قىرعىزستانعا قازاقستاننان گۋمانيتارلىق كومەك جەتكىزىلدى
ونى تاپسىرۋ راسىمىنە قازاقستان ەلشىسى ءراپىل جوشىبايەۆ جانە قىرعىزستاننىڭ اۋىل، سۋ جانە ورمان شارۋاشىلىعى ءمينيسترىنىڭ ورىنباسارى ازامات مۋكاشيەۆ قاتىستى. جۇك بارلىق سانيتارلىق- ەپيدەميولوگيالىق نورمالار ساقتالا وتىرىپ، تەمىرجول ارقىلى 75 ۆاگونمەن جەتكىزىلدى.
ءمينيستردىڭ ورىنباسارى ا. مۋكاشيەۆ قىرعىز تاراپى قازاقستان ۇكىمەتىنىڭ كورسەتكەن كومەگىن جوعارى باعالايتىنىن باۋىرلاس قازاق حالقىنا تەرەڭ ريزاشىلىق بىلدىرەتىنىن جانە اتاپ ءوتتى.
مەملەكەت باسشىسى قىرعىز رەسپۋبليكاسىمەن ءداستۇرلى دوستىق، وداقتاستىق جانە ستراتەگيالىق ارىپتەستىك قاعيداتتارىن باسشىلىققا الا وتىرىپ، قازاقستان حالقىنىڭ اتىنان باۋىرلاس قىرعىز حالقىنا گۋمانيتارلىق كومەك كورسەتۋ تۋرالى شەشىم قابىلداعانى بەلگىلى. بەرىلەتىن گۋمانيتارلىق كومەكتىڭ جالپى كولەمى 10 مىڭ توننا ۇندى قۇرايدى.
ايتا كەتۋ كەرەك، COVID-19 پاندەمياسى باستالعالى بەرى قازاقستان قىرعىز تاراپىنىڭ ءوتىنىشى نەگىزىندە قىرعىزستانعا گۋمانيتارلىق كومەك كورسەتىپ كەلەدى. اتاپ ايتقاندا، 2020 -جىلدىڭ مامىر ايىندا كورشى ەلگە 5 مىڭ توننا قازاقستاندىق ۇن تەگىن بەرىلدى. ال سول جىلعى قاراشادا قازاقستان ۇكىمەتى قىرعىزستانعا ەلىمىزدە شىعارىلعان 400 پورتاتيۆتى وكپە جەلدەتۋ اپپاراتى مەن 2 ميلليون مەديتسينالىق بەتپەردە جىبەردى.