستى. وبلىس اكىمى بەردىبەك ساپاربايەۆ جاڭادان سايلانعان 38 اۋىل اكىمدەرىمەن كەزدەسۋ وتكىزدى. ايماق باسشىسى ولاردى جەڭىستەرىمەن قۇتتىقتاپ، الداعى جۇمىستارىنا ساتتىلىك تىلەدى.

اۆتور: سايا سەمباي