تارازدا دريفت اۋەسقويى جاۋاپكەرشىلىككە تارتىلدى

الەۋمەتتىك جەلىلەرگە مونيتورينگ جۇرگىزۋ بارىسىندا تاراز قالاسىنىڭ پوليتسەيلەرى ۆاز21703 ماركالى كولىك جۇرگىزۋشىسىنىڭ جانىبەك پەن كەرەي حان ەسكەرتكىشتەرىنە جاقىن جەردە دريفت جاساعان ۆيدەونى انىقتادى. تاراز قالاسى پوليتسيا باسقارماسىنىڭ قىزمەتكەرلەرى كوپ ۇزاتپاي كولىك جۇرگىزۋشىسىن ۇستادى.

«وبلىس ورتالىعىنىڭ تۇرعىنى قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكستىڭ 590-بابى 2-بولىگى (مەملەكەتتىك تىركەۋ ءنومىرى بەلگىلەرىنسىز كولىك قۇرالىن باسقارۋ)، قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكستىڭ 630-بابى 1-بولىگى ( جولداردى ءبۇلدىرۋ)، 596-بابى 1-بولىگى (جول ءجۇرىسى قاعيدالارىن بۇزا وتىرىپ، جاياۋ جۇرگىنشىلەر جولدارىمەن، جول جيەكتەرىمەن نەمەسە تروتۋارلارمەن ءجۇرۋ) بويىنشا اكىمشىلىك جاۋاپكەرشىلىككە تارتىلدى»، - دەلىنگەن پوليتسيا دەپارتامەنتى باسپا ءسوز قىزمەتىنىڭ حابارلاماسىندا.

پوليتسيا قىزمەتكەرلەرى ەكسترەمالدى جۇرگىزۋدى ۇناتاتىندارعا ويلانباي ىستەلگەن ارەكەتتەر قايعىلى جاعدايعا اكەلۋى مۇمكىن ەكەنىن ەسكەرتەدى.

ايتا كەتەر بولساق، درەيف - بۇل جىلدامدىق پەن تراسساداعى تراەكتورياعا بۇرىشتى ۇستاپ تۇرۋ ءۇشىن باسقارىلاتىن سىرعاناۋدى قولدانۋمەن سيپاتتالاتىن بۇرىلىس تەحنيكاسى جانە اۆتوسپورت ءتۇرى.