ەلوردادان الاكولگە بارىپ دەمالۋدىڭ ءبىر اپتالىق شىعىنى قانشا؟

«بالالاردىڭ ۇشاق بيلەتىنىڭ قۇنى تەك تۋريستىك پاكەتتىڭ ىشىندە بولعان كەزدە عانا سۋبسيديالاناتىنىن باسا ايتقىم كەلەدى. ياعني، ءسىز تۋريستىك وپەراتوردىڭ قىزمەتىنە جۇگىنبەي، ءوز بەتىڭىزبەن ۇشقان بولساڭىز، بيلەت قۇنى تولەنبەيدى. ال تۋريستىك وپەراتوردىڭ كومەگىمەن دەمالعان بولساڭىز، ۇنەم 20-30 پايىز بولادى. مىسالى، 3 بالالى وتباسى نۇر-سۇلتاننان الاكولگە ءبىر اپتالىق دەمالىسقا باردى دەيىك. ونىڭ شىعىنى قالىپتى جاعدايدا 350-400 مىڭ تەڭگە بولادى. وسىنىڭ ىشىندە شامامەن 100 مىڭ تەڭگەنى Kids go free باعدارلاماسى بويىنشا ۇنەمدەۋگە بولادى. سوندا ءبىر وتباسى ءۇشىن اپتالىق تۋرپاكەتتىڭ قۇنى 250 مىڭ تەڭگەگە شىعادى دەگەن ءسوز»، - دەدى داستان رىسپەكوۆ.

Kazakh Tourism كومپانياسىنىڭ باسقارما ءتوراعاسى ەرجان ەركىنبايەۆ تۋريستىك وپەراتورلاردىڭ كومەگىنسىز، ءوز بەتىمەن دەمالاتىن وتباسىلارعا نەگە مۇنداي جەڭىلدىك ۇسىنىلمايتىنىن ءتۇسىندىردى.

«ەل ىشىندە دەمالۋعا بارعان كەزدە تۋىستاردىڭ ءۇيىن پانالاۋ ءتيىمدى بولۋى مۇمكىن. ءبىراق Kids go free باعدارلاماسىنىڭ فيلوسوفياسى مەن ءمانى تەك بالالارعا تەگىن بيلەت ۇسىنۋعا ارنالماعان. باستى ماقسات - وتباسىلىق دەمالىستىڭ تانىمالدىعىن ارتتىرۋ. ونىڭ ۇستىنە جايعاسۋ ورىندارىن، وتباسىمەن دەمالۋشىلارعا ارنالعان قىزمەت تۇرلەرىن كوبەيتۋگە يتەرمەلەۋىمىز كەرەك. تۋريستىك وپەراتورلار ءدال وسى وتباسىلىق ساپارلارعا كوبىرەك كوڭىل ءبولۋ ءۇشىن دە وسىنداي تەتىك قاجەت.

باعدارلاماعا تەك ۇشاق بيلەتتەرىنىڭ سۋبسيدياسى كىرگەنىنىڭ دە سەبەبى بار. قازاقستاندىقتار ءوز بالالارىنا ەلىمىزدىڭ وزگە بۇرىشتارىن كورسەتىپ، تۋريستىك الەۋەتىن تانىتۋى كەرەك. بىزدە لاندشافتىڭ ءتۇرى كوپ. 13 ۇلتتىق پارك بار. كوبىمىز ءوزىمىز تۇرىپ جاتقان وڭىردەن الىسقا ۇزاپ شىقپايمىز. بۇل باعدارلاما وسىنداي وتباسىلارعا ارنالعان. سوندىقتان، مەنىڭ ويىمشا Kids go free باعدارلاماسى بويىنشا ۇيىمداستىرىلعان دەمالىستى تۋىستارعا قوناق بولىپ بارۋمەن سالىستىرۋعا كەلمەيتىن سياقتى»، - دەدى ەرجان ەركىنبايەۆ.

سونداي-اق، ول Kids go free باعدارلاماسىمەن الماتىعا 5 كۇندىك دەمالىسپەن كەلگەن وتباسىنىڭ ورتاشا شىعىنىن ەسەپتەپ بەردى.

«ەكى ەرەسەك ادام، ءۇش بالاسى بار وتباسى الماتىدا 4 قونىپ، دەمالۋعا كەلسە، ەرەسەكتەردىڭ بيلەت قۇنى 80 مىڭ تەڭگە بولادى. وتباسىلىق قوناق ءۇي نومىرىنە 120 مىڭ تەڭگە كەتەدى. بۇل - ايتارلىقتاي جاقسى قوناق ءۇيدىڭ باعاسى. 5 كۇندىك اتراكتسيوندار شىعىنى 55 مىڭ تەڭگەدەي بولادى. 5 ادامنىڭ 4 كۇنگى تۇسكى اسى مەن كەشكى تاماعىنا 60 مىڭ تەڭگە شىعادى. سوندا ءبارىن قوسساق، 315 مىڭ تەڭگە. ال Kids go free بولماسا، شىعىن 415 مىڭ بولار ەدى. سوندا مۇندا دا 100 مىڭ تەڭگە ۇنەم بار دەگەن ءسوز»، - دەدى ەرجان ەركىنبايەۆ.