مەكتەپ باعدارلاماسىنا قانداي ۇلتتىق سپورت تۇرلەرى ەنگىزىلەدى

None
None
نۇر-سۇلتان. قازاقپارات - «قازاق كۇرەسى»، «توعىزقۇمالاق»، «اسىق اتۋ» دەنە شىنىقتىرۋ ساباقتارىنا ۇلتتىق سپورت تۇرلەرى رەتىندە ەنگىزىلەدى.

بۇل تۋرالى ق ر مادەنيەت جانە سپورت ۆيتسە-ءمينيسترى ەرلان قوجاعاپانوۆ ايتتى، دەپ حابارلايدى قازاقپارات ءتىلشىسى. 2020 -جىلى 30-جەلتوقساندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت، دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. زاڭنىڭ نەگىزگى باعىتتارى ب ج د د ك جانە دارىگەرلىك- دەنە شىنىقتىرۋ ديسپانسەرلەر جەلىسىن كەڭەيتۋگە، حالىقپەن جۇمىس ىستەيتىن شتاتتىق سپورت نۇسقاۋشىلارىن قامتاماسىز ەتۋگە، سپورتتىق مەديتسينا مەن ءاداپتيۆتى دەنە شىنىقتىرۋ سالاسىنداعى مامانداردى دايارلاۋ جانە ولاردىڭ بىلىكتىلىگىن ارتتىرۋ ءۇشىن جاعدايلار جاساۋعا ارنالعان.

«زاڭ اياسىندا «قازاق كۇرەسى»، «توعىزقۇمالاق»، «اسىق اتۋ» بويىنشا ءبىلىم بەرۋدىڭ بارلىق دەڭگەيلەرىندە دەنە شىنىقتىرۋ ساباقتارىنا ۇلتتىق سپورت تۇرلەرىنىڭ مىندەتتى كومپونەنتىن ەنگىزۋ جوسپارلانۋدا»، - دەدى ە. قوجاعاپانوۆ ءماجىلىستىڭ الەۋمەتتىك- مادەني دامۋ كوميتەتىنىڭ كەڭەيتىلگەن وتىرسىندا.

سونىمەن قاتار، بيىلدىڭ 27-ساۋىرىندە مەملەكەتتىك سپورتتىق جانە شىعارماشىلىق تاپسىرىس ارقىلى سپورت سەكتسيالارى مەن شىعارماشىلىق ۇيىرمەلەردى جان باسىنا قارجىلاندىرۋ بويىنشا نورماتيۆتىك قۇقىقتىق اكتىلەر مەملەكەتتىك تىركەۋدەن ءوتتى.

«بيىلعى 1-مامىردان باستاپ بارلىق وڭىرلەر قاتىساتىن مەملەكەتتىك سپورتتىق جانە شىعارماشىلىق تاپسىرىس تەتىگى جان باسىنا قارجىلاندىرۋ پلاتفورماسى ارقىلى ىسكە اسىرىلادى. وسى نورمالاردى قابىلداۋ بۇقارالىق سپورتتى، ونىڭ ىشىندە بالالار سپورتىن دامىتۋعا وڭ اسەرىن تيگىزەدى دەپ سانايمىن»، - دەدى ۆيتسە-مينيستر.

بۇدان بۇرىن حابارلانعانداي، بۇگىنگى وتىرىس بارىسىندا بۇقارالىق سپورت وڭىرلەردەگى كوپتەگەن ازامات ءۇشىن ءالى دە قولجەتىمدى ەمەس ەكەنى ايتىلدى. ەرلان قوجاعاپانوۆتىڭ سوزىنە قاراعاندا، بىلتىر ەلىمىزدىڭ دەنە شىنىقتىرۋ- سپورت قوزعالىسىنا 5,9 ميلليون ادام قاتىسقان.

اۆتور: رۋسلان عابباسوۆ

سوڭعى جاڭالىقتار