مەكتەپ ىشىندە ورنالاسقان جىلىتۋ قازاندىعى وقۋشىلاردىڭ ومىرىنە قاۋىپ توندىرەدى

بۇل تۋرالى ق ر ب ع م مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى مايرا مەلدەبەكوۆا ايتتى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، ەلىمىزدەگى جالپى ءبىلىم بەرۋ ۇيىمدارىنىڭ 11,3 پايىزى عانا نەمەسە 823 ۇيىم ىشكى ىستەر مينيسترلىگى جەدەل باسقارۋ ورتالىعىنىڭ بازاسىنا قوسىلعان. مەكتەپتەردە 25640 ۆاحتەرلەر مەن كۇزەتشىلەر قىزمەت جاسايدى. سونداي-اق مەكتەپتەردىڭ 6,4 پايىزى مامانداندىرىلعان كۇزەت قىزمەتىنىڭ قاراۋىنا الىنعان.

«بەس وڭىردە مۇنداي مامانداندىرىلعان كۇزەت قاراستىرىلماعان. ولار: الماتى، جامبىل، قوستاناي وبلىستارى جانە شىمكەنت پەن قىزىلوردا قالالارى. مەكتەپتەردىڭ 14 پايىزىندا عانا دابىل تۇيمەشەگى بار. بۇل جالپى 6152 مەكتەپتە دابىل تۇيمەشەگىنىڭ جوق ەكەندىگىن بىلدىرەدى. سوندىقتان ءاربىر ءبىلىم بەرۋ ۇيىمى بۇل اقپاراتتاردى باقىلاۋعا الىپ، جۇزەگە اسىرىلۋىن قامتاماسىز ەتۋى ءتيىس»، - دەدى ول.

سونىمەن قاتار كوميتەت ءتورايىمى مەكتەپ ىشىندە ورنالاسقان جىلىتۋ قازاندىقتارى دا وقۋشىلاردىڭ ومىرىنە قاۋىپ توندىرەتىندىگىن ايتادى.

«ەلىمىزدىڭ 256 مەكتەبىندە، ونىڭ ىشىندە قالادا 9، اۋىلدىق جەرلەردە 247 مەكتەپتە وسىنداي قازاندىقتار انىقتالدى. ولاردىڭ كوبى اقمولا، قوستاناي، اقتوبە جانە تۇركىستان وبلىستارىندا. اتالعان ماسەلە بويىنشا جول كارتاسىن ازىرلەدىك. وسى جول كارتاسىنا سايكەس، 2021-2022 -جىلدارى بۇل جۇمىستار بارلىق وڭىردە تولىق ورىندالىپ، قازاندىقتار ءقاۋىپسىز جەرگە شىعارىلۋى ءتيىس»، - دەدى كوميتەت ءتوراعاسى.