توكيو وليمپياداسىنا قىتاي ەلىندە تۇراتىن قانداستارىمىزدان قانشا سپورتشى قاتىسادى - شەتەلدەگى قازاق ءتىلدى ب ا ق- قا شولۋ

شىڭجاڭدىق 6 سپورتشى توكيو وليمپياداسىنا قاتىسادى - «جەنميني جيباو» (People Daily)

توكيو وليمپياداسىنا قاتىساتىن قىتايلىق سپورتشىلار مەن باپكەرلەردىڭ جانە رەسمي دەلەگاتسيا وكىلدەرىنىڭ ءتىزىمى جاريالاندى. ونىڭ ىشىندە شىڭجاڭدىق 6 سپورتشى بار، دەپ جازادى قىتايلىق kazakh.people.com سايتى.

اتالعان ب ا ق- تىڭ دەرەگىنشە، وسى تىزىمدە توكيو وليمپياداسىنا قىتاي ەلىنىڭ اتىنان شىعاتىن قانداستارىمىزدىڭ دا اتى اتالعان. ولار 60 كەلى سالماقتا گرەك- ريم كۇرەسىنەن ونەر كورسەتىپ، توكيو وليمپياداسىنا جولداما العان شىڭجاڭدىق قانداسىمىز ءۋاليحان سەرىك ۇلى مەن 75 كەلى سالماقتا شارشى الاڭعا شىعىپ جۇرگەن بوكسشى توقتاربەك تاڭاتقان ۇلى.

ەسكە سالا كەتەيىك، توكيو وليمپياداسىنا بارعان قىتايلىق جالپى وكىلدەر سانى 777 ادام. مۇنىڭ ىشىندە سپورتشىلار 431 ادام (ايەل سپورتشىلار 298 ادام، ەر سپورتشىلار 133 ادام)، باپكەرلەر، دارىگەرلەر جانە باسقادا كومەكشىلەر 307 ادام، رەسمي دەلەگاتسيا وكىلدەرى 39 ادام بولعان.

ىلە قازاق اۆتونوميالى وبلىسىندا «تۇلپار» مەرەكەسى اتالىپ ءوتتى - CNR

قىتاي مەملەكەتى «تۇلپار مەكەنى» دەپ تانىعان ىلە قازاق اۆتونوميالى وبلىسىنىڭ موڭعولكۇرە اۋدانىندا «تۇلپار» حالىقارالىق تۋريزم مەرەكەسى باستالدى، دەپ جازادى قىتايلىق kazakcnr.com سايتى.

«قىتايدا «تۇلپار» مەرەكەسى 1992 -جىلدان بەرى تويلانىپ كەلەدى. وسى اتالعان شارانىڭ سوڭعى جىلدارى داستۇرگە اينالعان ەڭ ءبىر قىزىقتى ءساتى «10 مىڭ تۇلپاردىڭ شابىسى» اتالاتىن جاندى كورسەتىلىم، وندا ساحنا الدىنان مىڭداعان سايگۇلىك جەر ءتوسىن دۇبىرلەتىپ شاۋىپ وتەدى. بيىلعى جىل سول 10 مىڭ جىلقىنى شاشاۋ شىعارماي جۇرت الدىنان جوسىلتىپ ايداپ وتۋگە 78 جىلقىشى دايارلانعان. «تۇلپار» مەرەكەسىندە باسقادا الەمگە تانىلعان جىلقى تۇقىمدارى كوپشىلىككە كورسەتىلدى. سونىمەن بىرگە قازاق حالقىنىڭ ۇلتتىق ويىندارى قىز قۋۋ، كوكپار، تەڭگە ءىلۋ، بايگە سەكىلدى جارىستار ءوتتى. وسى قويىلىمداردى كورسەتۋگە ارنايى جوبالانعان ەرەكشە ساحنانىڭ جالپى اۋماعى 2000 شارشى مەتر بولسا، ساحنا تورىنە قولمەن بەينەلەنىپ سالىنعان 3D ۇلگىسىندەگى الىپ تۇلپار بەينەسى كورەرمەندەردى ەرەكشە اسەرگە بولەدى»، - دەپ جازادى CNR سايتى.

ايتا كەتسەك، تاريحتان بەرى تەكتى تۇلپارىمەن اتاعى شىققان موڭعولكۇرەنىڭ جىلقى مادەنيەتىنىڭ تاريحى ۇزاق، تامىرى تەرەڭدە. ىلە جىلقىسىن ءوسىرۋ ورتالىعى سانالاتىن بۇل اۋداندا 100 مىڭ جىلقى بار. سوندىقتان موڭعولكۇرە بۇكىل قىتاي ەلى بويىنشا جىلقى سانى ەڭ كوپ، جىلقى ساپاسى ەڭ جاقسى اۋدان بولىپ ەسەپتەلەدى. قىتاي اۋىل شارۋاشىلىعى مينيسترلىگى 2003 -جىلى موڭعولكۇرە اۋدانىنا «قىتايدىڭ تۇلپار مەكەنى» دەگەن اتاق بەرگەن. اۋدان 2009 -جىلدان باستاپ ءداستۇرلى «ىلە تۇلپارى حالىقارالىق تۋريزم مەرەكەسىن» جىل سايىن ۇيىمداستىرىپ كەلەدى. ىلە جىلقىسى قىتاي مەملەكەتى بويىنشا ات سپورتى جارىستارىنا قاتىساتىن جىلقىلاردىڭ 70 پايىزىن يەلەپ وتىر.

