شاڭحايدا تۇڭعىش رەت اباي وقۋلارى ءوتتى
قازاقستاننىڭ شاڭحايداعى باس كونسۋلدىعى شاڭحاي كىتاپحاناسىمەن بىرلەسىپ قىتايدىڭ ماڭىزدى مادەني جانە ەكونوميكالىق ورتالىعىندا العاشقى «اباي وقۋلارىن» وتكىزدى.
بۇل تۋرالى قازاقپارات ق ر سءى م باسپا ءسوز قىزمەتىنە سىلتەمە جاساپ حابارلايدى.
اشىلۋ سالتاناتىندا قازاقستاننىڭ باس كونسۋلى راحىمجان راحيموۆ، كىتاپحانا ديرەكتورى چەن چاو جانە (بەيجىڭنەن بەينەبايلانىس ارقىلى) قىتايدىڭ بەلگىلى جازۋشىسى، اباي شىعارمالارىنىڭ اۋدارماشىسى اكبار ءماجيت قۇتتىقتاۋ ءسوز سويلەدى.
اباي وقۋلارىنىڭ باعدارلاماسىنا قازاقستان، قىتاي جانە رەسەي ازاماتتارى بىرنەشە تىلدە ۇسىنعان ابايدىڭ تانىمال ادەبي جانە مۋزىكالىق شىعارمالارى ەندى. قىتاي تاريحشىسى جانە ساياساتتانۋشىسى ازات يزوللا ۇلى «كوڭىلىم قايتتى دوستان دا، دۇشپاننان دا» ولەڭىنەن ءۇزىندى وقىدى. قىتاي ءانشىسى لين باو مەن رەسەيلىك ءانشى نيكولاي شاموۆ «كوزىمنىڭ قاراسى» جانە «ايتتىم سالەم قالامقاس» اندەرىن قازاق تىلىندە ورىندادى.
قىتايلىق انتروپولوگ- عالىم جان شان دومبىرا مەن سىبىزعىدا اسقان شەبەرلىكپەن ونەر كورسەتتى. ءىس- شارا اياسىندا باس كونسۋلدىق كىتاپحانانىڭ قورىنا اباي شىعارمالارىنىڭ قىتاي تىلىندە جارىق كورگەن باسىلىمدارىن تابىستادى.
جالپى، العاشقى اباي وقۋلارى قىتاي تۇرعىندارىن ۇلى اقىن، ويشىل جانە كومپوزيتوردىڭ شىعارمالارىمەن جاقىنىراق تانىستىرۋعا مۇمكىندىك بەرىپ، قاتىسقان قوناقتاردىڭ جوعارى باعاسىنا يە بولدى. اتاپ ايتقاندا، شانحاي ساياسي عىلىمدار جانە قۇقىقتانۋ ۋنيۆەرسيتەتى جانىنداعى ەۋرازيا عىلىمي- زەرتتەۋ ينستيتۋتىنىڭ ديرەكتورى لي سيننىڭ ايتۋىنشا، اباي شىعارمالارىندا تەرەڭ ماعىنا بار جانە وتكەن ادەبي باسقوسۋ ونىڭ ولەڭدەرى مەن اندەرىمەن جاندى ورىنداۋدا تانىسۋعا تاماشا مۇمكىندىك بەرىلدى.
شانحاي قوعامدىق عىلىمدار اكادەمياسىنىڭ رەسەي مەن ورتالىق ازيانى زەرتتەۋ ورتالىعىنىڭ ديرەكتورى پان داۆەي پىكىرىنشە، وتكىزىلگەن ءىس- شارا قازاقستان مەن قىتاي اراسىنادعى مادەني- گۋمانيتارلىق قارىم- قاتىناستاردى نىعايتۋعا وڭ سەپتىگىن تيگىزەدى. شانحاي شەت تىلدەر ۋنيۆەرسيتەتىندە رەسەي، شىعىس ەۋروپا جانە ورتالىق ازيا ينستيتۋتى ورتالىق ازيا تىلدەرى فاكۋلتەتىنىڭ دەكانى ۋ ايچجۋن ۇيىمداستىرۋشىلارعا شىنايى ريزاشىلىعىن ءبىلدىرىپ، بولاشاقتا جاڭا دا بىرلەسكەن مادەني- ءبىلىم بەرۋ ءىس- شارالارىن وتكىزۋدى قولداۋعا دايىن ەكەندىگىن ءبىلدىردى.
ءبىرىنشى اباي وقۋلارىنا شانحاي جانە نينبو قالالارى، جىجياڭ پروۆينتسياسى حالىق ۇكىمەتتەرىنىڭ سىرتقى بايلانىستار باسقارمالارىنىڭ، شانحاي شەت ەلدەرمەن دوستىق قاۋىمداستىعىنىڭ، شانحاي قالاسىنىڭ حالىقارالىق ساۋداعا جاردەمدەسۋ جونىندەگى كوميتەتىنىڭ، شانحاي قوعامدىق عىلىمدار اكادەمياسى، شانحاي حالىقارالىق زەرتتەۋلەر اكادەمياسى، شانحاي ساياسي عىلىمدار جانە قۇقىقتانۋ ۋنيۆەرسيتەتى، شىعىس- قىتاي پەداگوگيكالىق ۋنيۆەرسيتەتى جانە شانحاي شەت تىلدەر ۋنيۆەرسيتەتى سياقتى ءىرى عىلىمي زەرتتەۋ جانە ءبىلىم بەرۋ ورتالىقتارىنىڭ باسشىلارى مەن وكىلدەرى قاتىستى.