جالعان اقپارات تاراتقاندار قالاي جازالانادى؟
اسىرەسە، ادامدارعا ەكپە ارقىلى چيپ سالۋ، بەتپەردەدەگى قۇرت سياقتى ەل ىشىندە دۇربەلەڭ تۋدىرعان جاڭالىقتاردى قازاقستاندىقتار ءالى ۇمىتا قويماعان بولار. قازىر الەۋمەتتىك جەلىگە جاريالانعان نەمەسە وتباسىلىق چاتقا كەلگەن كۇدىكتى مالىمەتتى stopfake.kz رەسمي سايتىندا تەكسەرۋگە بولادى.
الەكساندر دانيلوۆ، Stopfake.kz جوباسىنىڭ جەتەكشىسى:
- جالعان مالىمەتتەردى عىلىمي تۇردە زەرتتەپ، حالىقارالىق ۇيىمدار مەن قۇزىرلى مەكەمەلەردىڭ كومەگىمەن زەرتتەۋ جۇرگىزەمىز. ءبىز قاتە جاڭالىقتى نەمەسە جالعان بولىپ كورىنەتىن حابارلامالاردى تاۋىپ، تەكسەرەمىز. الەۋمەتتىك جەلىلەرگە مونيتورينگ جاسايمىز. كۇنىنە 10 شاقتى فەيك - اقپاراتتى تەكسەرەمىز. جوبا جەتەكشىسى الەكساندر دانيلوۆتىڭ ايتۋىنشا، كوپ جاعدايدا فەيك جاڭالىقتىڭ دەرەككوزى بولمايدى. ال بولعان كۇننىڭ وزىندە سىلتەمە جاسالعان مەكەمە نەمەسە مامان كوبىنە كۇدىك تۋدىرادى. جالعان اقپارات تاراتۋشىلار نەگىزىنەن جالاڭ ەموتسياعا، ەش عىلىمي نەگىزى جوق جاڭالىق اشۋعا قۇمار دەيدى مامان.
ال استانالىقتار اقپاراتتىڭ راس- وتىرىگىن قالاي اجىراتادى؟ ونىڭ انىق- قانىعىنا قانشالىقتى كوز جەتكىزەدى؟ قالا تۇرعىندارىنا وسى ساۋالداردى قويىپ كوردىك. بيىل حالىقتى ۆاكسينالاۋ جونىندە جالعان اقپارات تاراتقاندارعا قاتىستى 11 قىلمىستىق ءىس قوزعالعان. قازىر ونىڭ ۇشەۋى بويىنشا تەرگەۋ ءجۇرىپ جاتىر. ەلدە مۇنداي زاڭ بۇزۋ دەرەگى انىقتالعان جاعدايدا قىلمىستىق جاۋاپكەرشىلىك قاراستىرىلعان.
شۇعىلا تۇرلىبەك، ق ر ىشكى ىستەر مينيسترلىگىنىڭ وكىلى:
- جالعان اقپارات تاراتقاندارعا 1000 ايلىق ەسەپتىك كورسەتكىشكە دەيىنگى مولشەردە ايىپپۇل سالىنادى. نە بولماسا، تۇزەۋ جۇمىستارىنا، نە 400 ساعاتقا دەيىنگى مەرزىمگە قوعامدىق جۇمىستارعا تارتىلادى. سونداي- اق ءبىر جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسى قولدانىلادى.
جالپى جىل باسىنان بەرى ەل بويىنشا فەيك اقپارات تاراتقاندارعا قاتىستى 43 قىلمىستىق ءىس قوزعالعان. ونىڭ بىرەۋى سوتقا جولداندى. ال بىلتىر ءدال وسى كەزەڭدە، ياعني ىندەت ءورشىپ تۇرعان كەزدە 63 جالعان مالىمەت انىقتالعان.