تۇرىك فيلمى ا ق ش- تا جۇلدە الدى - TRT

رەجيسسەر دەرۆيش زايمنىڭ سيريادان تۇركياعا سوزىلعان ءبىر ساپاردىڭ حيكاياسىن باياندايتىن «Flaşbellek» اتتى فيلمى ا ق ش- تا جۇلدە الدى، دەپ حابارلايدى تۇركيا راديو تەلەۆيزيا پورتالى.

«فيلم اريزون شتاتىندا وتكەن 27- سەدونا حالىقارالىق فيلم فەستيۆالىندە «ۇزدىك حالىقارالىق فيلم» جۇلدەسىن الدى. اتالعان فيلم 2020 -جىلى 42- ءشى Cinemed فيلم فەستيۆالىندە «جاس قازىلار القاسى جۇلدەسىن» الىپ، 12-19- شىلدە كۇندەرىندە فرانسيادا كورسەتىلگەن بولاتىن. فيلمدە اراب كينەماتوگرافياسىنىڭ اتاقتى اكتەرلەرى سالاح باكري مەن الي سۇلەيمان وينايدى. اتالمىش فيلم 2019 -جىلى تۇركيانىڭ گازيانتەپ جانە كونيا قالالارىندا ءتۇسىرىلدى»، - دەپ جازادى TRT.

2032-جىلعى جازعى وليمپيادا ويىندارى قايدا وتەتىنى بەلگىلى بولدى - KAZNEWS

حالىقارالىق وليمپيادا كوميتەتى (ح و ك) 2032 -جىلعى جازعى وليمپيادا ويىندارى مەن پاراليمپيادا ويىندارى بريسبەن قالاسىندا وتەدى، دەپ جازادى موڭعوليانىڭ Kaznews اقپاراتتىق پورتالى.

«وسىلايشا اۋستراليا جەرىندە جازعى وليمپيادا ويىندارى ءۇشىنشى رەت وتكەلى تۇر. بۇعان دەيىن ءتورتجىلدىقتىڭ باستى دوداسىن 1956 -جىلى مەلبۋرن جانە 2000 -جىلى سيدنەي قالالارى قابىلداعان ەدى. ەسكە سالايىق، 2024 -جىلعى وليمپيادا ويىندارى پاريجدە (فرانسيا)، ال 2028 -جىلى لوس- اندجەلەستە (ا ق ش) وتەدى»، - دەپ جازدى Kaznews.

اتالعان ب ا ق- تىڭ دەرەگىنشە، ХХХІІ جازعى وليمپيادا ويىندارىنا قاتىسۋعا موڭعوليا سپورتشىلارى 13 سپورت تۇرىنەن بارلىعى 43 جولداما جەڭىپ العان.

بۇحاراداعى 7 تاريحي نىسان ICESCO- نىڭ يسلام الەمى مۇرالار تىزىمىنە ەنگىزىلدى - «ءوزا» اقپاراتتىق اگەنتتىگى

بۇحاراداعى 7 مادەني مۇرا نىساندارى يسلام الەمىنىڭ ءبىلىم، عىلىم جانە مادەنيەت ۇيىمىنىڭ (ICESCO) يسلام الەمى مۇرالار تىزىمىنە ەنگىزىلدى، دەپ جازادى وزبەكستاننىڭ «ءوزا» مەملەكەتتىك اقپارات اگەنتتىگى.

«وبلىستىق مادەني مۇرا باسقارماسىنىڭ حابارلاۋىنشا، 29- ماۋسىمدا يسلام الەمى مۇرالارى كوميتەتىنىڭ توعىزىنشى ونلاين- وتىرىسى ءوتىپ، وندا بۋحارانىڭ 2020 -جىلى «يسلام الەمىنىڭ مادەنيەتىنىڭ استاناسى» دەپ جاريالانۋىنا بايلانىستى وزبەكستان اتىنان ۇسىنىلعان كانديداتتىق قۇجاتتار قارالدى. وسى كەزدەسۋدە بۇحاراداعى 7 كەسەنە - يسمايل سوموني كەسەنەسى، چور باكر، باحاۋددين ناكشباند كەشەنى، ماعوكي اتتور مەشىتى، پويي كالون ءانسامبلى، ەجەلگى پويكەنت قالاسى مەن توشساروي مەدرەسەلەرىنىڭ قالدىقتارى ICESCO- نىڭ يسلام الەمى مۇرالارى تىزىمىنە ەنگىزىلگەن. ونلاين فورماتتا وتكەن جيىن اياسىندا، كەلەشەكتە وسى مادەني مۇرا وبەكتىلەرىن قالپىنا كەلتىرۋ، زەرتتەۋ جانە حالىقارالىق ماسشتابتا ناسيحاتتاۋ بويىنشا ICESCO جانە يسلام الەمىنىڭ مۇرالارى كوميتەتىمەن ىنتىماقتاستىقتى نىعايتۋعا قول جەتكىزگەن»، - دەپ جازادى «ءوزا» اقپاراتتىق اگەنتتىگى.

اۆتور: باقىتجول كاكەش