قىتايدا تۇيە باققان اۋقاتتى قازاق - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

گورگاندا قازاقستان تاۋەلسىزدىگىنىڭ 30 جىلدىعىنا وراي دوڭگەلەك ۇستەل ءوتتى - Parstoday

قازاقستان رەسپۋبليكاسىنىڭ گورگان قالاسىنداعى باس كونسۋلدىعىنىڭ ۇيىمداستىرۋىمەن وسى قالادا قازاقستان تاۋەلسىزدىگىنىڭ 30 جىلدىعىنا ارنالعان دوڭگەلەك ۇستەل ءوتتى، دەپ حابارلايدى يراندىق Parstoday اقپاراتتىق پورتالى.

دوڭگەلەك ۇستەلدى قازاقستاننىڭ يرانداعى توتەنشە جانە وكىلەتتى ەلشىسى اسحات ورازباي جۇرگىزگەن.

«مەرەكەلىك شاراعا گۇلىستان وبلىسىنىڭ اكىمى حادي حاقشەناس، يران ءماجىلىسىنىڭ دەپۋتاتتارى، گورگان ساۋدا پالاتاسىنىڭ ءتوراعاسى، جەرگىلىكتى باسشىلار مەن قازاق دياسپوراسىنىڭ وكىلدەرى قاتىسىپ، پىكىر الماستى»، دەپ مالىمدەيدى Parstoday.


تۇيە باعۋ بازاسىنداعى اۋقاتتى قازاق باقتاشى - CNR

اعىمداعى اپتادا قىتايدىڭ «اعاجاي- التاي» پورتالىندا وسىنداي تاقىرىپتا اقپارات جارىق كوردى. شىڭجاڭنىڭ التاي ايماعىنداعى جەمەنەي اۋدانى شالشىقاي اۋىلىنىڭ سولتۇستىگىندەگى 24 كيلومەتر جەردەگى تۇيە باعۋ بازاسىندا قاز- قاتار تىزىلگەن ءىرى تۇرپاتتى بۇركىپ سۋارۋ قۇرىلعىلارىنىڭ جايىلىمدى سۋارىپ جاتقاندىعىن بايقاۋعا بولادى، دەپ حابارلايدى altxw.com اقپاراتتىق باسلىمى.

اتالعان تۇيە باعۋ بازاسىنىڭ باستىعى دوسبول بازارقان ۇلى تۇيە باعۋ تاجىريبەسى مول ازاماتتىڭ ءبىرى. ول شىڭجاڭ ۋاڭيۋان بيو عىلىم- تەحنيكا كومپانياسىنىڭ قىزمەتكەرى. دوسبول بازاداعى وتباسىلارىنا اۋلانى تازالاۋ، تۇيە ساۋۋ قاتارلىلاردى ۇيرەتەدى.

«قازىر وسى بازادا جيىنى 2063 تۇيە بار، 50 دەن استام ادام تۇراقتى جۇمىس ىستەيدى. ولار ايىنا 3600 يۋان جالاقى الادى. 2019 -جىلى ماۋسىم ايىندا قۇرىلعان بۇل بازا اۋدان بويىنشا 1026 وتباسى جايىلىمدى جالعا بەرۋ، تۇيە باعۋ، جۇمىسقا ورنالاسۋ، پايدادان ۇلەس الۋ قاتارلى تاسىلدەرمەن وتباسىلق كىرىستەرىن ارتتىردى. سول ارقىلى بۇل جەردەگى ءار ادامنىڭ ايلىق كىرىسى ورتا ەسەپپەن 6000 يۋاننان استى (390000 تەڭگە كولەمىندە - اۆت.)»، دەپ جازادى قىتايلىق ب ا ق.

