14:16, 12 - ماۋسىم 2021 | GMT +6
ۆەنگريا، تايلاند جانە موڭعوليا ازاماتتارىنىڭ ۆاكسيناتسيا انىقتاماسى قازاقستاندا جارامدى
نۇر- سۇلتان. قازاقپارات - ق ر باس مەملەكەتتىك سانيتار دارىگەرى ەرلان قياسوۆتىڭ جاڭا قاۋلىسى جارىق كوردى. وعان سايكەس، ءبىرقاتار ەلدىڭ ازاماتتارىنىڭ ۆاكسيناتسيا انىقتامالارى قازاقستان اۋماعىندا جارامدى بولادى، دەپ حابارلايدى قازاقپارات ءتىلشىسى.
قۇجاتتا ۆەنگريا، تايلاند جانە موڭعوليا ازاماتتارىنىڭ پاسپورتتارى/سەرتيفيكاتتارى/ۆاكسيناتسيا انىقتامالارى قازاقستان رەسپۋبليكاسىنىڭ اۋماعىندا جارامدى دەپ تانىلاتىندىعى ايتىلعان.
«كولىكتەگى سانيتاريالىق- ەپيدەميولوگيالىق باقىلاۋ دەپارتامەنتى، سانيتاريالىق- ەپيدەميولوگيالىق باقىلاۋ كوميتەتىنىڭ اۋماقتىق دەپارتامەنتتەرى، قازاقستان رەسپۋبليكاسىنىڭ مەملەكەتتىك شەكاراسى ارقىلى اۆتوموبيل وتكىزۋ پۋنكتتەرىندەگى مەملەكەتتىك كىرىستەر ورگاندارىنىڭ قۇرىلىمدىق بولىمشەلەرى وسى قاۋلىنىڭ 3-تارماعىندا كورسەتىلگەن قۇجاتتار بولعان كەزدە ۆەنگريا، تايلاند جانە موڭعوليا ازاماتتارىنىڭ قازاقستان رەسپۋبليكاسىنىڭ اۋماعىنا كىرۋىنە رۇقسات ەتسىن»، - دەلىنگەن قاۋلىدا.
اۆتور: مارلان جيەمباي