جەك ما كۇزدەن بەرى العاش رەت كوپشىلىك الدىنا شىقتى - ۆيدەو

جەك ما حانجوۋداعى Alibaba Group كامپۋسىنىڭ بىرىندە بولعان. قىتايدىڭ ءىرى كومپانيالارىنىڭ ءبىرىنىڭ نەگىزىن قالاۋشى ارىپتەستەرىمەن بىرگە جىل سايىنعى «Ali كۇنى» (Ali Day) ءىس-شاراسىنا قاتىسۋدى شەشىپتى.

قىزمەتكەرلەر تۇسىرگەن فوتوسۋرەتتەر مەن بەينەجازبالارعا سايكەس، جەك ما بۇل ءىس- شاراعا Alibaba كومپانياسىنىڭ باسقا باسشىلارىمەن بىرگە قاتىسقان. ديرەكتورلار كەڭەسىنىڭ ءتوراعاسى قىزمەتىنەن كەتسە دە، ما كومپانيادا ءالى دە بەدەلدى ەكەنى اتاپ وتىلەدى.

جەك ما بىلتىر كۇزدە قىتاي ۇكىمەتىن سىناعاننان كەيىن قوعامدىق قىزمەتىن توقتاتقان ەدى. سودان كەيىن ق ح ر بيلىگى Alibaba Group-قا قاتىستى مونوپولياعا قارسى تەرگەۋ باستاپ، كومپانيا اكسيالارىن ساتۋعا تىيىم سالعان. وسىلايشا، تەك ءبىر كۇندە ول 3,5 ميللياردتان اسا دوللاردان جانە ازياداعى ەڭ باي ادام اتاعىنان ايىرىلعان.

وسىدان كەيىن ميللياردەر كوپشىلىك الدىنا تەك ونلاين شىققان. قاڭتاردا ول اۋىل مۇعالىمدەرىن قولداۋعا ارنالعان ونلاين- شاراعا قاتىسقان. ءساۋىردىڭ ورتاسىندا ما رەسەي گەوگرافيالىق قوعامى قامقورشىلار كەڭەسىنىڭ بەينەكونفەرەنسياسىندا بولعان.

بۇعان دەيىن قىتاي Alibaba كومپانياسىنا مەديااكتيۆتەرىنەن قۇتىلۋدى تالاپ ەتىپ، كومپانياعا تاريحتاعى ەڭ ۇلكەن ايىپپۇل سالعانى حابارلانعان بولاتىن. سونىمەن قاتار، ەل بيلىگى جەك ما بيزنەس مەكتەبىن ستۋدەنتتەردى قابىلداۋدى توقتاتۋعا ءماجبۇر ەتىپ، كومپانياسىنىڭ وكىلدەرى جانە كاسىپكەردىڭ وزىمەن كەلىسسوز جۇرگىزگەن. كەزدەسۋلەردە جەك مانىڭ كومپانيادان كەتۋى جانە ۇلەسىن ساتۋ ماسەلەسى تالقىلانعان ەدى.