فۋتبولدان ەۋروپا چەمپيوناتى: شۆەتسيا كوش باسىنا شىقتى

ەسكە سالساق، اتالعان ەكى قۇراما ە توبىندا سىنعا تۇسەدى. قارسىلاستارى - يسپانيا جانە پولشا.

العاشقى تۋردا سلوۆاكيا پولشادان 2:1 ەسەبىمەن باسىم تۇسسە، شۆەتسيا يسپانيامەن 1:1 ەسەبىمەن تەڭ ءتۇستى.

ەكى قۇراما بۇعان دەيىن التى مارتە كەزدەستى. ونىڭ ۇشەۋىندە شۆەتسيالىقتار جەڭىسكە جەتسە، ءۇش كەزدەسۋدە تەڭ ەسەپ تىركەلدى.

بۇگىنگى كەزدەسۋدە ەكى قۇرامانىڭ دا جەڭىسكە جەتۋ مۇمكىندىگى زور بولدى. دەسە دە كوپ ۋاقىتقا دەيىن ەسەپ وزگەرىسسىز تۇردى. ويىننىڭ 77-مينۋتىندا سلوۆاكيا قاقپاسىنا بەلگىلەنگەن پەنالتيدى ەميل فورسبەرگ مۇلتىكسىز ورىندادى.

بۇدان كەيىن قاۋىپتى بىرنەشە ءسات تۋىندادى. سوعان قاراماستان ونى ەشكىم گولعا اينالدىرا العان جوق. كەزدەسۋدە شۆەتسيا قۇراماسى قارسىلاسىنان 1:0 ەسەبىمەن باسىم ءتۇستى.

ەكى ويىننان كەيىن ءتورت ۇپاي جيناعان ولار تۋرنير كەستەسىندە كوش باسىنا شىقتى. بۇل توپتاعى ەكىنشى تۋردىڭ تاعى ءبىر ويىنى يسپانيا مەن پولشا اراسىندا 19- ماۋسىمدا بولادى.

ايتا كەتەيىك، ەندى اتالعان توپتاعى ءۇشىنشى تۋر ويىندارى 23- ماۋسىمدا وتكىزىلەدى. بۇل كۇنى يسپانيا مەن سلوۆاكيا، شۆەتسيا مەن پولشا قۇرامالارى شەبەرلىك بايقاسادى.