الەمدەگى ءىرى اسكەري كەمەنى تىزگىندەگەن قانداسىمىز تۋعان اۋىلىنا ورالدى - شەتەلدەگى قازاق ءتىلدى ب ا ق- قا شولۋ

ۇشاق تاسيتىن اسكەري كەمە تىزگىنىن ۇستاعان جادىرا قابىل قىزى اۋىلىنا ورالدى - CNR

24 جاسىندا قىتايدىڭ ۇشاق تاسيتىن اسكەري كەمەسىن تىزگىندەگەن جادىرا قابىل قىزى اسكەري قىزمەتتەن بوساپ، تۋعان اۋىلىنا ورالدى، دەپ جازادى قىتايلىق kazakcnr.com سايتى.

اتالعان ب ا ق- تىڭ جازۋىنشا، جادىرا قابىل قىزى 1995 -جىلى قىتايدىڭ التاي ايماعىنىڭ جەمەنەي اۋدانىندا تۋعان. ول 2014 -جىلى ەكونوميكا جانە مەنەدجمەنت ماماندىعى بويىنشا سانجى ينستيتۋتىنا وقۋعا ءتۇسىپ، ەكىنشى جىلىندا ءوز قالاۋىمەن اسكەرگە شاقىرىلعان. وسىلايشا بالا كەزىنەن اسكەر بولۋدى ارمانداعان قازاقتىڭ ەرجۇرەك ءارى زەرەك قىزى ءتۇرلى سىناقتاردان سۇرىنبەي ءوتىپ، قىتاي اسكەري تەڭىز فلوتىنىڭ جاۋىنگەرلەرىنىڭ قاتارىنا قوسىلادى. جادىرا كومپيۋتەرلىك ەسەپتەۋگە جۇيرىك بولعاندىقتان كەمەنىڭ قوزعالىس تراەكتورياسىن جىلدام ەسەپتەي العان.

«جادىرا قابىل قىزى تەڭىز فلوتىنداعى بەس جىلدىق اسكەري مىندەتىن ءساتتى وتەپ، شىڭجاڭعا قايتىپ كەلىپ سانجى ينستيتۋتىنداعى وقۋىن جالعاستىردى. ول اۋىلىنا ورالعاننان كەيىن، تۋعان مەكەنى التاي ايماعىندا قىسقى تۋريزمىنىڭ دامىعاندىعىن كورىپ، وسكەن ەلىنە ءوز ۇلەسىن قوسۋ ماقساتىمەن، 2022 -جىلعى بەيجىڭ قالاسىندا وتەتىن قىسقى وليمپيادا ويىندارىنا ۆولونتەر بولۋعا تىزىمدەلگەن»، - دەپ جازادى CNR سايتى.

ايتا كەتەيىك، قازاقتىڭ باتىر قىزى تىزگىندەگەن «لياونين» كەمەسى، قۇرامىندا 2000 مىڭعا جۋىق ادامى بار، 50-گە جۋىق ۇشاق پەن تىكۇشاققا ايەرودروم بولعان، قىرۋار قارۋ- جاراق تيەگەن قىتاي فلوتىنىڭ ەڭ ايبارلى كەمەلەرىنىڭ ءبىرى. مۇنداي اۆيانوسەتس الەمنىڭ ساناۋلى الپاۋىت ەلدەرىندە عانا بار ەكەن.

اۋاسى تازا تاۋ قالاسى - «اعاجاي- التاي اقپارات» سايتى

جانعا جايلى، تابيعاتى اسەم، اۋاسى تازا تاۋ قالاسى التايدىڭ «تابيعي وتتەگى قويماسى» دەگەن اتى بار، دەپ جازادى kazakh.altxw.com سايتى.

«قىتايداعى قازاق ۇلتى مەكەن ەتكەن التاي ايماعىنىڭ ورتالىعى التاي قالاسىنىڭ اينالاسىن اسقار تاۋ، نۋ ورمان قورشاپ، قىران وزەنى قالانىڭ قاق ورتاسىنان ەندەي وتەدى. ءوڭىردىڭ وسىنداي سيرەك كەزدەسەتىن وزگەشە كليمات اسەرى جانعا جايلى تابيعي ورتا قالىپتاستىرىپ، الەمنىڭ ءار تۇكپىرىنەن كەلەتىن تۋريستەردى قىزىقتىرىپ وتىر. 2020 -جىلى تابيعاتى اسەم، اۋاسى تازا ەرەكشە قالانى تاماشالاۋعا 1 ميلليون 500 مىڭ تۋريس ات باسىن بۇرعان. نازارلارىڭىزعا وسى كوركەم قالانىڭ كورىنىستەرىنەن فوتورەپورتاج ۇسىنامىز»، - دەپ جازادى «اعاجاي- التاي اقپارات» سايتى.