بازا ىشىندەگى «تۇيە باعىمشىلىعى باقشاسى» دەپ اتالاتىن ساۋدا دۇكەنىنىڭ قوجايىنى جاڭانۇر كەرىم قىزى ءبىر جاعىنان كەستە تىگەدى ەكەن. جاڭانۇر مەن جولداسى تۇيە باعۋ بازاسىنىڭ تۇراقتى قىزمەتكەرى. ولار ايىنا 7000 يۋاننان استام (455000 تەڭگە كولەمىندە - اۆت.) ەڭبەكاقى الاتىنىن ايتادى. بوس ۋاقىتتارىندا ەرلى- زايىپتىلار بازا ىشىندە دۇكەن، اسحانا اشادى. ايتا كەتۋ كەرەك، بۇل اراداعى قازاق مالشىلار ەجەلدەن بەرى تۇيە باعۋدى كاسىپ ەتكەن. جۋىرداعى جىلداردان بەرى بۇل كاسىپتى بەلسەندى دامىتىپ، «بىرلەسكەن كوپەراتيۆ، باعىمشىلىق بازاسى، تۇيەشى وتباسىلار» سىندى تۇيە باعۋدىڭ بيزنەس فورماسىن قالىپتاستىرىپ، اتالعان كاسىپ ارقىلى حالىقتىڭ تابىسىن كوبەيتۋدى جەدەل ىلگەرىلەتكەن.

قازاقتار دايىندايتىن ۇلتتىق تاعامنىڭ 10 ءتۇرى - Kaznews

ءدال وسىنداي تاقىرىپتا موڭعوليالىق Kaznews پورتالىندا شاعىن تانىمدىق ماقالا جارىق كورگەن. وندا جالپى قازاق ۇلتىنا ورتاق 10 ءتۇرلى تاعام تۋرالى قىسقاشا تۇسىنىكتەر بەرىلگەن. اتاپ ايتاپ بولساق، «بەسبارماق»، «قۋىرداق»، «قازى، قارتا»، «سىرنە»، «جال»، «قىمىز»، «ايران، قۇرت»، «باۋىرساق» قاتارلى قازاقي اس- تاعامداردى جەكە- جەكە تانىستىرعان.

«بەسبارماق - موڭعوليا قازاقتارىنىڭ ءداستۇرلى ەتتى تاعامى. بەسبارماق وتباسىلىق مەيرامدار نەمەسە قوناقتاردى قارسى العان كەزدە ازىرلەنەدى. سىيلى قوناققا باس، جامباس تارتىلادى. كەي ولكەدە ەتتىڭ سورپاسى قاتىقپەن ەزىلىپ قويۋلاندىرىلعان تۇزدىقپەن بەرىلەدى»، دەپ باستايدى اتالعان تانىمدىق ماقالا.

تۇرىك دارىگەرلەر تۇركىستاندا وتا جاسادى - TRT

قوجا احمەت ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ وكىلەتتى كەڭەس ءتوراعاسى پروفەسسور مۋحيتتين شيمشەك تۇركىستانداعى باسپا ءسوز وكىلدەرىمەن باس قوستى.

بۇل تۋرالى وسى اپتادا تۇركيا راديو تەليەۆيزيا پورتالى حابارلاعان بولاتىن.

اتالعان ب ا ق- تىڭ دەرەگىنشە، شيمشەك ۋنيۆەرسيتەتتىڭ وقۋ- اعارتۋ، عىلىمي شارالار جانە ەلدىڭ ماسەلەلەرىنە شەشىم تابۋ سەكىلدى ءۇش ماڭىزدى قىزمەتى بار ەكەنىن ايتقان. پروفەسسور مۋحيتتين شيمشەك قوجا احمەت ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ الەم كولەمىندە تانىمالدىعىن ارتتىرىپ، بەدەلدى جاعدايعا كەلتىرۋ كەرەك ەكەنىن تىلگە تيەك ەتكەن.

«شيمشەك ۋنيۆەرسيتەتتىڭ مەديتسينا سالاسىنداعى جۇمىستارىنىڭ ءبىرى «انا مەكەننەن اتاجۇرتقا دەنساۋلىق كوپىرى» اتتى جوبا اياسىندا جۇرگىزىلگەن ىستەر تۋرالى دا مالىمەت بەردى. وسى جوبا اياسىندا تۇرىك دارىگەرلەردىڭ 42 كۇردەلى وتا جۇرگىزگەنىن، ونداعان ناۋقاستى ەمدەپ، تەكسەرۋدەن وتكىزگەنىن ايتتى. ۋنيۆەرسيتەتتىڭ وكىلەتتى كەڭەس ءتوراعاسى وسىنداي جوبالاردىڭ باسقا سالالاردا دا باستالاتىنىن ءبىلدىردى» دەپ مالىمدەيدى تۇركيا راديو تەليەۆيزيا پورتالى.

