التاي كولگىنوۆ جازعى دەمالىستى قالاي ءتيىمدى وتكىزۋگە بولاتىنىن ايتتى

None
None
نۇر-سۇلتان. قازاقپارات - اۋلا كلۋبتارىنىڭ جەلىسىن كەڭەيتەمىز. قازىر قالادا 32 اۋلا كلۋبى بار، بۇل شامامەن 3 مىڭنان استام بالانى قامتۋعا مۇمكىندىك بەرەدى.

بۇل تۋرالى نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ءمالىم ەتتى.

«وقۋشىلار جازعى دەمالىسقا شىقتى. باعا جەتپەس ۋاقىتتى پايدالى وتكىزۋ ماڭىزدى. ءبىلىم الۋمەن قاتار، دەمالۋ، سۇيىكتى ىسپەن اينالىسۋ، قۇرداستارىڭىزبەن سويلەسۋ جانە ت. ب. دەنساۋلىققا پايدالى. پاندەميا دەنساۋلىقتى ساقتاۋدىڭ قانشالىقتى ماڭىزدى ەكەنىن كورسەتتى. سپورت قولجەتىمدى بولۋى ءۇشىن بيىل اۋلالاردى، ساياباقتاردى، سكۆەرلەردى، بۋلۆارلاردى اباتتاندىرۋ بويىنشا اۋقىمدى جۇمىستاردى جالعاستىرۋدامىز.

اباتتاندىرۋ كەزىندە الاڭداردىڭ كوپ فۋنكتسيونالدى بولۋىنا باسا نازار اۋدارامىز: ياعني اۋلادا بالالار فۋتبول/باسكەتبول ويناپ، ترەناجەرلەردە سپورتپەن شۇعىلدانا الادى. سونىمەن بىرگە اعا بۋىن ءۇشىن دەمالىس ورىندارىنىڭ بولۋى شارت. بيىل قوسىمشا 150 اۋلا مەن 40 قوعامدىق كەڭىستىكتى (ساياباقتار، سكۆەرلەر، بۋلۆارلار) اباتتاندىرامىز. وتكەن جىلى 76 گەكتاردان استام اۋماق اباتتاندىرىلدى. سونداي-اق اۋلا كلۋبتارىنىڭ جەلىسىن كەڭەيتەمىز. قازىر قالادا 32 اۋلا كلۋبى بار، بۇل شامامەن 3 مىڭنان استام بالانى قامتۋعا مۇمكىندىك بەرەدى. ال قالانىڭ ءتورت ەلدى مەكەنىندە ءىرى دەنە شىنىقتىرۋ-ساۋىقتىرۋ كەشەندەرىن سالىپ، سپورت، مادەنيەت نىساندارىن جوندەيمىز جانە اشامىز.

بالالار وزدەرى ۇناتاتىن، قىزىعىپ وقيتىن ساباقتاردى تاڭداۋ كەرەك. بۇل سۋرەت سالۋ، مۋزىكالىق اسپاپتاردا ويناۋ نەمەسە ءجۇزۋ، كۇرەس، شاحمات جانە ت. ب. سوندا عانا كەرەمەت ناتيجەلەرگە قول جەتكىزىپ، ساباقتان ءلاززات الۋعا بولادى!

جازعى دەمالىستا فيزيكالىق دەنساۋلىقتان باسقا، ءبىلىمدى دە جەتىلدىرۋ كەرەك. بۇعان كىتاپ وقۋ ارقىلى قول جەتكىزۋگە بولادى.

ويتكەنى ادەبيەت تۋىندىلارى جارقىن ءارى قىزىقتى ساياحاتتى اشىپ قانا قويماي، سوزدىك قوردى تولىقتىرۋعا، ساۋاتتىلىقتى جاقسارتۋعا مۇمكىندىك بەرەدى. مەملەكەت باسشىسى اتاپ وتكەندەي، وقۋعا دەگەن قىزىعۋشىلىق، كىتاپ ارقىلى قورشاعان الەمدى تانۋ مەكتەپ قابىرعاسىنان قالىپتاسۋى ءتيىس، ال وقۋدىڭ جوعارى مادەنيەتىن قالىپتاستىرۋ، وقۋ ساۋاتتىلىعىن دامىتۋ ءبىلىم بەرۋ پروتسەسىنىڭ باسىم باعىتتارىنىڭ ءبىرى بولۋى ءتيىس.

سونداي-اق دەمالىستا فيلمدەردى شەت تىلىندە كورگەن پايدالى. سۋبتيترلەر مەن قىزىقتى سيۋجەت ارقىلى جاڭا سوزدەر مەن ءسوز تىركەستەرىن ۇيرەنۋ جانە ەستە ساقتاۋ وڭاي بولادى. جازعى دەمالىس ۋاقىتىن دەنساۋلىق پەن ءبىلىم الۋ ءۇشىن پايدالى وتكىزە وتىرىپ، ءسىز ءار قادام سايىن ءوز ارمانىڭىزعا جاقىنىراق بولاسىز: وقۋ ورىندارىندا جاقسى باعالار/كورسەتكىشتەرگە قول جەتكىزۋ، سۇيىكتى ماماندىق الۋعا تالپىنۋ؛ ءوز اعزاڭىزدى شىنىقتىرۋ، ت. ب. تەك ءوز جەتىستىگىڭىزدىڭ ۇستاسىسىز! بۇل ءسىزدىڭ دەنساۋلىعىڭىز قانشالىقتى مىقتى بولاتىنىنا جانە ءسىز قانداي ءبىلىم الاتىندىعىڭىزعا بايلانىستى. ال ءبىز ءوز تاراپىمىزدان كۇندەلىكتى نەگىزدە بۇل ءۇشىن بارلىق قاجەتتى جاعدايلاردى جاساي بەرەمىز»، — دەپ جازدى ەلوردا اكىمى.


سوڭعى جاڭالىقتار