كوروناۆيرۋسپەن اۋىرعاننان كەيىن بارلىق پاتسيەنت وڭالتۋدان ءوتۋى كەرەك - دارىگەر

قاراعاندى قالاسى №5-ەمحاناسىنىڭ ءبولىم مەڭگەرۋشىسى ۆلادمير وگاي قازاقپارات ءتىلشىسىنىڭ سۇراقتارىنا جاۋاپ بەردى.

- ۆلاديمير رومانوۆيچ، كوروناۆيرۋس بەلگىلەرى بار پاتسيەنتتەردىڭ سانى ارتتى ما؟

- ءيا، كوروناۆيرۋس بەلگىلەرى بار پاتسيەنتتەردىڭ اعىمى شىنىمەن دە ارتتى. ەگەر بۇرىن قۇرامىندا دارىگەر، مەدبيكە جانە جۇرگىزۋشى بار ءبىر موبيلدى بريگاداعا 8-12 قوڭىراۋ كەلسە، قازىرگى ۋاقىتتا موبيلدى بريگادالار سانىنىڭ 3 تەن 6 عا دەيىن ۇلعايۋىنا قاراماستان، ءبىر موبيلدى بريگاداعا پاتسيەنتتەر سانى 15-17 قوڭىراۋعا دەيىن ءوستى.

- دەرتتى قالاي انىقتايسىزدار جانە كۇدىك تۋىنداعان كەزدە قانداي ارەكەت الگوريتمدەرىن قولداناسىزدار؟

- كوروناۆيرۋستىق ينفەكسياعا كۇدىك بولعان جاعدايدا، ك ۆ ي پ ت ر- عا نافارينگيالدى ءسۇرتىندى الۋ جۇرگىزىلەدى، ەگەر اۋىرلىق دارەجەسى جەڭىل بولسا، باستاپقى ەمدەۋ تاعايىندالادى جانە پاتسيەنت ۇيدە امبۋلاتوريالىق باقىلاۋدا بولادى. ەگەر جاعداي ورتاشا نەمەسە اۋىر ناۋقاس رەتىندە باعالانسا، ودان ءارى ستاتسيونارلىق ەمدەۋ ءۇشىن بەلگىلەنگەن باعىتقا سايكەس ستاتسيونارعا جىبەرىلەدى.

- پاندەميا باستالعان كەزدە ۆيرۋس نەگىزىنەن قارت ادامدارعا اسەر ەتەدى دەپ ايتىلدى. ءبىراق ءبىز جاستاردىڭ ءجيى اۋىرىپ جاتقانىن كورەمىز. بۇل نەمەن بايلانىستى؟

- پاندەميا باستالعاندا، شىنىمەن دە، جۇقتىرۋ دەرەكتەرى پاتسيەنتتەردىڭ كوپشىلىگى ەگدە جاستاعى ادامدارعا تيەسىلى بولدى، ولار بۇل ينفەكسيانى نەعۇرلىم اۋىر تۇردە جۇقتىردى. ال جاس پاتسيەنتتەر ينفەكسيانى اسيمپتوماتيكالىق نەمەسە جۇمساق تۇردە وتكەردى. قازىرگى ۋاقىتتا بارلىق جاستاعى ناۋقاستار وسى ينفەكسيامەن اۋىرادى. ءبىز بۇل اۋرۋدىڭ ءوسۋ تەندەنسياسىن بايقايمىز. مۇمكىن، بۇل ۆيرۋستىڭ مۋتاتسياسىنا بايلانىستى، بۇل كوروناۆيرۋستىق ينفەكسيانىڭ جاڭا شتامدارى تابىلعاندىعىمەن راستالادى.

- كوۆيدتەن كەيىن ەمدەلۋشىلەرگە قانداي ەم شارالارى جانە قانداي وڭالتۋ ەمى جۇرگىزىلەدى؟

- پوستكوۆيدتىك پاتسيەنتتەرگە العاشقى مەديكو- سانيتارلىق كومەك دەڭگەيىندە دە وڭالتۋ راسىمدەرى جۇرگىزىلەدى جانە وڭالتۋ ستاتسيونارلارىنا جىبەرىلەدى. وڭالتۋ شارالارى وسى ينفەكسيانى ورتاشا اۋىر نەمەسە اۋىر تۇردە جۇقتىرعان ءاربىر ناۋقاسقا قاجەت. قالپىنا كەلتىرۋ شارالارى مىنالارعا باعىتتالۋى ءتيىس: وكپەنىڭ ومىرلىك سىيىمدىلىعىن قالپىنا كەلتىرۋ، برونحوپۋلمونالدى جۇيەدەن قاقىرىقتى شىعارۋ (بار بولسا)، ساتۋراتسيانى قالپىنا كەلتىرۋ (قاندى وتتەگىمەن قانىقتىرۋ)، گيپوكسيا سالدارىن جويۋ، دەنە جۇكتەمەلەرىنە توزىمدىلىكتى ارتتىرۋ، بۇلشىقەت كۇشىن جانە كۇندەلىكتى قوزعالىس بەلسەندىلىگىن قالپىنا كەلتىرۋ، ۇيقى مەن پسيحوەموتسيونالدى جاعدايدى تۇراقتاندىرۋ.

- اۋرۋدان تولىق ايىعۋ ءۇشىن قانشا ۋاقىت قاجەت؟ بۇل زاقىمدانۋ دارەجەسىنە بايلانىستى ما؟

- قالپىنا كەلتىرۋ مەرزىمى ءار جاعدايدا ءار ءتۇرلى بولادى، ءبىراق ورتاشا ەسەپپەن ەكى اپتادان بىرنەشە ايعا دەيىن. مەديتسينا ءالى ناقتى بولجامدار جاساي المايدى جانە دەنەنىڭ قالپىنا كەلۋى مۇمكىن ناقتى كۇندەردى بەلگىلەي المايدى، ويتكەنى بۇل ماسەلە تولىق زەرتتەلمەگەن.

- ءسىز پاتسيەنتتەرگە ۆيرۋس جۇقتىرۋدان ساقتانۋ ءۇشىن قانداي كەڭەس بەرەسىز؟

- ءبىرىنشىسى - ۆاكسيناتسيا. ارينە، باسقا قورعانىس شارالارىن ۇمىتپاڭىزدار. ۇيدەن شىققان كەزدە بەتپەردە كيىڭىز، قوعامدىق ورىندارعا بارماۋعا تىرىسىڭىز. قولىڭىزدى الكوگول بار ونىممەن ۇنەمى زارارسىزداندىرىڭىز نەمەسە سابىنمەن جۋىڭىز. مۇمكىندىگىنشە كوزىڭىزدى، مۇرنىڭىزدى جانە اۋزىڭىزدى ۇستاماڭىز. جوتەلگەندە نەمەسە تۇشكىرگەندە اۋزىڭىزدى نەمەسە مۇرنىڭىزدى شىنتاق بۋىنىمەن نەمەسە مايلىقپەن جابىڭىز. بەتتەردى، اسىرەسە ەسىك تۇتقالارى، ەكراندار جانە تەلەفون ديسپلەيلەرىن ۇنەمى زارارسىزداندىرىڭىز.

سۇحباتىڭىزعا راحمەت!