اقتوبەنىڭ بىرنەشە اۋدانىن شالعىن قۇرت جايلاپ كەتتى

اقتوبە وبلىسىنىڭ قارعالى، مارتوك، حرومتاۋ، العا، مۇعالجار جانە اقتوبە قالاسىنىڭ اۋماعىن جۇلدىزقۇرت جايلادى. ءشوپ تالعامايتىن شالعىن قۇرتتى ۋلاۋ جۇمىسىنا شارۋالاردىڭ وزدەرى جاۋاپتى. ال اۋىل- ايماققا تيەسىلى جەردى ۋلاۋ - اتقارۋشى بيلىكتىڭ مىندەتى.

«جاڭبىر جاۋىپ، كەيىن كۇن قاتتى ىسىعاندا وسىنداي بولادى. بۇل 8-10 -جىلدا ءبىر قايتالاناتىن جاعداي. فيتوسانيتاريالىق دياگنوستيكا جانە بولجامدار- ادىستەمەلىك ورتالىعى انىقتاعان اۋماقتا عانا حيميالىق وڭدەۋ جۇرگىزىلەدى. ءقازىر 8 مىڭ گەكتار جەر انىقتالدى. ونىڭ 2400ءى بوسالقى جەر جانە ەلدىمەكەنگە تيەسىلى اۋماق. ال 5400 شارۋالار مەنشىگىندە. تالاپ بويىنشا شارۋالار ءوز قارجىسىنا وڭدەۋ جۇرگىزەدى. كەيىن قارجىسىنىڭ تەڭ جارتىسى سۋبسيديالانادى»، - دەدى وبلىستىق اۋىل شارۋاشىلىعى باسقارماسىنىڭ باسشىسى يساتاي ەسماعامبەتوۆ.

قازىرگى كەزدە ۋلاۋ جۇمىسىنا ارنالعان 15 تەحنيكا بار. اراسىندا جۇك كولىگى مەن ۇشاق جۇمىلدىرىلادى. ايتا كەتەيىك، قازىر قالا ماڭىندا كوكونىس وسىرەتىن شارۋا قوجالىعى اۋماعىنا دا قۇرت تۇسكەنى انىقتالدى. وبلىستىق اۋىل شارۋاشىلىعى باسقارماسىنىڭ باسشىسى يساتاي ەسماعامبەتوۆتىڭ ايتۋىنشا، كوكونىسپەن قاتار ەگىس القابى، مايلى داقىل وسىرىلگەن جەردە دە قۇرت بار.

«شارۋاشىلىقتار ءوز كەزەگىندە ۋلاۋ جۇمىسىن جۇرگىزگەن. ەككەنى، باپتاعانى جاپپاي جويىلدى دەپ ايتۋعا بولمايدى. بۇل كوكونىس پەن جەمىس باعاسىنا كەرى اسەر ەتەدى دەپ تە ويلامايمىز. سەبەبى بۇگىنگەن اۋماق از، شارۋالار ۋلاپ جاتىر»، - دەدى وبلىستىق اۋىل شارۋاشىلىعى باسقارماسىنىڭ باسشىسىنىڭ ورىنباسارى اسىلحان ابتيەۆ.

شارۋالار قازىر 9 مىڭ گەكتار اۋماقتى ۋلاپ ۇلگەرگەن. ولار - مارتوك، قارعالى، مۇعالجار جانە العا اۋداندارىنىڭ شارۋالارى.