سونداي- اق، پروفەسسور مۋحيتتين شيمشەك ۋنيۆەرسيتەتتە تۇركىستان وبلىستىق اكىمدىگىمەن بىرگە اگرونوميا فاكۋلتەتىنىڭ قۇرىلاتىنىن دا ايتقان.

ساردوبا تاسقىنى تۋرالى دەرەكتى فيلم تۇسىرىلۋدە - «ءو ز ا» اقپاراتتىق اگەنتتىگى

وزبەكستان كينەماتوگرافيا اگەنتتىگىنىڭ تاپسىرىسى بويىنشا «دەرەكتى- حرونيكالىق كينوستۋديا» تاراپىنان «ساردوبا سابوعي» اتتى دەرەكتى فيلم تۇسىرىلۋدە، دەپ حابارلايدى وزبەكستاننىڭ «ءو ز ا» اگەنتتىگى.

اتالعان اگەنتتىكتىڭ حابارلاۋىنشا، بۇل تۋىندى 2020 -جىلى 1-مامىردا سىرداريا وبلىسىنداعى ساردوبا سۋ قويماسىندا بولعان تەحنوگەندىك اپات تۋرالى باياندالماق. قازىرگى ۋاقىتتا فيلمدى ءتۇسىرۋ جۇمىستارى وقيعا ورىن العان ايماقتاعى اۋدانداردا تۇسىرىلۋدە. وندا ەۆاكۋاتسيالانعان تۇرعىندار تۋرالى، ولار ورنالاسقان اۋداندار، وسى پروتسەسكە قاتىسقان اسكەري قىزمەتكەرلەر، قۇتقارۋشىلار مەن زارداپ شەككەندەرگە كومەك كورسەتكەن ازاماتتار تۋرالى ساحنالار تاسپالانۋدا. بۇل كينوتۋىندىڭ رەجيسسەرى ابدۋساماد سالوموۆ ءفيلمنىڭ نەگىزگى ماقساتىن ايتىپ بەرگەن.

«فيلمنىڭ ماقساتى - وتانداستارىمىزدىڭ باسىنا تۇسكەن وسىنداي قيىن كۇندەردى شىدامدىلىق پەن توزىمدىلىك تانىتۋ ارقىلى، ءبىر- ءبىرىن قولداپ ىنتىماقتاستىقپەن ەڭسەرگەنىن كورسەتۋ. ارينە، فيلمنىڭ باستى يدەياسى - بارىمىزگە ساباق بولعان قايعىلى وقيعانىڭ ماڭىزى. «ساردوبا سابوگي» فيلمى مەنىڭ كينەماتوگرافيا اگەنتتىگىندەگى العاشقى رەجيسسەرلىك جۇمىسىم بولعاندىقتان، ءبىز ءفيلمدى كورەرمەندەرگە ۇنامدى ەتۋ ءۇشىن بارىنشا جۇمىس ىستەپ جاتىرمىز. بۇل ۇدەرىستە ءبىزدىڭ مۇعالىمدەر مەن تاجىريبەلى ارىپتەستەر ءوز كەڭەستەرىن بەرۋدە»، دەيدى فيلمنىڭ رەجيسسەرى ابدۋساماد سالوموۆ.

ايتا كەتەيىك، وتكەن جىلى وزبەكستان رەسپۋبليكاسى اۋماعىنداعى ساردوبا سۋ قويماسى بوگەتى بۇزىلىپ، سونىڭ سالدارىنان تۇركىستان وبلىسىنىڭ ءبىرقاتار ەلدى مەكەنىن سۋ باسىپ قالعان بولاتىن.

اۆتور: بەيسەن سۇلتان

سوڭعى جاڭالىقتار