وزبەك جانە قازاق كينورەجيسسەرلەرى بىرلەسىپ «كورشىلەر» اتتى كارتينا تۇسىرمەك - «ءوزا» اقپاراتتىق اگەنتتىگى

وزبەكستاندىق جانە قازاقستاندىق كينورەجيسسەرلەر بىرلەسىپ «كورشىلەر» اتتى كومەديالىق جانردا فيلم تۇسىرەتىن بولدى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«قازاقستاندىق كينورەجيسسەرلەر اقان ساتايەۆ پەن ازيمجان سايدبايەۆ كينەماتوگرافيا اگەنتتىگى باسشىلىعىمەن ونلاين رەجيمىندە كەزدەسۋ وتكىزدى. كەزدەسۋدە تاراپتار «جىبەك جولىنىڭ ءىنجۋ- مارجانى» تاشكەنت حالىقارالىق كينوفەستيۆالىن وتكىزۋ، وزبەكستان كينوسى كۇندەرىن قازاقستاندا وتكىزۋ، سونداي- اق «كورشىلەر» فيلمىن بىرلەسىپ ءتۇسىرۋ بويىنشا ىنتىماقتاستىق ماسەلەلەرىن تالقىلادى. «كورشىلەر» فيلمى - بۇل وزبەك پەن قازاق كورشىلەرىنىڭ قارىم- قاتىناسى جانە اۋلا اراسىنداعى قابىرعا بۇزىلعاننان كەيىن تابىلعان التىنعا قاتىستى وقيعالار تۋرالى كومەديالىق كارتينا»، - دەپ جازادى «ءوزا» اقپاراتتىق اگەنتتىگى.

اتالعان ب ا ق- تىڭ جازۋىنشا، فيلم وزبەكستاننىڭ حالىق اقىنى ەركين ۆاحيدوۆتىڭ «التىن قابىرعا» شىعارماسى نەگىزىندە ءتۇسىرۋ جوسپارلانعان. كارتينانىڭ سسەنارييىن قازاقستاندىق اكتەر، بلوگەر جانە سسەناريست ازامجان سايدبايەۆ جازادى. جاڭا بىرلەسكەن فيلم حالىقارالىق «جىبەك جولى ءىنجۋ- مارجانى» تاشكەنت كينوفەستيۆالىندە ۇلكەن ەكرانعا شىعادى دەپ جوسپارلانعان.

ۆولكان بوزكىر قازاقستانعا باردى - TRT

ب ۇ ۇ باس اسسامبلەياسىنىڭ ءتوراعاسى، تۇرىك ازاماتى ۆولكان بوزكىر تۇرىكمەنستان، وزبەكستان، قىرعىزستان ساپارىنان سوڭ قازاقستانعا باردى، دەپ حابارلايدى تۇركيا راديو تەلەۆيزيا پورتالى.

«ورتالىق ازياعا كەلۋ سەبەبىم وسى ەلدەردىڭ سالەمىن كۇللى الەمگە جەتكىزۋ. بۇل ەلدەرگە كەلۋ مەن ءۇشىن ەرەكشە سەزىم. مەن ۇنەمى مىنانى ايتامىن: ءبىر تۇرىك ب ۇ ۇ باس اسسامبلەياسىنىڭ ءتوراعاسى بولدى. بۇل ءارى ازەربايجان، قازاقستان، تۇرىكمەنستان، وزبەكستان، قىرعىزستاننىڭ ءتوراعالىعى. ال اۋعانستانداعى سوڭعى جاعدايلار بەيبىتشىلىك پەن تۇراقتىلىقتى قيىنداستىرۋدا. وسى تۇرعىدان اتالمىش ەلدەردىڭ كوپ تاجىريبەسى بار. وسى كۇردەلى جاعدايعا اسىرەسە قازاقستاننىڭ ماڭىزدى ءبىر ليدەرلىك كورسەتەتىنىنە سەنىمدىمىن»، - دەيدى ب ۇ ۇ باس اسسامبلەياسىنىڭ ءتوراعاسى ۆولكان بوزكىر.

اۆتور: باقىتجول كاكەش